1 MAKORINTIYO 6

Mashitaka ɓaina ya wananya wa shi uaminifu tsi trongo yalazimu

1V̄wamoka mutru mengoni mwanyu amba ana umani na munyahe muaminifu, namuna jeje asuɓutuo av̄inge umani ule wahukumulwe na watru kawamuji Mungu, ɓadi tsi mbeli za uwaaminifu? 2Hali kamusujua amba waaminifu watsohukumu ulemengu? Na neka ɗe ha wanyu ɗe ulemengu utsohukumulwao, kamutsostahiki uhukumu wana trongo watiti? 3Kamusujua amba ritsohukumu zimalayika? Na v̄av̄o karisurongoa ata hata trongo za maẽsha ya leo! 4Neka amba muna umani wahusu trongo mauri ɗe zizo, ɓasi musuziv̄inga zinamulwe na watru watiti matsoni mwa iDjama Ndziwaminifu? 5Nisuirongoa ha aĩɓu yanyu. Amba kav̄u hari mwanyu mwendza hikima atsoshindrao anamuwe ɓaina ya wananyahe waaminifu! 6Ɓadi mwananya asushitaki mwananya, na iyo mbeli za watru tsi maaminifu!

7Ɓasi rangu muliona mashitaka wanyu na wanyu, v̄av̄o mushindriha halisi. Tsi ɓorwa mwadhulumiwa? Tsi ɓorwa mwadzilisha mwav̄oshewa mali zanyu? 8Ɓadi wanyu ɗe mudhulumuo na urav̄a, na iyo ha wananyanyu wa uaminifu!

9Kamusujua amba wadhuluma kawatsopara fungu hari mwa Utawalizi wa Mungu? Musulaɓihe! Watru wendza taɓia za peu za shi mwili, maãɓudu-masanamwe, wazindzi, watruɓaɓa waliona shahawa wao na wao#6:9 watruɓaɓa... wao na wao: Urongozi unu usurongoa makauli maili hari mwa iShigiriki yarongoao shahawa ya watruɓaɓa na watruɓaɓa., 10waidzi, mav̄endza-upara, walevi, marongoa-nnayi, na warav̄izi, kawatsopara fungu hari mwa Utawalizi wa Mungu. 11Na v̄av̄o ɗe v̄ahanu wasalia mengoni mwanyu waka. Ɓadi muja muhoswa, muja mutwaharishiwa, muja mukuɓalishiha mbeli za Mungu ha lidzina la Raɓi Insa-Kristi, na ha iRoho ya Mungu watru.

Namurumiye mili yanyu ha utukufu wa Mungu

12V̄wa warongoao: «Tsiruhusiwa piya.» Ɓadi tsi piya ɗe ziliona mana na mutru. Kweli amba tsiruhusiwa piya, ɓadi hanguju wami, tsitsodzilisha natawaliwa na itsokao yotsi. 13Na tsena: «Zahula, izo za mimba, na imimba, ya zahula.» Izo kweli; ɓadi Mungu atsoziangamidza izo mbili. Na umwili tsi wa ufanya taɓia za shahawa kazalazimu; uwo wa Raɓi, na Raɓi waye, wa umwili. 14Ɓasi Mungu amuregeza hayi Raɓi ulawa ufaju, atsoriregeza hayi ulawa ufaju wasi wajau, ha ushindzi wahe. 15Afa kamusujua amba yimili yanyu ya ziga za Kristi? Ɓasi nitsorenga ziga za Kristi, nizifanye ziga za susu? Ata hata! 16Hali kamusujua amba mutru adzifungamanisao na susu, uwo a mwili moja na waye? Mana v̄uangihwa: «Wao waili watsofanyishiha mwili moja.»#6:16 Namuangaliye Mwandro 2:24. 17Ɓadi uwo adzifungamanisao na Raɓi, ufanyiha roho moja na waye.

18Namutrale taɓia za shahawa kazalazimu. Dhambi langina lotsi mutru alifanyao, lilo kalihusu umwili wahe, ɓadi uwo afanyao taɓia za shahawa kazalazimu, v̄av̄o asuãswi kinyume na umwili wahe monyewe. 19Afa kamusujua amba umwili wanyu, uwo ɗe inyumba ndzitwaharifu ya iRoho Ndzitwaharifu ilio moni hanyu, tsena mwaipara ulawa ha Mungu? Wanyu tsi wanyu wenyewe. 20Mununulwa ha thamani. Ɓasi namumutukuze Mungu mwilini hanyu.

Currently Selected:

1 MAKORINTIYO 6: swb

Highlight

Copy