ISAI 10
10
Tlybaituhpazy hupona
1Dâh hiehneipa a taotuhpazy nata
Tlybaina bieraopa a papuatuhpazy cha,
Ama hu a po na!
2Phahlapazy adona hny ei ta,
Ei phopi dyhchhiepazy pikhei tovyuh ama chhu tyh.
Nôhmeizy cha ama hraona sôh ta tao ei ta,
Paw hnei leipazy chhao ama tai awpa sa ta ama tao tyh.
3Lâhlapi tawhta chhiena vaw tlôna noh,
Hriena noh liata khâpa ma nama tao aw?
Baona hia awpa ta ahy lâ namâ râ aw?
Khataih liata ma nama sôh nata thih nama siesai aw?
4Atâhpazy hry liata a chakuhpazy tah leipa ta cha,
Ahy hmahta pahlôhpa châ leipa aw ei ta,
Thiepazy hry liata a paopazy tah leipa ta cha,
Ahy hmahta pahlôhpa châ aw veih ei.
Cha zydua cha a tao hapa chhao ta,
A hiehâhna pai to leipa ta,
A ku a hy ngâ thlâh ha chy.
 palaina vâta Asuria hriena
5 #
Isai 14.24-27; Nâh 1.1—3.19; Zep 2.13-15 Asuria cha a hu a po na!
Ano cha ei pathiiana sômasi châ ta,
A ku liata ei hiehâhna chôchahrei a y.
6Hraona sôh lapa ta,
Ama hneipazy chhu ta,
Khiliah chiatlao hawhta tlypâ awpa ta,
Ano cha Khazohpa a pachâ leipa phopi lâ tuah na ta,
Ei hie nâ pahâhpa phopi a dyuh awpa ta bie ei pie.
7Châhrasala Asuria ta,
Cha hawhta tao a chhuah leipa ta;
A palôh ta pachâ hra vei.
Pahleipadia khai awpa palôh tlao hnei ta,
Phopi chyhta dei châ leipa ta,
Phopi hluhpi pahleipadia awpa palôh a hnei.
8Asuria ta, “Ei pheisaih hyutuhpa zydua cha,
Abei sai châ veih ei ma?
9Kânô khihpi kha Kâkhemi khihpi hawhta châ vei ma?
Hâmathi khihpi kha Apâ khihpi hawhta châ vei ma?
Samâri khihpi chhao kha Dâmaskâ khihpi hawhta châ vei ma?
10Ei ku ta nothlahpa abeinarâhzy tlô ha ta,
Zerusale liata nothlahpazy hlâta rônah via ei ta,
Samâri liata nothlahpazy hlâta ama rônah via.
11Samâri nata a khazoh nothlahpazy chô liata ei taopa hawhta,
Zerusale nata a khazoh nothlahpazy chô liata chhao,
Tao hra aw va na ma?” tah ta.
12Chatawhcha hetana heta a vaw châ aw. Abeipa ta Zaio Tlâh nata Zerusale chô liata a raihria zydua a paloh tita, Asuria bei cha a palôh laina bie nata a mo â pasâhsana vâta a hrie aw. 13Asuria bei ta,
“Hezy he ei ku thatlôna ta tao na ta,
Novâhna a hneipa ei châpa vâta,
Ei sona ta ei taopa a châ.
Phopizy râhrizy pasiepa ta,
Ama ryusôhpazy hrao na ta;
Beidyuchhai liata a tyuhpazy chhao,
Viahchao tôhpa hawhta ei daophi pathlah ha ei.
14Phopizy sôh nata thihzy cha,
Pavaw bu lapa hawhta ei ku ta la ta;
A panô thyusaipa pavaw tihzy lapa hawhta,
Râh zydua ei la khai haw.
Mathlaw a chakhyhpa y khao leipa ei ta,
A pakah a âpa y khao hra leipa ei ta,
A sâhpa chhao y khao veih ei,” tah ta.
15Ahrei ta a hmâhtuhpa hmia liata â reithai aw ma?
Thoâna ta a hmâhtuhpa â palai thlu aw ma?
Sômasi ta a chabatuhpa chalo â chhuahpa lyu ta,
Chôchahrei ta a chhytuhpa a chhy â chhuahpa a lyu.
