APOSTOLMI 25
25
Paul no Caesar Qhüiniju
1Festus no aghakhu lo ighi keu atsala küthü thiu, pa no Caesarea lono Jerusalem lo iqho. 2Achinetomi ngo Jewmi akhotomi no Paul nguku keu lhephe no tsüikhomo pa qhüiniju, 3eno panongu pulou shitsü ghi Jerusalem lo Paul puqho tsülopi, kughengu panongu ye Paul no ala lo cheke lono pithive nike kuchughu ake. 4Festus no Paul ye Caesarea lo qhipüani, eno pa ampi no kighithe tilau wuniye anie pi khochileve. 5“Ikehu nongu gholo ampemi no I gholo ighi no timi huno kiuala pimi püaghi aye, pa shou akipimi tsülo,” ipi pa no pive.
6Panongu gholo atsala tache ngo chighi dolo ngove kethiu, pa ye Caesarea lo iqive. Thoghiu pa no küghaki lo iqa no Paul saghi lopi azah tsü. 7Kughou pa no ighi keno, Jerusalem lono Jewmi ighi keqo no pa sühope puthugho luve no thopi küha keu tsa pesü shishe pa nguku thuve. 8Paul no pa shokha keu tsa pi, “Jewmi Yezah na, achineki na, Caesar shou namu ni ye kiumu pimi püamoe.” 9Ikemu Festus no Jewmi pulou shitsü niye Paul vilo pi, “No ye Jerusalem lo iqho no tilau no hi o nguku akeqo pelo I zülono küghaju penishi anima?” 10Ikemu Paul no pi, “Ni ye Caesar küghaki zülo puthugho ani, eno tileno I shou küghatha tsü masae. No ampi no akivishi ithi aketoi ni ye Jewmi lau kiumu pimi püamoe. 11Tsala I no akumou kümlami shiaghi eno I kümla lhoksa ghenguno thive küzüpu shiaghi aye, ni ye akithi lono pojolu nike khuamoe. Ikemu panongu no I nguku akeu no kuchou kumo aye, khunomu I pesü panongu tsüve mlae. Ni ye Caesar launo xatha nike khuani.” 12Tileno Festus no paw hohomi sasü küptsave no khochile, “Nono Caesar launo xatha nike khuke toi Caesar lau wuniae.”
Agrippa ngo Bernice Zülo
13Atsala hami thiu, akükau Agrippa ngo Bernice pama Caesarea lo ighi no Festus sasü kusholu. 14Pama no atsala kutomo ngo akehu Festus no akükau zülo Paul tsakükügha vehu pesü pi, “Hile timi lakhi Felix no akughu shipüaghi keu ani. 15Kughou I no Jerusalem lo wu keno, Jewmi gholo achinetomi ngo kichimi no pa nguku akeu vehu pesü I lau ighi, eno I vilo pa shou aghime küghatha tsülopi qhüiniju. 16Ikemu Rommi khuaye lo timi khuu nguku ani keno, pa no pa nguku akeqo sasü kinheqhe kusho no kiu ghenguno pa nguku ani keno pa shokhalu moke loye kütami u lo süve tsümlae pi I no panongu khochileve. 17Ikehu kughou panongu no kümtsa hile ighi keno, ni ye ado süpushu tsümoe, ikemu thoghiu ye küghaki lo ngono timi hu sailoghi lopi azah tsüe. 18Kughou pa nguku akeqo no puthugho keno, panongu ye I no kümsü aketoi nguku keu alhoksa süghimoe. 19Ikemu panongu no pano chineye eno timi lakhi Jisü, khuu thive kemu Paul no xüani pi keno, tipaqo vehu lono pa sasü kimpie. 20Hipaqo vehu lo kishi phujumo kelauno, I no Paul vilo Jerusalem lo iqho no pa nguku akeu tilau no küghatha nima pi ighiju. 21Ikemu Paul no akükau xakütha lunike ghenguno pa küghape püaghi tsülo pive kelo, I no pa pesü Caesar lau puwu moke kutolo, püaghini keu za tsüvae.” 22Agrippa no Festus vilo pi, “Ni ampi no timi hipau tsa chiluni shi ani.” Festus no pi, “Nono thoghiu no chilu nani.”
23Ikehu thoghiu Agrippa ngo Bernice pama no qhivütsünyi ghüshitomi ngo aphughi lo akhotomi no sasü mishi kilo iloghi. Eno Festus zakütsü lono Paul sailoghi. 24Festus no pi, “Akükau Agrippa eno hile khije ani keno, nongu no timi hipau ithulu ani, pa ghenguno Jerusalem lo Jewmi eno hile akemi kümtsü no I lau muchho ighi no ighamku pa ye xüape kepu kumoe pike. 25Ikemu I no phulu keu no pa ye thive küzüpu kiumu shi püamoe. Eno pa ampi no akükau lau qhüiniju ketoi ni ye pa puwuve nike xathavae. 26Ikemu ni ye I mpeu lau pa vehu mtsümishei pilu kepu kiumu kühae. Tigheno I no pa sasü nongu zülo, eno akhotoshi Akükau Agrippa zülo saghi ani, tishianguno ningu no akivishi pa phuju kelo, ni ye kiuala yekulupu shinani. 27Kughengu akughumi lakhi shou kiu ghenguno atsa kügha ani keno mtsüqhei mono puwuni keu ye achipi kumoe.”
Currently Selected:
APOSTOLMI 25: SUMRVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
