Rom 6

Wɛ ŋwe-doŋa kam taane

1Wɛ zaane dem na daga to, dé nam wó ta bɛ mo? Dé wó wane dé ta we, dé jege chwoŋa se dé taa ke wɛleera se ko wane ko pa Wɛ zaane dem tiini de puli dé tei ne mo na? 2Aawo, dé bá ta konto dwoŋi. Wɛleera seeni debam nye de twa mo. Konto to, dé ba jege chwoŋa se dé taa ke wɛleera dé ŋwea wone. 3Debam balo maama na jwoŋi sɛɛm se dé taa ye Yezu Krista nyem to, ko bere we dé tɔge dé sɛ o toone dem mo. Abam yeiri konto na? 4Konto ŋwaane, dé na jwoŋi sɛɛm to, ko nye de ba suli debam de Yezu daane mo, se ko bere we dé tɔge ded‑o de te. Konto ma pa dé tɔge de Yezu Krista dé na Wɛ ŋwe-doŋa kam, ne dé Kwo Wɛ na mɛ o paare dem dam o bi Yezu toone wone o pa o na ŋwea tei to.#Kolosia 2:12

5Debam na me de Yezu to mo pɛ dé tɔge ded‑o dé te wɛleera seeni. Konto ŋwaane, dé daa ta wó tɔge ded‑o dé bi toone wone. 6Dé yei we, ba na page Yezu dagara kam yuu ne ba go to, dé ŋwe-dwoŋa kam de tɔge da ka te mo, pa se wɛleera daa yé taa wae dé yera yam. Konto to, dé laam tei dé tete mo wɛleera jeŋa ne, 7kokuri to wɛleera daa bá wane ya taa tei wolo na maŋe o tɔge de Yezu o te to.

8Dé na tɔge de Yezu Krista dé te to, dé jege teena we dé wó tɔge dé na ŋwea o tei ne. 9Kokuri dé yei we Yezu Krista bi toone wone ye o daa bá jwoori o te. Konto ŋwaane, toone daa bá wane‑o de taa tei. 10Yezu na tege konto to, ko ye se o che wɛleera dam mo. O tege bedwe yerane mo o ma kweeli.#Hiburu 7:27 O laam na jege ŋwea tei to mo o ŋwe o pa Wɛ. 11Ko ta ye konto mo abam de tei ne. Ko ná ye wɛleera seeni, se á maane we á nye de twa mo. Ko nam ná ye ŋwea kalo á na jege to, á ŋwe á pa Wɛ mo, á na me de Yezu Krista to ŋwaane.

12Konto ŋwaane abam daa yé pa se wɛleera di dam á yera yam na wó te to baŋa ne. Á nam yé sɛ á pa wo-zɔɔna yalo á fera na zoore to. 13Yé sɛ-na á kwei á yera yam á ke wɛleera dam jeŋa ne, se ko pa á ta‑á ke keim-balwaaro. Nam kwei-na á tete á ke Wɛ jeŋa ne, á na ye balo Wɛ na jwoŋi toone wone ye á jege ŋwea o tei ne to ŋwaane. Kwei-na á maama á pa Wɛ se o wane o ma o toŋe kolo na ye chega to. 14Wɛleera daa ba jege se ya taa tei abam, kokuri to, á na jege ŋwea Wɛ tei ne to dae o nia yam ŋwaane, ko nam ye o zaane dem ŋwaane mo.

Wɛ vere debam wɛleera jeŋa ne

15Ko nam bere debam we bɛ mo? Dé na jege ŋwea Wɛ tei ne o zaane dem ŋwaane ye ko dae o nia yam ŋwaane to bere we dé jege chwoŋa se dé taa ke wɛleera na? Aawo, dé bá sɛ konto. 16Á yei we, á ná kwei á tete á ke nɔɔno jeŋa ne se á ta‑á ye o kabɛ ye á sɛ o ni, á seene á ye á na sɛ á pa wolo to kabɛ mo. Konto to, á wae á ye wɛleera kabɛ se toone laam ba de ja abam, naa á wae á ye kabɛ selo na toŋe á tɔge Wɛ ni to se á daare á na chega o tei ne. 17Amo nam ke Wɛ lei de abam déem na ye kabɛ wɛleera jeŋa ne, ye á laam ke á tete Wɛ chega kam jeŋa ne se á ta‑á tɔge-ka de á bochara maama. 18Wɛ mo vere abam wɛleera jeŋa ne, ye á laam ba á ji kabɛ o chega kam tei ne.

19Abam nam na ba jege boboŋ-dɛɛra to mo pae se amo maŋe nabiina memaŋa a ma bere abam konto dwoŋi. Abam déem kwei á maama á sɛ wo-digiru de lwarem kikia se á ta‑á ye kabɛ ya tei ne, ye á toŋe wo-lwanno ko ja gaale. Abam laam nam jege se á kwei á maama mo á sɛ Wɛ chega kam, se á ta‑á ye ka kabɛ ye á bochara ba ya kwɛ fase. 20Abam déem na ye wɛleera kabɛ to, á tei á tete mo Wɛ chega kam jeŋa ne. 21Abam na ke wo-yɔɔro telo to déem jege bɛ nyɔɔre mo te pa abam? Chaveera laam jege abam te baŋa ne. Wonnu tento kweelim jei nam pae toone mo. 22Ko daare leile konto, Wɛ vere abam wɛleera jeŋa ne ye á laam ye o kabɛ mo. Konto ŋwaane, á jege nyɔɔre de á bochara na fɔge ya kwɛ tei to, ye ko kweelim jei mo wó pa á na ŋwea kalo na ba jege kweelim Wɛ tei ne to. 23Ŋweero telo dé na jwoŋi wɛleera baŋa ne to mo ye toone. Ko daare Wɛ pɛɛre delo o na pae debam zɛɛra to nam mo ye ŋwea kalo na ba jege kweelim o tei ne to, dé na me de dé Teiru Yezu Krista to ŋwaane.

Currently Selected:

Rom 6: KBG

Highlight

Copy

Compare