IPEKULU 10

Püsa Akütacheu: Tülhaqu

1Tithiu Ampeu no Moses vilo pi, “Pharaoh lau ilolo, kughengu I no pa ngo pa qemi mlo shikümkave tsüae, tishikeu lono panoqo lau Iw amchipu hipaqo piyeni, 2eno nongu pelo nongu nuli eno atilimi vilo I no kishi mkamihi Egyptmi peitha eno kiu michipu panoqo lau shitsü keno pi peniye, tishianguno nongu pelo Ni ye Ampeu kepi ithi peniye ke.”

3Ikehu Moses ngo Aaron pama no Pharaoh lau wuno pa vilo pi, “Ampeu, Hebrewmi Lhou no ishi piani, ‘No ye I zülo ado khitohi no ampi pesü aqhokigheu shini keu mili anani kea? Iw timiqo puwuvelo, tishianguno panoqo pelo I qelu pelo. 4Kughengu nono Iw timi puwuni keu milive aye, julo, I no thoghiu tülhaqu o ghakhu lo süghini, 5eno tipaqo no ayeghi nhachhive nani, tishikeu lono khunomu ayeghi ithumlave nani. Eno mürasü no kiu achili qhive keno tipaqo no chukhave nani, tipaqo no aluza lo thuipeghi akeu sübo külhü chukhave nani, 6eno tipaqo no o ki, o qemi ki eno Egyptmi kümtsü ki nhachhive nani, ti ye o puasü noqo no ayeghi lo ighike lono ishi kutolo khilemu ithumla aphi keu ke.’” Tishino pa ye Pharaoh launo tsüghüsü ipeve.

7Tithiu Pharaoh qemi no pa vilo pi, “Ado khitohi timi hipau pelo ningu kitime apeni kea? Timiqo puwuvelo, tishianguno pano pelo Ampeu pano Lhou huthulu pelo. Egypt ye kütsavae pi no ye vethamla aphi keshea?” 8Ikehu Moses ngo Aaron pama sasü Pharaoh lau ideighi. Eno pa no pi, “Wulo, Ampeu no Lhou huthulu lo. Ikemu khunoqo no wuni kea?” 9Moses no pi, “Ningu ye kichi-iti kümtsü sawu nani, ni tianuli, eno ni mbeloji ngo amishi loji kümtsü sawu nani, kughengu ningu ye Ampeu lau aghulhu shimasa nani ke.” 10Ikemu pa no pi, “Tsala I no nongu eno nonga kughunuqo puwuve aye, Ampeu no nongu gholo apeniu! Kughengu julo, nongu ye küsakügha kimji hami amlo lo anie. 11Moe! Nongu gholo kiptimiqo no wulo, eno Ampeu huthulo, kughengu nongu no khu akeu ye tipau ke.” Eno pama ye Pharaoh zülono hapheve.

12Tithiu Ampeu no Moses vilo pi, “Egypt yeghi shou tülhaqu ghenguno o u peqhelo, tishikeu lono tipaqo no Egypt yeghi shou ighive peni eno ayeghi hipau lo mürasü no achili qhive keqo sütsüni kümtsü külhü chukhave penie.” 13Ikehu Moses no pa küsü Egypt yeghi shou peqhe, eno tipani putho pucho kupuju Ampeu no kipela mülhü ayeghi tipau shou süghie. Kughou inaqhe shi keno, kipela mülhü no tülhaquqo süghive. 14Tülhaqu no Egypt yeghi kümtsü shou ighive eno Egypt ghakhu kümtsü lo ngove, titoi keu tülhaqu loji ye khilemu ighi mphi eno khilemu ighi kithemo nani. 15Tipaqo no ayeghi kümtsü nhachhive, ikehu tipa yeghi ye zümoive, eno ayeghi lo mürasü no achili shi qhive keu sütsüni eno axathibo kümtsü tipaqo no külhü chukhave. Egypt yeghi lo aluza lo asübo momu atsüni kiumu qhitsü move. 16Tileno Pharaoh no mtazü Moses ngo Aaron kuno pi, “Ampeu, nongu Lhou shou eno nongu shou I no axine shivae. 17Tighenguno, kimiyeno itehi I kipimi qhive tsülo, hi likhi ake, eno Ampeu nongu Lhou vilo I launo akithi hipau ikhive tsü penike inikhu tsülo.” 18Ikehu pa no Pharaoh launo ipeve no Ampeu lau inikhue. 19Ampeu no amülhü pesü ighono akümka kulola mülhü shivetsü, tino tülhaquqo fusasü Akuhu Züghi lo süve tsü. Egypt ghakhu kümtsü lo tülhaqu lakhimu kühave. 20Ikemu Ampeu no Pharaoh mlo shikümkave tsü, eno pa no Israelmi pelo wu pemoe.

Püsa Atokuu: Aküzü

21Tithiu Ampeu no Moses vilo pi, “Atsütsü küdau o u peqhelo, tishino aküzü pelo Egypt yeghi shou ighi penie.” 22Ikehu Moses no atsütsü küdau pa u peqhe, ikelo atsala küthü kutolo Egypt yeghi kümtsü lo aküzü kutho ighive. 23Panongu ye lakhi no lakhi ithumlave, eno atsala küthü kutolo milakhimu pa-a lono puthugho move, ikemu Israelmi ye panongu no khile akeno tile ye aküvü ae. 24Tithiu Pharaoh no Moses kuno pi, “Wuvelo, Ampeu qelo; no tianuli kughunuqo ghi nongu gholono wulu nani; nongu mbeloji ngo amishi lojiqo ye qhivelo.” 25Ikemu Moses no pi, “No ye ni pelo aghakishi ngo akipti kümllagho shilupe masae, tishianguno nino Ampeu ni Lhou lau aghakishi shinie. 26Ni tsü-aqu ghi ni gholono wu masae; apukhumtsü kupu lhoxü lakhimu qhimo nani, kughengu ni MPEU Alhou mllani ke ningu ye tipaqo ghi sawu nani, wo tomphi loye kiu lhoxü pesü Pa mlla nani keno ningu ye ithini chemoe.” 27Ikemu Ampeu no Pharaoh mlo shikümkave tsü, eno pa no panoqo pelo wu pemove. 28Tithiu Pharaoh no pi, “I launo wuvelo; I pelo khilemu itaghi o ju ithulupe kevilo, kughengu nono ni ithulu ke tsala lono no ye thiniae.” 29Moses no pi, “Nono pi ketoi, ni ye khilemu o gi ithulu kithemae.”

Currently Selected:

IPEKULU 10: SUMRVBSI

Highlight

Copy