ACHINEMI 8
8
Aaron ngo Pa Nuli Kishekimthe
1 Ampeu no Moses pütsa no pi, 2“Aaron ngo pa nuli saghi no achinemi phimini ngo nukikishe thazü, axine kümllagho mishitsü, anetsü kini, eno kholaqhi sümokeu sho ashoghi lakhi süghilo. 3Eno aqoaho kümtsü kukumqo pe kuposhukulu phiki kulaghi lo ighilo.” 4Ampeu no azah tsüke toi Moses no aqoaho sasü kuposhukulu phiki kulaghi lo kumqo.
5Moses no aqoaho vilo pi, “Hi shipenike Ampeu no azah tsü ani.” 6Moses no Aaron ngo pa nuli saghi no azü pesü panoqo qhukimthe. 7Pa no aphiküzü Aaron puuve, apokha tsüghave tsü, chijeboike phi puuve, achinemi phi#8:7 Momu ephod pipe eno tipau lo kütshakügha shi pili püakeu she pesü pa vehomxa khavetsü. 8Pa no amla küküzü süvetsü no tipau lo Urim ngo Thummim#8:8 Thime hi küma vecheo Alhou pulou kimchi che. süvetsü. 9Ampeu no azah tsüke toi Moses no akütsü shonhaphi pesü Aaron pipe, tipau gizüu pa no ameshoyi yipa davetsü, eno akimthe kütsükükha süvetsü.
10Tishino Moses no nukikishe thazü pesü aphiki lo thime kümtsü nuve no kishekimthe pe qhive. 11Thazü hami pesü akiptia lo ghuthu tsüni küzüte no akiptia, tile akhu-ajukhu jeli, chithakhu eno akibepu kümtsü nuve no kishekimtheve. 12Pa no thazü pesü Aaron kütsü lo sütsü no kishekimtheve. 13Ampeu no azah tsüke toi Moses no Aaron nuli saghi no aphiküzü puuve, aphi pesü panoqo pokha shitsü eno aphi kütsükuqho pipeve.
14Tithiu Moses no axine kümllagho mishitsü saghi, eno Aaron ngo pa nuli no au pesü amishi kütsü lo inape. 15Pa no amishi heqhipe aji pesü akiptia kiboqo lo lesü no akiptia shikimthe, eno aji achili ye akiptia bophi lo leqhive no kishekimthe tsü. 16Pa no amxu, apuloshi, eno amchi lothi kini, tipau gholo atha kuchopu luve no akiptia lono pitive. 17Ikemu ayiko ngo ashicho eno tübatüzü kümtsü Ampeu no azah tsüke toi aghazü khalau pewo ami no pitive.
18Tithiu pa no akipti kümllagho shinike anetsü saghi, eno Aaron ngo pa nuli no au pesü anetsü kütsü lo inape. 19Pa no ti heqhive no aji pewo akiptia vehomxa leqhive. 20Pa no anetsü shi ghekucho pe aleqhi shive, eno ane kütsü ngo aleqhiqo eno atha kuchopu pitive. 21Ampeu no azah tsüke toi Moses no aboloshi eno apukhuqo azü no qhuve no ane kupuju akiptia lono pitive. Tino mülüi keu xo kipti kümllagho, achuqupu kümllagho Ampeu lopu ke.
22Tishino Moses no anetsü lakhiu akimthepu lo ikhiphe tsükeu kümllagho saghi, eno Aaron ngo pa nuli no au pesü anetsü kütsü lo inape. 23Pa no tipau heqhipe aji hami pewo Aaron kini aniqe lo, pa uloqu ajeu, eno pa pukhu loqu ajeu süvetsü. 24Pa no Aaron nuli ikhiphe tsü, aji pesü panoqo kini aniqe lo, auloqu ajeu eno apukhuloqu ajeu süvetsü. Pa no aji pewo akiptia vehomxa leqhive. 25Tishino pa no atha eno ashomhi tha, amxu, eno apuloshi ngo amchi lothi kini, tipau gholo atha eno aluko ajeu, 26eno kholaqhi sümokeu sho Ampeu zülo akeu ashoghi lono pa no thazü pesü mlakeu shopa lakhi eno zümzümüi keu shopa pewo atha ngo aluko ajeu beve. 27Pa no hi kümtsü pesü Aaron eno pa nuli u lo süvetsü no Ampeu zülo akimchi kümllagho shitsü. 28Tishino Moses no panoqo u lono ikhipe akipti kümllagho gholono pitive. Hino mülüi keu xo akimthepu lo ikhiphe tsükeu kümllagho, achuqupu kümllagho Ampeu lau tsükeu ke. 29Ampeu no azah tsüke toi Moses no amlashi luve no Ampeu zülo akimchi kümllagho tsü. Tino akimthepu lo ikhiphetsü keu kümllagho lo Moses saje ke.
30Moses no nukikishe thazü eno akiptia lo akeu ji luve no Aaron ngo pa nuli phimini lo küzüte puku. Hitoi pa no Aaron eno pa phimini eno pa nuli ngo panoqo phimini shikimthe tsü.
31Moses no Aaron ngo pa nuliqo vilo pi, “I no, ‘Aaron ngo pa nuli no tipau chuni,’ ipi azah tsüke toi kuposhukulu phiki kulaghi lono ashi lhove no tileno chuni, eno asho khikhi akimthepu lo ikhiphetsü keu shoghi lo ani keno, ti ikhipe chuni. 32Ashi eno asho achili ye pewo ami lono pitiveni. 33Akimthepu lo ikhiphe tsükeu tsala tsüni kupu moke kutolo nongu ye kuposhukulu phiki kulaghi hechesü khalau ipe moni, kughengu akimthepu lo nongu ikhiphe tsüni keu ye atsala tsüni lunani. 34Ishi kiu shive akeno, Ampeu no nongu ghenguno lokichile shitsü penike azah tsüke. 35Ampeu no hakite keu kiqi lono nongu ye kuposhukulu phiki kulaghi lo putho pucho atsala tsüni ngono shilopi keqo mlaithani, tishikeu lono nongu ye thimo nani, azah I tsü püakeu ye hipau ghenguno ke.” 36Ampeu no azah tsüke toi Aaron ngo pa nuli no kümtsü shive.
Currently Selected:
ACHINEMI 8: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
