TENYARTEM MAPA 20
20
Paul Makedonia Aser Grik Linüki Aoba
1Efesa nung rongrongji anener külen, Pauli nütsüngtem tajai yok aser pai parnok dang tajungshi, aser tepila o ashi aser pa Makedonia leni ao. 2Pai item linüktemji ajanga süi aser parnok nem tajungshi o aika agütsür külen, pai Grik limai aru, 3kong pai ita asem tashi amung. Kodang pai Siriai rong nung odi ta bilema liasü, Yihuda nungertemi pa anema tasa ka asaba pai lazük; anungji pai Makedonia ajanga aotsü mulungtet. 4Berea nunger Pira chir Sopater, Tesalonika nunger Aristarka aser Sekunda, Derbe nunger Gaya, Timoti, Asia nunger Tukika aser Trofima, parnok ajak Asia tashi pa sülen anitak. 5Parnok jelia oa Troa nung onok ata-a liasü. 6Piyazü Meinokba Benjong süir külen, onoki Filipi nungi rong nung ao, aser anogo pungunü nung onoki parnok dangi Troai aru, idakji onoki anogo tenetnü amung.
Pauli Troa Tatemsa Semdangba
7Deobarnü onok amtsük sangsatsü külemi sentepa alidang, Pauli asüngji pilatsü bilema, parnok dang o jembia kuli asü aser pa o jembibaji ayatrem tashi manen. 8Aser onok külemi sentepdak temaba taktang nungji milen aika liasü. 9Idakji asangur ka tenüng agi Eutika, kichiba nung mener kanga anünüa, aser Pauli talangka o atsülanga odaka nung pa amua oadok. Pa amua oadoker taktang asembuba nungi tsük aser tasü dang bener atu. 10Idangji Pauli alu aser pa dak azüit aser ashi, “Nenok temulung tatem ma, kechiaser pa dak ano taküm lir.” 11Aji shir külen pai meyipa atu aser amtsük sangsa aser achi. Aser ammang tepiyong oda anepdang anü adok tashi pai parnok den jembir külen pai parnok nungi pila. 12Parnoki tanurbaji taküm anir aru aser parnok kanga dang sünepa aküm.
Troa Nungi Miletai Aoba
13Idangji onoki rong jagi jelia ia, Asiai aotsü apuso aser idakji Paul anioktsü bilem, kechiyong pa tetsüng lenmangi aotsü yamaji pai renema liasü. 14Kodang pai onok Aso nung ajuru, onoki pa aniok aser Miteleni aru. 15Idak nungjagi rong nung oa asüngji Kios anasa atong aser ano tananüji Samos-i arua anogo ka süir külen onoki Miletai aru. 16Kechiyong Asia nung mapang meindoktsüsa Pauli Efesa meria rong nung aotsü mulungteter liasü. Takoktsü süra, Tenemnü Benjong nungji Yirusalem nung alitsüsa pai ilunga liasü.
Efesa Tamburtem Den Pauli Tepila O Jembir
17Saka Mileta nungi Pauli pa dangi arogo tamburtem tajai Efesai yok. 18Kodang parnok pa dangi aru pai parnok dang ashi, “Ni Asia nung kü tsüng ajemokba mezüngnü nungi kodasa liasü nenoki metet, 19aser kanga ajemalu den, nüktzü ayimba den aser Yihuda nunger tasa ajanga kü dangi timtem aruba den, kodasa ni Kibuba tenzük nenoki nenok sasa metet. 20Nenok asoshi kechisa tajangzük liasü aji nenok dang sangoktsütsü ni kodanga menungnangi liasü, aser yimjak nung aser kibok nung ni nenok dang sayua liasü 21Tsüngrem dangi temulung meyiptsü aser asen Kibuba Yisu Khrista dak amangtsü asoshi Yihuda nungertem aser Grik nungertem telok anaprongla dang ni kuli agüja liasü, ajia nenoki metet. 22Tang ajiang, kü dak kechi ataloktsü aji memeteti Tanelai anungba agi Yirusalemi aor. 23Saka talenba aser rishikangshiba agi ni atadagi ta Tanela Temeshi-i yimti shia nung kü dang kuli agütsür ta ni metet. 24Saka ni kü alizüng tongtettsü asoshi aser Tsüngrem taochi Osangtajung indang kuli agütsütsü ni Kibuba Yisu nungi tenzüktsü agizükba renemtsü asoshi inyaker. Ni kü takümji kü sasa senti ta sükshia mali.
25“Aser tang ajiang, nenok shir rongnung Tsüngrem Yimli indang ni sayutsüngia senzü, nenok ajaki joko kü tejak mangutsü ta ni metet. 26Anungji nenok rongnung kar tanela tesamadaki orabang aji kü khu masü ta ni tanü nenok dang kuli asür. 27Kechiaser ni Tsüngremer shisatsü ajak indang nenok dang menungnangi dang sangokja aruogo. 28Kibubai pei zü agi alizükba arogo mesütsü asoshi, kechi nung Tanela Temeshi-i nenok sannükertem asütsü shimtet: iba san telok aser nenok pei taküm asoshi kümdangang. 29Ni oadoker külen tesashi tzünütem nenok dangi aittsü aser parnoki san telokji meirutsüiang metoktsütsü ta ni metet. 30Aser tiyazü o jembir nisung kar nenok rongnungisa adoktsü aser parnoki nütsüngtem mashileni anir aotsü mapang arutsü. 31Aji asünung küm asem tashi nenok nisung shia dang nüktzü yima ammang sangwa metitemi ni sayua liasü ta bilemteta nenoki kümdanga liang.
32“Tsüngrem aser pa taochi o koba temeshitetba pur rongnung nenok nem senmang agütsütsü aser nenok indaktsütsü, iba madang tang ni nenok nungloka yutsür. 33Ni nisung shinga meyong taribi, hon mesüra sobutsü menükshi. 34Item teka yagi kü den alirtem asoshi aser kü nüngdaktem asoshi tenzüka aruogo ta nenoki nenok sasa metet. 35Yamaji inyaka nenoki tashi maiter dang yaritsü, aser Kibuba Yisui ashiba otem bilemtettsü, kechiyong Kibubai yamai ashir, ‘Tagizükba dang nungibo tagütsübaji tali temoatsüba lir.’ Iba tatishitsüji nenok dang teti sayua liasü.”
36Yamaji jembir külen pai apudak aser parnok ajak den sarasadem. 37Idangji parnok ajaki kanga jebtepa liasü; aser parnoki pa dak azüit aser tebang mesep, 38aser parnoki pa jak tanaben mangutsü ta ashiba nungji talisa parnok temulung shiranga liasü. Aser parnoki pa rong tashi meinoktsü.
Currently Selected:
TENYARTEM MAPA 20: ANSEBSI
Highlight
Share
Compare
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
