IPEKULU 13

Anoghiu Ikhiphekütsü

1 Ampeu no Moses vilo pi, 2“Anoghimi kümtsü I lau ikhiphe tsülo. Israelmi dolo timi eno tüghashi kiu kiumu atita khaqhi tüghüu ye Iw ke.”

Kholaqhi Sümokeu Sho Ghulhu

3Tithiu Moses no timiqo vilo pi, “Ishi tsala lo nongu no Egypt lo aqüaxe ki lono ipeghi keu kümsülu chelo, kughengu au kumto vecheo Ampeu no hipa-a lono nongu saipeghi ke. Kholaqhi sükeu sho chumoni. 4Ishi, Abib qhi lono nongu ye ipe chenie. 5Ampeu no nongu sasü Canaanmi, Hittimi, Amorimi, Hivimi, eno Jebusimi yeghi, akichhizü ngo akhingozü no qowu akeu yeghi, khikhi Pa no nongu puasüqo tsünie pi tushoqhi püa keno, tile ighive kethiu, nongu ye hipa qhi lono tiqhetini hipau ikhiluni. 6Atsala tsüni nongu ye kholaqhi sümokeu sho chuni, eno atsala akütsüniu lono Ampeu lau aghulhu shini. 7Kholaqhi sümo keu sho atsala tsüni chuni, eno nongu ghakhu kümtsü lo kholaqhi kiumu ithulu kepu shimoni. 8Tipa tsalani nono o nu vilo pini, ‘Hi ye I no Egypt lono ipeghi kelo Ampeu no I lau kiu mlatsü keno tipau ghenguno ke.’ 9O u lo eno o kishe lo hipau no amchipu eno kümsümamo keu shi qhilo, tishianguno o kichi lo Ampeu yezah apenie. Kughengu Ampeu no au kumto pesü no Egypt lono o saipeghi ke. 10Tighenguno ampe atsütsü hipa tüqhüdo ighi kelo no ye akhuaye hipau peni.

11“Kughou Ampeu no o lau eno o puasüqo lau tushoqhi ketoi Canaanmi yeghi lo o saighi no ayeghi o tsüni keno, 12no ye atita khaqhi tüghüu thaqhü ikhi kütüta shipe Ampeu tsüni. Ow lhoxü piti tüghüu atsü thaqhü ye Ampeu ke. 13Khurha piti tüghüu theli lo ambe lakhi pesü qhüchileni, momu tsala nono qhüchile lumo aye, nono tipau kuo hechheve tsüni. Nongu nuli dolo kiptimi anoghiu ye qhüchile luveni. 14Eno hithiu o nu no o vilo, ‘Hi ye kiu kiqi kea?’ ipi ighiju aye, no ye pa vilo pilo, ‘Aküka kumto lono Ampeu no Egypt lo aqüaxe küxü lono ningu saipeghi ke. 15Kughengu kughou Pharaoh no kuthovive no ningu puwumo keno, Ampeu no Egypt yeghi lo anoghimi kümtsü heqhive tsü, lhoxü piti tüghüu ghi heqhive tsü. Tighenguno I no lhoxü piti tüghüu kümtsü Ampeu lau aghashive cheni, ikemu I nu anoghimi ye kümtsü I no qhüchile luve chenie.’ 16O u lo eno o kishe lo hipau pesü amchipu shi qhilo, kughengu aküka kumto vecheo Ampeu no Egypt lono ningu saipeghi ke.”

Khüngküsü ngo Ami Tsükucho

17Kughou Pharaoh no timiqo puwuve keno, Philistiami yeghi küdau no akughukhou shi akemu Alhou ye panoqo sasü tipa la wumoe. Kughengu Alhou no pi, “Kughou timiqo no aghükishi ithuluni keno, panongu ye amlo kilive no Egypt lo idewove nosae.” 18Ikemu Alhou no timiqo sasü asayeqha homxasü Akuhu Züghi küdau no wuke. Eno Israelmi ye aghükishi ghenguno aghili kutope Egypt yeghi lono iqhove. 19Moses no Joseph saghi pa gholono pesü wuve, kughengu Joseph no Israel nuliqo pelo ishi tushoqhi peke, “Mtsüqheino Alhou no nongu xuju nani, eno hile no nongu no I saghi pesü nongu gholono wuve nani.” 20Panongu no Succoth lono wuve no asayeqha kighije lo Etham lo aghazü shipe ngove. 21Ampeu no panongu la kiche tsüniye puchou no khüngküsü tsükucho shi panoqo züu wu, eno putho lono aküvü tsüniye ami tsükucho shi, tishianguno panoqo pelo tsüküvü lo eno tsüküzü lo ghi chewulu peniye ke. 22Puchou khüngküsü tsükucho eno putho lo ami tsükucho huye timiqo launo wuve moe.

Currently Selected:

IPEKULU 13: SUMRVBSI

Highlight

Copy