ACHINEMI 3
3
Külakishi Kümllagho Yezah
1“Milakhi no külakishi kümllagho tsünike Ampeu zülo amishi süghi aye, atsü aqu khikhiu namu tukutiye kühakeu shini. 2Pa no pa kümllagho lhoxü kütsü lo inape no kuposhukulu phiki kulaghi lono heqhini, eno Aaron nuli achinemi no aji pesü akiptia vehomxa leqhini. 3Pa no külakishi kümllagho ghakishi lono Ampeu lau achuqupu kümllagho shi amxu ngo aghükini tsüni, 4eno amchi lothi kini, ti küzüpe achekeu atha eno apuloshi aqo lono ikhiphe luveni. 5Tishino Aaron nuli no akiptia lo piti mlla akeu shou no hipaqo kümtsü pitiveni; Ampeu lopu mülüi keu xo hino achuqupu kümllagho ke.
6“Milakhi no külakishi kümllagho tsünike Ampeu zülo ambe süghi aye, atsü aqu khikhiu namu tukutiye kühakeu shini. 7Pa no ambeti tsü aye, Ampeu lau süghini, 8pa no lhoxü kütsü lo inape no kuposhukulu phiki zülono heqhini, eno Aaron nuli no aji pesü akiptia vehomxa leqhini. 9Pa no külakishi kümllagho ghakishi hipau lono Ampeu lau achuqupu kümllagho shi atha eno ashomhi tha, ti ye ashomhibo kupuju luveni, eno amxu ngo aghükini, 10amchi lothi kini, ti küzüpe achekeu atha eno apuloshi, amchi lothi gholono ikhiphe luveni. 11Eno Ampeu lau achuqupu kümllagho shi achineu no ti kümtsü ikhipe akiptia lono pitiveni.
12“Khuana kümllagho no ane shiaghi aye, pa ye Ampeu zülo ti süghini. 13Pa no pa u pesü tipau kütsü lo inape no kuposhukulu phiki zülono heqhini, eno Aaron nuli no aji pesü akiptia vehomxa leqhini. 14Tishino pa no pa kümllagho hipau lono Ampeu lau achuqupu kümllagho tsükeu shi amxu ngo aghükini kuchopu, 15amchi lothi kini, ti küzüpe achekeu atha eno apuloshi, amchi lothi gholono ikhiphe luveni. 16Eno achineu no mülüi keu xo shi ti kuchopu akiptia lono pitiveni. Atha thaqhü ye Ampeuw ke. 17Nongu ye atha na aji namu chumoni, hi ye tiqheli kupuju lo nongu no küghüna chekeu-a kümtsü lo pimhe cheni keu yezah shivae.
Currently Selected:
ACHINEMI 3: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
