1 MAKORINTIYO 10

Mifahamisho yarengwa hari mwa iIsraila ya hale

1Wananyangu, tsisutsaha yaka amba kamwajua amba piya wadzaɗe watru waka utsini na livingu, tsena piyawo wapasua iɓahari#10:1 iɓahari: Yaãni, ɗe iƁahari Ndzukundru. Namuangaliye lisanamwe hari mwa zikandre za mwiso za ishio ini.. 2Waɓaĩshiwa|uɓaĩsha piyawo ha uv̄umoja na Musa moni na livingu na moni na iɓahari#10:2 Namuangaliye Mulawiyo 32:6.. 3Piyawo waɗyi shahula ɗe wiyo-wiyo ya shiroho#10:3 shiroho: Yaãni, ya midjuza., 4na tsena piyawo wano shinoa ɗe wiyo-wiyo ya shiroho; kweli amba wakonwa shinoa yakolawa hari mwa ɓwe-monye la shiroho lakowaɗunga, na ɓwe-monye lilo lika ɗe Kristi. 5Ɓadi wengini mwawo kawakuɓalishiha na Mungu, ɗe imana waangamia hari mwa lipadza.

6Na zini za mifano hatruju, ile rasukane ngushauku mbovu mauri ɗe izo wakanazo. 7Mwasufanyihe maãɓudu-masanamwe ha mufano wa wasalia mengoni mwawo, mauri ɗe inamuna yaangihwa moni na uMuangishio#10:7 uMuangishio: Namuangaliye Mulawiyo 32:6.: «Umati uketsi ile uɗye na unwa, amwesa wahime waangadze.» 8Rasufanye taɓia za shahawa kazalazimu mauri ɗe iheli wasalia mengoni mwawo wafanya, ata v̄wafa indadi ya alifu shirini na traru suku moja. 9Rasumudjereɓu Raɓi mauri ɗe inamuna wasalia mengoni mwawo wafanya, ata waangamidziwa na nyoha. 10Mwasungurume mauri wasalia mengoni mwa wao wakonguruma, ata waangamidziwa na uMuangamifu.

11Na trongo zizo ziwav̄iria ile zike mufano, tsena ziangihwa pare zirifahamishe, wasi rawaswiliwa na uwakati wa mwiso. 12Ha izo, monyewe udzifikiria amba alimbala, natahadhari asuje awa. 13Kav̄usi djariɓu lamuparani lashilidzia uɓinadamu. Na Mungu, waye muaminifu. Katsoruhusu mwadjereɓiwa ha uzidisha izo mushindrao. Ɓadi v̄umoja na lidjariɓu, atsohetsi wajau ndzia ile mushindre mulistahamili.

Musurenge fuvu na mazetwani

14Ha izo wandzani wa roho wangu, namutrale itrongo ya uãɓudu masanamwe. 15Nisulagua mauri na watru wendza fikira, ɓasi namunamuwe wanyu ha wanyu trongo niirongoao. 16Hali ishikombe ya himida rihimidiao, v̄av̄o karisurenga fuvu hari mwa idamu ya Kristi? Na lidipe rikutruao, v̄av̄o karisurenga fuvu hari mwa umwili wa Kristi? 17Ɓasi iv̄o v̄ulio dipe moja, wasi ha uwengi watru, ra mwili moja, mana piyasi risurenga fuvu hari mwa dipe moja lilo.

18Namuangaliye umati wa Israila uv̄andre wa shi mwili: wao waɗyao nyama zatolewa sadaka, hali kawasurenga fuvu na talatala ile latolewa? 19V̄av̄o trini ɗe niirongoao? Amba nyama yatolewa sadaka sanamwe, iyo izidi faida? Au sanamwe, iyo shitru yendza mana? 20Ata hata! Ɓadi iyo waitoao sadaka, isutolewa sadaka mazetwani, ɓadi tsi Mungu. Na wami tsisutsaha mwarenga fuvu na mazetwani. 21Kamushindri unwa hari mwa ishikombe ya Raɓi na ishikombe ya mazetwani; kamushindri renga fuvu hari mwa imeza ya Raɓi na imeza ya mazetwani. 22Hali risutsaha ritsonge Raɓi akane uwivu? Hali rina nguvu rahana waye?

Namurendre piya ha utukufu wa Mungu

23V̄wa warongoao: «Piya ziruhusiwa.» Kweli, ɓadi tsi piya ziliona faida. «Piya ziruhusiwa», ɓadi tsi piya ɗe ziendresao mbeli. 24V̄usuke ata mutru atsahe faida yahe monyewe, ɓadi ɗe faida ya munyahe.

25Namuɗye kula nyama iudzishihao ɓazari, wala tsi ha udzitafiti na itsokao yotsi ha siɓaɓu ya minamuzi hari mwa yalazimu na kayalazimu. 26Mana ishiv̄andre ya tsi#10:26 ishiv̄andre ya tsi: Namuangaliye Utende 24:1. ya Mola, na piya izo zilio moni.

27Neka mutru kasina uaminifu moja na wanyu amukariɓisani, tsena musutsaha mwendre, namuɗye kula mutsoyeleshewao, ɓila tsi ha udzitafiti na itsokao yotsi ha siɓaɓu ya minamuzi hari mwa yalazimu na kayalazimu. 28Ɓadi neka mutru amuambiani: «Shitru ini ika itolewa sadaka», v̄av̄o musuɗye, ha siɓaɓu ya ule amujudzani, na yiminamuzi hari mwa yalazimu na kayalazimu. 29Namorongoa amba ha siɓaɓu ya trongo ya minamuzi, tsisurongoa ɗe yanyu, ɓadi ɗe ya mutru ule. Manatrini ata unafasi wangu utsotrilwao hari mwa minamuzi ya mutru wangina? 30Neka nisuɗya yangu shahula ha uhimidia, manatrini nitsorongolwao ha unayi na ishitru niihimidiao?

31Ha izo, mwamoɗya, au mwamonwa, au tsena yotsi muifanyao, namufanye piya ha utukufu wa Mungu. 32Musuke siɓaɓu ya ukwalisa, tsi ha Magiriki, wala tsi ha Mayahudi, wala tsi ha iDjama Ndziwaminifu ya Mungu, 33mauri ɗe wami wajau namuna nitsahao nijiv̄idze piya watru hari mwa piya zitrongo, wala tsi ha utsaha faida yangu monyewe, ɓadi ya uwengi, ile wahuyiwe.

Currently Selected:

1 MAKORINTIYO 10: swb

Highlight

Copy