IPEKULU 19

Sinai Toghi Lo Israelmi

1Israelmi no Egypt lono ipeghi keu aqhi aküthüu lo, panongu ye Sinai sayeqha lo ighive. 2Panongu no Rephidim lono chesü wuve no Sinai sayeqha lo ighi, eno asayeqha lo aghazü shipe ngove. Tile Israelmi ye naghuto zülo aghazü shive, 3eno Moses ye Alhou sasü kushoni ye iqhove. Naghuto lono Ampeu no Moses kuno pi, “No ye Jacob lagha vilo ishi pini, eno Israelmi vilo pini: 4‘I no Egyptmi lau kiu shi, eno kishi alhuqu chishibo lono nongu xapu eno nongu sasü I lau ighi keno nongu no ithuluvae. 5Tighenguno itehi, nongu no mtsüqheino I tsa gholu eno Iw puloshoqhi pape aye, nongu ye ayeghi lo timiqo kümtsü dolo Iw akughupu mheghi shi nani, kughengu ayeghiqha kümtsü Iw ke; 6eno I ghenguno nongu ye achinemi kükaqha lakhi eno akimthe shiye shi nani.’ Nono Israelmi vilo pini keu tsa ye hipaqo ke.”

7Ikehu Moses no ighi no layemiqo kuno Ampeu no azah pa tsükeu tsaqo pesü panoqo zülo lheqhi. 8Timi kümtsü no kümtsa khochile no pi, “Ampeu no pive keu kümtsü nino shini.” Eno Moses no timiqo tsa pesü Ampeu vilo pive. 9Ampeu no Moses vilo pi, “Julo, Ni ye khüngküsü kutho lono o lau cheni, tishianguno kughou I no o pütsani keno timiqo no chilu peni, eno alholo o pülülu penie.”

Kughou Moses no timiqo tsa pesü Ampeu vilo pi keno, 10Ampeu no Moses vilo pi, “Timiqo lau wulo eno ishi ngo thoghiu panoqo kishekimthe no pano phimini ishi kimtheve pelo, 11eno atsala aküthüu loye kutope ngo pelo. Kughengu atsala aküthüu lo timi kümtsü nhethe lono Ampeu no Sinai Naghuto lono iqighi nani. 12No ye timiqo ghenguno naghuto vehomxa lakükha süve no pilo, ‘Naghuto lo ikumo momu tipau shekichi dimoni ke kutokupui lo. Khukhumu naghuto dilu keu ye pithive nani. 13Khunomu pa bumoni, ikemu pa ye atu no veqhi pithiveni momu shexilika pesü kaqhiveni; timi shi aghina lhoxü shi aghi namu xümo nani.’ Kughou afuko sütsa kushuo küighani keno panongu no naghuto lo iqhoghini.” 14Ikehu Moses no naghuto lono iqive no timiqo kishekimthe; eno panongu no pano phimini ishive. 15Eno pa no timiqo vilo pi, “Atsala aküthüni ghenguno kutolulo; totimi phivilo wu kevilo.”

16Atsala aküthüni inaqhe tilehi tsütsüküsü ngo tsütsüpha ighi eno khüngküsü kutho no naghuto lo ikughive eno afuko ghügha ighono kije küigha, ikehu aghazü lo timi akeqo kümtsü no khokho shive. 17Tileno Moses no Alhou sasü kushoni ye aghazü lo timi akeqo kümtsü sasü ipeghi, eno panongu no naghuto philo puthugho ngoluve. 18Sinai Naghuto ye amchhi no küzüpho luve kughengu Ampeu no ami lono tipau shou ikughive ke. Tipau michhi no amiphokilo michhi toi phoiku, eno naghuto kupuju no shishe ithae. 19Eno afuko ghügha no alau eno alau kije shi ighauve kelo Moses no atsa pi, eno Ampeu no tsütsüküsü lono pa khochile. 20Ampeu no Sinai Toghi kütsüqa shou iqighi. Eno Ampeu no naghuto kütsüqa lo Moses ku puku, eno Moses no tilau ikuve.

21 Ampeu no Moses vilo pi, “Iqi no timiqo ghutu lo, tikumo aye panongu no Ampeu juniye shoxüsü ighi no kutomo pühave nosake. 22Achinemi khunoqo Ampeu kupunu ighini keno panongu ampi kishekimtheve pelo, tikumo aye Ampeu no panoqo ghimeve nosake.” 23Moses no Ampeu vilo pi, “Timiqo ye Sinai Naghuto lo ikughi lumo nani, kughengu No ampi no ningu ghutu ghi pike, ‘Naghuto vehomxa lakükha süve no tipau kishekimtheve lo.’” 24Eno Ampeu no pa vilo pi, “Iqilo, eno o gholo Aaron saiqhoghi lo. Ikemu achinemi ngo timiqo pelo shoxüsü Ampeu lau iqhoghipe kevilo, tikumo aye, Pa no panoqo shou aghime pephe nosake.” 25Ikehu Moses no timiqo lau iqi no panoqo vilo pive.

Currently Selected:

IPEKULU 19: SUMRVBSI

Highlight

Copy