ROMMI 6
6
Axine lo Thivae, Alhou lau Xüani
1Imaye ningu ye kiu pini kea? Küpükini no pofushi apeni kehu ningu ye axine shikibe akepu kea? 2Kiu gholau nomu kumoe! Ningu khunoqo axine küdau ye thive akeno kishi püzü itaghi tipau lo xüni kea? 3Ningu khunoqo Khristo Jisü gholo baptiz shisü luve akeno ningu kümtsü Pa kithi lo baptiz shisü luvae pi nongu ye mtha keshea? 4Ikehu akithi lo baptiz shisü luve keu lono ningu ye Pa gholo qhove, tishikeu lono Apu juküvü küka lono Khristo pesü xüputhuve ketoi, ningu ghi aküxü kitheu lo cheche peniye ke.
5Tsala Pa kithi lo hitoi küsajelu keu lono ningu pesü Pa gholo küqhalu püaghi aye, mtsüqheino Paw xüchilekulu lo ghi ningu ye Pa gholo küqhaluve nani. 6Ningu no ithi anino ni lhoaye aqau ye Khristo gholo no yedavae, tishianguno axine phimpi ye kütsave no tithiu ye axine qüaxemi shikithe pemo niye ke. 7Kughengu timi khuu no thive akeno axine lono kuqho phevae. 8Ikehu ningu no Khristo gholono thive aye, Pa gholono itaghi ningu ye xü nani kepi pülü cheni. 9Ningu no ithi anino Khristo ye akithi lono xüputhuve akeke khilemu thi kithemae; akithi ye Pa qhasü lumoae. 10Kughengu Pa no thikeu kithi ye ghuthu khavino kümtsü ghenguno axine küdau thive, ikemu Pa no xü akeu küxü ye Alhou lau xü anie. 11Tihutoi, nongu ampi ghi axine küdau ye thive akemu Khristo Jisü gholono Alhou lau xü anipi kihilo.
12Tighenguno axine pelo nonguw thiveni keu phimpi qhasüpe ashi ghakiqipu shini keu gholu auvepe kevilo. 13Nongu phiau pesü axine lo tsüve ghi amikuchokumo ghenguno peitha kevilo, ikemu akithi lono aküxü lo süghive kemi toi Alhou lau nongu küxü ikhiphe tsülo, eno nongu phiau pesü amikucho ghenguno peitha penike tsülo. 14Kughengu nongu ye Ayezah qholo kumono küpükini qholou ani keke axine ye nongu qhasüve mo nani.
Amikucho Qüaxemi
15Imaye kiu pinia? Ningu ye Ayezah qholo kumono küpükini qholou anipi axine shini keshea? Khilemu kumoe! 16Tsala nongu no aghokulu qüaxemi lakhi toi khuana lau nongu mpi ikhiphe tsü aye, nongu ye pa qeu shivae pi mtha keshea? Nongu no khuu gholu ani keno ti ye axine lo sawuve chekeu akithi keo, achipikalu keu lo sawu chekeu aghokulu keno, hiküma dolo lakhi shi aghi nani. 17Ikemu Alhou shikimthi akeu ye nongu khunoqo ghuthu lakhi lo axine qüaxemi shi ache keno, itehi ye nonguu no amlo lono ipeghi püzü agholuqhiyi akükütsü tsa nongu lau apasü shi shikave keu ikhiluvae, 18eno axine lono kuqhopheve akehu Alhou chipiu qüaxemi shiluvae. 19Nonguw vethakulu no mikhelo kehu ni ye tipau gholau no pi anike. Ghuthu lakhi lo nongu no niqhinilai keu eno Ayezah kiphikumo küdau nongu phiau pesü aqüaxemi shi tsükelo tiuno alau Ayezah kiphikumo lo sailove cheke toi, itehi ye nongu phiau shikimthe pe akimthepu lo peithalu kepushi Alhou chipiu qüaxemi shi ikhiphe tsülo.
20Kughengu kughou nongu no axine qüaxemi shiche keno, nongu ye Alhou mikucho launo agho aghoshi xüche. 21Ikemu itehi thime khipaqo ghenguno nongu no kujo ani keno, tipa ghuloki lo nongu ye thime tipaqo launo kiu ala shilu kea? Kughengu thime tipaqo shekuho ye akithi ke. 22Ikemu itehi nongu ye axine lono kuqhophe pe Alhou qüaxemi shive akehu nongu küxü ikhiphe pe akimthepu lo tsülu keu huno nongu la ke, eno tipau shekuho ye lhokta küxü. 23Kughengu axine jume ye akithi, ikemu Alhouw kümsagho huno ni Mpeu Khristo Jisü küdau no lhokta küxü ke.
Currently Selected:
ROMMI 6: SUMRVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
