RAWMA 5
5
Khazohpa nata aryhna
1Chavâta ngiapâna vâta thai eima châ ha tawhta cha, eima Beipa Zisu Krista zawhzi ta Khazohpa nata a ryhpa ta eima y haw. 2Ano vâ lilaw ta tahmâ ta eimâ duana ngiachhiena liana heta ngiapâna ta a ngia ha pi ta, Khazohpa rônahna hnabeiseihpa ta a lypa ta eima y. 3Cha dei châ vei, eima rietheina liata chhao a lypa ta eima y. Rietheina ta tiamana tao ta, 4tiamana ta hrozie phapa tao ta, hrozie phapa ta hnabeiseihna a tao tahpa eima pahno. 5Thlahpa Pathaihpa miah a piepa khata Khazohpa kyhpachâna eima pathipalôh liata a hry hapa vâta, cha hnabeiseihna chata maophyuhpa ta miah paysa vei.
6Eima chiehlei nona khata, Krista cha moleipazy vyuhpa ta a daihtita liata thi ha ta. 7Chyhsa siapa châta thi awpa cha chyhsa ta khoh kaw hlei aw vei; chyhsa phapa châta deikua cha, a thi ngâhpa ama y ngyu ma. 8Châhrasala Khazohpa ta a kyhpachâna cha keimo châta vaw paluahsa ta, moleipazy eima châ nota, Krista cha eima châta thi ha ta. 9Chavâta tahmâ a thisaih ta thai pachâsapa eima châ tawhta chhochhi cha, ano vâta Khazohpa hiehâhna tawhta pachhapa ta eima y via pachai aw. 10Khakhaipa eima châ nota hmahta, a Sawchapawpa thina vâta Khazohpa nata a ryhpa ta eima y khiahta cha, tahmâ eimâ ryh ha tawh chhochhi cha, a hrona vâta pachhapa ta eima y via pachai aw. 11Cha dei châ vei, tahmâ aryhna miah a pahmôsatuhpa eima Beipa Zisu Krista vâta Khazohpa liata eimâ ly.
Âdâh liata thina nata Krista liata hrona
12 #
Âtn 3.6
Chyhsa pakha vâta moleina khizaw liata a ngia ta, moleina vâta thina a ngia ta, cha hawhna chata, chyhsa zydua ta hmo ama paraopa vâta, thina ta chyhsa zydua cha a chahryh haw. 13Ryhpa y hlâta khizaw liata moleina y ha ta, ryhpa a y vei khiahta cha, moleina cha moleina ta pachâpa châ vei. 14Châhrasala Âdâh daihti tawhta Mawsi daihti taihta, Âdâh paraona hawhta hmo a parao leipazy chô liata chhao, thina chata ryu a reih lymâ. Âdâh cha a vy awpa pakhona a châ.
15Châhrasala hmosaipiepa cha moleina nata a lyu vei. Chyhsa pakha moleina vâta hmahta chyhsa hluhpi ama thi khiahta cha, Khazohpa ngiachhiena nata chyhsa pakha, Zisu Krista ngiachhiena hmosaipiepa chhochhi cha, chyhsa hluhpi chô liata vaoheipa ta a y tlai aw. 16Hmosaipiepa cha chyhsa pakha moleina vâta hmo a vaw ypa nata a lyu vei. Thailei pachâsana pachiana cha chyhsa pakha vâta vaw y ta, thai pachâsana hmosaipiepa deikua cha, moleina hluhpi vâta tlao a vaw ypa a châ. 17Chyhsa pakha moleina vâta, cha chyhsa pakha vâta hmahta thina ta ryu a reih khiahta cha, chyhsa pakha, Zisu Krista vâta ngiachhiena hluh ngaitapa nata siana hmosaipiepa a daotuhpazy chhochhi ta cha, hrona liata ryu ama reih tlai aw.
18Moleina miakha vâta chyhsa zydua thailei pachâsapa ama châpa hawhta, siana hmotaopa miakha vâta chyhsa zydua thai pachâsapa châ ei ta, hrona ama hnei. 19Chyhsa pakha reingiah leina vâta chyhsa hluhpi moleipa ama châ hapa hawhta, chyhsa pakha reingiahna vâta chyhsa hluhpi mosiapa ama châ aw. 20Moleina pôh nawpa ta ryhpa vaw y ta, châhrasala moleina a pôhna lia maihta ngiachhiena a pôh via rili. 21Moleina chata thina ta ryureih ta, ngiachhiena deikua cha, eima Beipa Zisu Krista zawhzi ta chhâzaw hrona a tlôkheipa siana ryureina a châ.
Currently Selected:
RAWMA 5: MARVBSI
Highlight
Share
Compare
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