16Chavâta Pheisaihzy Abeipa Zehôvâh ta,
Asuria bei pasaipha thatlôpazy chô liata chaohna hri a patlôsa aw;
 papiparysana ry liata mei patipa châ aw ta,
Meipaleih ta a kâ khai aw.
17Izarei khaihna cha mei châ aw ta,
A Mo Pathaihpa cha mei palei a châ aw;
Chatanachata a diahsai nata ahlohzy cha,
Noh kha ta a kâ patlô khai aw.
18A râhmâhpa rônahna nata a kôvei phana râh zy cha,
Abeipa ta tlokhuh pahleipadia khai aw ta,
Tlâhleipa panao ta a chhâ laihpa hawhta a châ aw.
19A râhmâhpa liata tho a chyhta dei y bâ aw ta,
Hawtipa hmahta a reih khai thei aw.
Izarei laibâhpazy ama vaw kua aw
20Cha noh liata, Izarei laibâhpazy nata Zakaw pathla a hrohpazy cha, âmo a thietuhpa liata a pahnieh khao leipa aw ei ta, Abeipa Izarei Mo Pathaihpa liata tlao a pahnieh aw ei ta, biehmeiseihpa liata amâ pahnie bâ aw. 21Laibâhpazy vaw kua aw ei ta, Zakaw laibâhpazy cha Khazohpa thatlôpa lâ ama kua heih aw. 22#Rma 9.27Hy Izarei, na phopi cha tilaipi sadi tlu ta hluh hra ei sala, laibâhpazy deita ama vaw kua aw. Raona bie papua hapa châ ta, adona a khô pathlah. 23Alei chô zydua liata raona a tlô awpa kyh bieraopa cha, Pheisaihzy Abeipa Zehôvâh ta a patlôsa hai.
24Chavâta Pheisaihzy Abeipa Zehôvâh ta hetana heta a tah: “Hy ei phopi, Zaio liata a pahrâpa y, Izi mo taozie hawhta, Asuria ta sômasi ta cha chheipa ta, a chôchahrei cha hy thlu hra sala, Asuria cha chi khah y. 25Bohpi leipa liata ei pathiiana pai aw ta, ei hiehâhna cha âmo pahleipadiana lâ â heih bâ aw. 26Ôrebâ lôpanô liata Midia a thie no hawhna khata, Pheisaihzy Abeipa ta Asuria cha chheina savo ri ta a chhei aw. Izi râh liata a chaluahpa hawhna khata, tilaipi chô liata a chôchahrei a chaluah aw. 27Cha noh liata, Asuria phaohri cha na ngiatlâh tawhta pachhôpa châ aw ta, a raopaky chhao na rao tawhta pahluhpa a châ aw. Na thawhpa vâta a raopaky cha na thlie pachhô aw.”
Asuria siehnaona
28Asuria cha Aithâ khih tlô ta,
Mikarô khih sie pahliepa ta,
Mikamâ khih liata a hmo soh ta;
29Lytlâh khôna su liata khô ei ta,
Kebâ khih liata amâ rie.
Râmâ khihsawzy a chalyu ei ta,
Sawla Kibia mo amâ râpai haw.
30Hy Kâli zuah y, ao paro ngaitapa ta awh la,
Hy Laisah khih y, na nah pachôh teh!
Hy Anathô, ngiachhie nâ chhih kaw dia!
31Mamenah khihsawzy a râpai ei ta,
Kebi mo chhao abohna su lâ amâ râ haw.
32Tanoh tlai he Nôbâ khih liata châh aw ta,
Zaio sawchanô tlâh, Zerusale tlâh byuhpa lia tlai ta,
A kutô a chalyu aw.
33Moh teh u, Pheisaihzy Abeipa Zehôvâh ta,
Hmotaotheina rarôh y ngaitapa ta a chiahzy chhawh pathlah aw ta,
 sâh ngaitapazy cha thlupa châ aw ta,
A seih patluapazy chhao pahnaipa a châ aw.
34Râhmâhpa tho chha kaluhpazy cha ahrei ta thlu aw ta,
Lebanaw cha Bei Thatlôpa hmiakô liata a pao aw.
Currently Selected:
ISAI 10: MARVBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved.
