IPEKULU 22

1“Tsala milakhi no amshitsü momu ambe pükave, eno tipau ghiqhi no jechuve aye, pa ye amshitsü lakhi theli lo amshitsü pungu, eno ambe lakhi theli lo ambe bidi pesü lochileni. 2Tsala küpkami lakhi no püka aghikeu ithulu kelono heqhi püzü thive aye, aji peleve keu ghenguno akipimi kühae, 3ikemu khetsünhe ipeghive kethiuno tishive aye, aji peleve keu ghenguno akipimi anani. Pa ye mtsüqheino lochile nani. Tsala pa no kiumu aghimo aye, pa küpka ghenguno pa pesü jeveni. 4Tsala püka luve keu lhoxü thimo no pa gholo pighi aghi aye, amshitsü, khurha momu ambe shi aghi namu, pa ye tipau theli lo kini pesü lochileni.

5“Milakhi no aluza momu atsailu lo lhoxü pelo mza chuvepe aye, momu paw lhoxü khaqhi phepe kütami luza mza chuvepe aye, pa ye pa ampi luza momu atsailu lo akiviu pesü lochileni.

6“Tsala ami ipeghi no tino atsüni pitisü athi kumqo püakeu momu aghibo momu aluza pitileve tsü aye, khuu no ami sü keno, pa no akuchopu lochileni.

7“Tsala milakhi no pisa momu tinhemgha kütsü püaghitsü peniye pa kisüghüu tsü püake lono timi tipau ki lono püka luve tsü, eno aküpkau phuluve aye, pa ye tipa qhemi kini pesü lochileni. 8Tsala aküpkau phumlave aye, aki mpemi no Alhou lau kupunu ighi no pa ye pa kisüghüuw tinhemgha shou au be kemo keno piyeni. 9Amshitsü, khurha, ambe, ane, hebephi, momu kiu kiumu pühave keu achipikumo lono qhipüaghi kelo, khuana no, ‘Hi ye Iw ke,’ ipi aye, amqo kini küküpna ye Alhou zülo süghini. Alhou no khuu kileveni keno pa no tipa qhemi kini pesü pa kisüghüu lochileni.

10“Tsala milakhi no khurha, amshitsü, ambe momu lhoxü kiu kiumu pa kisüghüu pelo jukuto tsü peniye tsü püake lono tipau thive momu ghüzave momu khunomu ithumla no ake lono sawuve tsü aye, 11pama dolo milakhi no pa kisüghüuw pichepighi shou au be kemo keno junike ghenguno Ampeu launo pama dolo ashoqhi shini. Lhoxü mpeu no ashoqhi ikhiluve tsüni, eno pa ye lochile moni. 12Ikemu pa launo püka luve aghi aye, pa ye lhoxü mpeu lochileni. 13Tsala tüghashi no tsüqhive aghi aye, pa ye thopi shi ghi ti süghini. Pa ye kiu tsüqhive keno tipau theli lo lochile moni.

14“Tsala milakhi no pa kisüghüu lau lhoxü kiukiumu nalu no ampeu küküha lono izave momu thive aye, pa ye tipau lochileni. 15Tsala ampeu küa lono tishive aye, nalu keu timi huye tipau lochile moni; tsala tino piqekeu shi aghi aye, ajume tsüve keu huno lochilevae.

Aqoaho lo Achipiu Yezah

16“Timi lakhi no atathelimi kütami no ini mphi keu müsü luve no li sasü züve aye, pa ye li ghenguno ameh tsüve no li pesü pa nipu shiveni. 17Tsala li papu no li pesü pa tsüni keu pulomo mithe aye, pa ye atathelimi ghenguno ameh tsü chekeu qhemi lochileni.

18“Nongu ye küdüu limi pelo xüpe kevilo.

19“Khukhumu lhoxü sasü küghüpa keu ye pithiveni.

20“Khukhumu Ampeu lau likhi kumo aye, alhou kütau lau aghashi keu ye kütsaveni.

21“No ye kupokichemi pimi moni momu nedaqoda moni, kughengu nongu ye Egypt yeghi lo kupokichemi shi cheke. 22Nongu ye chimemi momu mighimi khumu sapüsa moni. 23Nongu no panongu sapüsa, eno panoqo no I lau ighamku aye, Ni ye mtsüqheino panoqo küqa chiluve tsü nani, 24I loghu no iqü ipeghive nani, eno I no azütakikihi pesü nongu pithive nani, nongu nipuqo ye chimemi shive eno nongu nuliqo ye mighimi shive nani.

25“Tsala nono Iw timi kumlhomi o gholo akemi lau pisa püna aye, no ye pisa püna kighishe chekemi toi pa lau akighishe lumoni. 26Tsala nono aküna shoqhi shi o kisüghüu hebephi qhiluve aye, khetsünhe ilomphi lono pa tsüchileveni, 27kughengu pa küzülu kepu ye ti likhi, eno ti ye pa phimpi küküzüpu ke; ti kühave aye pa ye kiu lo züni kea? Eno pa no I lau ighamku aye, Ni ye inive tsü nani, kughengu Ni ye kimiyekini ke.

28“No ye Alhou thaigha moni, momu now timi sakiphemi ghusho moni.

29“No ye ghile kupukuno shi akeu momu atsaizü qole akeu pesü mllani keu lo süpushu moni. O nu anoghiu ye I tsülo. 30O mishitsü ngo o mbeqo ghi titoi shini: atsala tsüni aza gholo ngoni eno atsala akütacheu lono I lau ikhiphe tsüveni.

31“Nongu ye kishekimthepe Iw shini. Tighenguno nongu ye aghalo tüghashi no heqhive keu khetsüshi chumoni; ti ye atsüqo tsüveni.”

Currently Selected:

IPEKULU 22: SUMRVBSI

Highlight

Copy