ACHINEMI 1
1
Akipti Kümllagho Yezah
1 Ampeu no Moses kuno kuposhukulu phiki lono pa pütsa no pi, 2“Israelmi pütsa no pilo, Kughou nongu khuana no Ampeu lau akümllagho shi lhoxü süghini keno, nongu kümllagho tipau ye amishi momu ambe shiaghi masa.”
3“Tsala pa no kuchopu kipti kümllagho shinike amishi süghi aye, ti ye atsü tukutiye kühakeu shini. Ampeu no ikhilu tsü penike pa no tipau sasü kuposhukulu phiki kulaghi lo ngoni. 4Pa no pa u pesü piti mlla niye akeu lhoxü kütsü lo inapeni, eno pa ghenguno lochile tsü penike süghi keu pa kümllagho ikhilu tsüni. 5Tishino pa no Ampeu zülono lhoxü heqhini, eno Aaron nuli achinemi no aji pesü kuposhukulu phiki kulaghi lo akiptia kümtsü vehomxa leqhini. 6Pa no kuchopu kipti kümllagho lhoxü yiko lhave no aleqhi shi gheni, 7tileno achineu Aaron nuli no akiptia lo ami süno asü ghepukuni. 8Aaron nuli achinemi no ashileqhi, akütsü, eno atha, pesü iqü akeu sü shou beni; 9ikemu kighinoli eno apukhuqo ye azü lono qhuveni. Achineu no tipaqo kuchopu akiptia lono achuqupu kümllagho, Ampeu lopu mülüi keu xo shi ghi pitiveni.”
10“Tsala pa kipti kümllagho no ambe momu ane shiaghi aye, ti ye atsü tukutiye kühakeu shini, 11Ampeu zülono pa no akiptia ahuu küdau no heqhini, eno Aaron nuli achinemi no tipau ji pesü akiptia vehomxa leqhini. 12Pa no ashi kuchopu, akütsü eno atha ghi süküqha no aleqhi shi gheveni, eno achineu no tipaqo pesü akiptia lo asü iqü akeqo shou kithipe qhini, 13ikemu kighinoli eno apukhuqo ye pa no azü lono qhuveni. Tishino achineu no tipaqo kuchopu ikhipe pitiveni; Ampeu lopu mülüi keu xo hino akipti kümllagho ke.”
14“Tsala Ampeu lau pa kümllagho no aghau kipti kümllagho shiaghi aye, pa ye aqhewo momu amiqhi süghini. 15Achineu no akiptia lo tipau peighi no akütsü süthape ami lono pitiveni. Eno aji qhoi akiptia vehomxa leqhini. 16Tishino pa no akole eno tipau alou akeqo kuchopu ikhipe akiptia kipelau ayevu qhiche ke-a lo vepheveni. 17Pa no tipau chishibo tsüqüpe no sülaveni, ikemu sütha kütüta shimono akiptia lo ami iqü akeu lono pitiveni. Ampeu lopu mülüi keu xo hino akipti kümllagho ke.”
Currently Selected:
ACHINEMI 1: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
