TENYARTEM MAPA 16
16
Timoti-i Paul Aser Sila Sülen Anitakba
1Pauli Derbe-i aser Lustrai aru, kong tamanger ka tenüng agi Timoti idakji liasü. Pa tetsüji Yihudatsür tamanger ka, saka pa tebubo Grik nunger liasü. 2Pa indang Lustra aser Ikonia nung aliba adianutemi kuli junga sütetba nübu ka liasü. 3Pauli Timoti pa den anir onü, anungji pai Timoti mejeptoktsü, kechiyong parnok aotsüba tesem nungji Yihuda nunger aika liasü aser parnok ajaki Timoti tebuji Grik nunger ta meteta liasü. 4Aser parnok yimtitem ajanga aodang, Yirusalem nung alir tenyartem aser tamburtemi melaba tesayubatem amshitsü asoshi parnok nem amoktsü. 5Anungji arogotem tamang nung tashi itshia aküm aser kenüamati yongsük nung renlok.
Makedonia Atema Pauli Mangdang Anguba
6Parnoki Frugia aser Galatia temeket ajanga ao aser Asia nung oji mejembitsü Tanela Temeshi-i parnok noktang. 7Parnoki Misia arrtsü tonga arur, Bithuniai aotsü merang, saka Yisu Tanelai parnok dang memela. 8Anungji parnoki Misia meria or Troai alu. 9Aser aonung Paul dangi mangdang ka adok. Makedonia nunger nisung ka noktaka pa dang mepishia ashi, “Makedoniai arung aser onok yariangma.” 10Anungji Pauli mangdangji nguli idangyongjisa Tsüngremi onok Osangtajung sayutsüngitsü ajar ta angateta, onoki Makedoniai aotsü takok tashi merang.
Filipi Nung Lidia Temulung Meyipba
11Onoki Troa nungi apusoa rong nung ao aser indang indanga onoki Samotrakai aru aser tasüngji Niapoli atong. 12Aser idak nungjagi Makedonia lima nung Rom nunger yimti tulutiba#16.12: Akhi Laishiba kar nung ‘Makedonia nung mezüngbuba yimti’ ta angutsü. Onoki anogo ishika idakji amung. 13Amungnü ayongküm ka nung sarasademdak tesem ka lir ta onoki angashia, onoki yimti süngkhüm atena ao, aser idakji külemi sentepa aliba tetsürtem den Kibuba O jembi. 14Tiatira yimti nungi nakrema meremba sü ayoker ka, Tsüngrem külemba tetsür, tenüng agi Lidiai onok dang anga; kechiaser Pauli jembiba o angadaktsütsü Kibubai la mulung lapoktsü. 15Kodang la aser lar kinunger baptitsü, lai onok dang mepishia ashi, “Nenoki ni Kibuba dangji temulung lemteter ta ajitetra, kü kidangi atua liang.” Aser lai onok la den anir ao.
Filipi Tepuokdak
16Kenü anogo onok sarasademdaki oya alidang, temenen tanela ain aketba kilitsür kati onok ajuru, shibai ain mapa inyakba ajanga lar kibur nem tajangzük aika bener arutsü. 17Lai Paul aser onok sülen anitak aser ayimtena ashi “Item nisung Tematiba Tsüngrem tenzüker lir. Parnoki nenok dang tekümtet lenmang sayutsüngir.” 18Lai yamaji ainü dang inyak. Saka Pauli lakteta aküm, aser meyiper tanela dangji ashi, “Yisu Khrista tenüng nung la dak nungi adoktsü ni ne dang ozüng agütsür,” aser idangyongjisa ibaji la dak nungi adok.
19Saka kodang la kiburtemi parnok tajangzük angutsü lenmang mali ta ajitet, parnoki Paul aser Sila apu aser watidaki yimsüsürtem madangi parnok atsür ao. 20Parnok obendangertem dangi anir arur külen parnoki ashi, “Itemi Yihuda nisungtem lir aser parnoki yimti nung rongrongdaktsür, 21aser koba yimsü asenok Rom nungeri amshitsü mesüra inyaktsü tim masü, itemji parnoki sayur.” 22Telok jagi parnok anema külemi noktak aser bendangertemi parnok sü shizükja parnok dak merang ajok agi azüktsü ozüng agütsü. 23Parnoki aiben züker külen parnok tepuokdak ayu; aser tepuokertem dang parnok jungjunga anüktsü ozüng agütsü. 24Parnoki ozüng aji oda agütsür külen tepuokdak telungba nung parnok puok aser parnok tetsüng tsüngden chiok.
25Saka ayatrem nung Paul aser Sila Tsüngrem dang sarasademya aser pa nüngsang ken tenya liasü, aser tepuokdak alirtemi parnok dang angaya liasü. 26Aoksa-a menoknok tulu ka anok aser tepuokdak kimung ajak anokshi. Kishi ajak idangyongji lapokadok aser tepuokdak aliba nisungtem tsüngden yinzütem aser merangsen saladok. 27Tepuoker tanüksang mejanga aliba sak, aser kodang kishitem lapoka angu, pai pei noklang nok atsüteter pei sasa tetepseter dang liasü, kechiaser pai tepuokdak alir ajak jena ogo ta bilem. 28Saka Pauli ola tulu agi ayimtena ashi, “Ne sasa kecha tamajung tebenshi kechiyong onok yangi lir” 29Tepuoker jagi milen bener arutsü asoshi ashi aser asemjena ait. Pai tetsübu nung atentena Paul o Sila na madang apudak. 30Parnok anizüker pai ashi, “Tamarenertem, Kümzüktsü asoshi ni kechi inyaktsü tim?” 31Parnoki ashi, “Kibuba Yisu Khrista dak amangang, aser na aser ner kibong kümzüktsü.” 32Aser parnoki pa aser par kidang alir ajak dang Kibuba O jembi. 33Aonung idangjisa pai parnok tepuokdak nungi anizüka zübutem shitoktsü. Idangji pa aser par kibong ajonga baptitsü. 34Pai par kidangi Paul aser Sila anir tua parnok madang chiyungtsü yutsü aser pai par kinunger ajak den pelatep, kechiaser pa Tsüngrem dak amanger ka aküm.
35Saka kodang anepdang aküm, obendangertemi sosangtem yoka ashi, “Nisungtem to chiokang.” 36Aser tepuokeri item o Paul dang metetdakja ashi, “Nenok chioktsü obendangertemi temelaba ozüng bener yokogo. Anungji tang adokang aser tesünep nung oang.”
37Saka Pauli parnok dang ashi, “Onok shir Rom senso lir, onok dak tai kecha majiteti parnoki yimjak nung onok dak züka merenshi, aser onok tepuokdak ayu. Aser tang parnoki onok miima chioknür? Yamaji kodanga masü! Saka parnok yangi tonga arudakjang aser parnok sasa onok anitetdakjang.” 38Idangji item o sosangtemi obendangertem nem agütsü aser parnok Rom sensotem ta angazüka parnoki tsübu.
39Anungji parnoki arua parnok dang tai nangzük, aser parnoki parnok aniteter külen, yimtiji toktsür oang ta parnok dang asüngdang. 40Idangji Paul aser Sila tenati tepuodak nungi tugua Lidiar kidangi atu; aser idakji parnoki tamangertem ajurua parnok dang tajungshi o jembi aser pila-a ao.
Currently Selected:
TENYARTEM MAPA 16: ANSEBSI
Highlight
Share
Compare
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
