TENYARTEM MAPA 25
25
Pauli Kaisar Dangi Obendangtsü O Abenba
1Kodang Festai iba lima atong, anogo asem lir külen pai Kaisaria nungi Yirusalemi atu. 2Puti-ungertem aser Yihuda nunger tongtibang nisungtemi pa dang Paul anema o metetdaktsü, 3aser Paul Yirusalemi jar arutsü parnoki pa dang mepishia meshizük, kechiyong lenmang nung pa tepsettsü parnoki tasa renema liasü. 4Aji saka Festai langzü, “Paul Kaisaria nung puoka lir aser kobi meli-i nia ilenjagi aotsü. 5Nenok tanishirtem kü den külemi Kaisaria tonga arudakjang, aser Paul dakji langka tai lira, parnoki pa anema taitsüba bener arudakjang.”
6Festai parnok den anogo ti mesüra ter munger külen, pai Kaisariai alu. Tananü pai obendangdak amen aser Paul anir arutsü ozüng agütsü. 7Aser kodang pa aru Yirusalem nungi aluba Yihuda nungertemi pa meketa noktaker ochi ta sayutsü makokba otem aika pa anema bener aru. 8Idangji Pauli pei temeten o yamai ashi, “Yihuda nungertem ozüng anema süshia, tenla ki anema süshia, mesüra Kaisar anema süshia ni tai kecha memena.” 9Saka Festai Yihuda nungertem peladaktsünüa Paul dang langzü, “Yirusalemi tur idakji kü madang item o bendangdaktsütsü nai mulunger asü?” 10Pauli ashi, “Kaisar chubatiba obendangdak, kong kü o bendangtsü tim, iba matsüngdang ni noktaka lir. 11Anungji ni tai benshir ka sürabang, aser tasütsü temsüa langka danga inyaka lirabang, ni mesüli ta mashitsü. Saka parnoki kechisünung ni aitsür, itemji ka danga ochi mesüra shingaia parnok teka nung ni bendanga magütsütet. Ni Kaisar tonga jembitsü.” 12Idangji Festai pa den teyaritepertem den jembiteper külen yamai langzü, “Nai Kaisar tonga or jembitsü ta shiogo, anungji yamaji na Kaisar tonga aotsüla.”
Paul Agripa Aser Bernika Madang
13Anogo ishika süir külen Agripa chuba aser Bernikai Festa pelashishia agizüktsü asoshi Kaisariai aru. 14Parnok idakji anogo aika amungdang Festai chuba madangji Paul indang o shisema ashi, “Feliki yangi nisung ka tepuokdak toktsür ao. 15Ni Yirusalem nung alidang, puti-ungertem aser tamburtemi kü dangi pa anema o bendangtsü asüngdang. 16Taitsübatem den tejak o tejak na ajurutepa metpuri pa anema aitsüba o indang temetenba o jembitsü mapang tajung magütsü tashi, nisung shinga bendanga agütsütsü Rom nunger yimsü dak maket ta ni parnok dang langzü.
17“Anungji kodang parnok yangi sentep, ni memenui tasüngjisa ni obendangdak amen aser nisungbaji anir aittsü ozüng agütsü. 18Saka pa aitsürtemi ni bilema aliba ama mesüi pa anema o kecha parnoki bener marutet. 19Saka parnok pei yimsü indang o kar ashishitepa aser nisung ka Yisu shiba süogo, saka taküm lir ta ashir, ibala indang dang liasü. 20Aser item o indang ni kechi koda o bushitsü ratamata-a liasü aser pai Yirusalemi tua idakji item o bendangtsü mulunger asü masü ta asüngdang. 21Saka Pauli chubatiba obendangba tonga oa jembitsü ta ashi nung, ni pa Kaisar dangi meyok tashi pa tepuokdak yua atatsü ozüng agütsü.” 22Aser Agripai Festa dang ashi, “Nia iba nisungba oji angadangnür.” Festai langzü, “Asüng nai pa o angashitsü.”
23Anungji tasüngji Agripa aser Bernika kanga sentsüwangshia aru, aser parnoki meyi madak tanishir aser yimti nung tongtibang nisungtem den o angadak taktangi ait, aser Festai ozüng agi Paul anir aitdaktsü. 24Festai ashi, “Oh Agripa chuba, aser yangi onok den densema aliba nisungtem, Yirusalem nung aser yangia Yihuda nunger telok ajaki pa joko taküm melidaktsütsüla ta ayimtena kü dangi shiba anema o aben iba nisungji nenoki angur. 25Ni ajitetba agibo tasütsüsa pai kecha meinyak, saka pai pa sasa chubatiba tonga oa jembitsü ta ashi nung ni pa yoktsü lemtet. 26Saka pa indang kü kibur dang ni tim o kechianga mezülur. Anungji nai atitanger külen ni pa indang langka zülutsü akatsüsa ne dangi anir aru. 27Kechiaser tepuokdak alir ka pa anema taitsüba kecha magütsüi yoktsübaji shisa maka ta ni bilemer.”
Currently Selected:
TENYARTEM MAPA 25: ANSEBSI
Highlight
Share
Compare
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
