ISAI 18
18
Kusi kyh chhochhieliena
1 #
Zep 2.12
Mathlaw a chakhyhpazy#18.1 He liata “Mathlaw a chakhyhpazy pahrâna râh” he khawsu hluhna râh reina a châ. pahrâna râh,
Kusi chavah kiahzy liata a ypa râh cha,
A hu a po na!
2Ti chô liata lohthi balyhzy hmâpa ta,
Lyuhchâpazy a tuah tyhpa râh cha,
A hu a po na!
Hy lyuhchâpa chatlie chakohpazy saih u,
Chyhsa doh sâhpa nata mitlaohpa pahrâna râh lâ sie u la,
Lâhnia lâhla ta ama chipa phopi lâ sie teh u.
Râh thatlôpa nata pahnietuhpa râh lâ cha sie u la,
Chavahzy ta ama râh a pachhaihpa lâ cha sie teh u.
3Khizaw chyhsa zydua saih u,
Alei chô liata a pahrâpa zydua saih u,
Tlâhpizy liata ngiana poh ama chaluah tita moh u la,
Chiahmie ama tô tita nathlie muh vy!
4 Abeipa ta ei hnohta hetana heta a tah:
“Noh sa nota noh lopa hawhta,
Ei pahrâna su tawhta a chalihpa ta sai aw na ta,
Sâh hria noh lo nota avâ meihdo hawhta,
A chalihpa ta ei sai thlâh ha aw.”
5Kre zôh a paw pawh ta,
A paw tawhta a thei a pabyuhpa hmoh pathao ta,
Châhrasala kre thei lyu daihti a tlôh hlâta,
Abeipa ta tâkô ta kre chhyhzy chhawh pathlah aw ta,
A chiah a zawhpazy thlâ aw ta a pathla khai ha aw.
6Kre zôh zydua cha tlâh pavaw rikawhpazy châta siesaipa châ aw ei ta,
Lei sahrâhpazy châta siesaipa ama châ aw.
Cha liana cha pahmôhzy ta nopi daihti hmâh tyh aw ei ta,
Lei sahrâhpa zydua ta chasipaw daihti ama hmâh tyh aw.
7Cha daihti liata,
Phopi doh sâhpa nata mitlaohpa,
Lâhnia lâhla ta ama chipa phopi,
Râh thatlôpa nata pahnietuhpa,
Chavahzy ta ama râh a pachhaihpa tawhta,
Pheisaihzy Abeipa lâ kuhria vaw cheih aw ei ta,
Pheisaihzy Abeipa moh yna su,
Zaio Tlâh lâ kuhria ama vaw cheih aw.
Currently Selected:
ISAI 18: MARVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
