Gurim 2
2
Efesia tiina kɔgɔ kom tɔnɔ
1“Nam popone tɔnɔ n pa Wɛ tontoŋeno wolo na nii Yezu kɔgɔ kom na wo Efesia ne to. Popone we:
Taane dento nwoŋi wolo na zei chalechwe serepɛ sem o jazem ne, ye o kwori o wo sabu-seŋa min-zwonnu terepɛ tem tetare ne o vei to tei mo.
2Amo maŋe a yei abam na ke tei to. Amo yei á na tiini á chɛ de á totoŋa tei to, ye á wo fɔge á yage. Amo ta yei we, abam ba pae se nɔn-balwaaro na chwoŋa abam tetare ne. Ko ná ye balo na bere we ba ye Yezu totoŋa nakwa ye ba dae to, a yei we á yeini á maane-ba á nii, ye á lɔre we ba ye vwa-nyena mo. 3Abam jege pu-dɛa lanyerane. Abam nɛ yaara amo ŋwaane ye á tiini á vɔ á wo de-ya, se á vɔna yé pare.
4Ko daare amo nam jege abam taane se a ta. Á daa ba jege amo swono se ko maŋe de boboa ne ko na ye tei to. 5Boŋe-na á nii á déem ya na ye tei ye á daa dae konto to. Leiri-na á boboŋa se á daare á ta‑á ke lanyerane, ne á na bobo á ke tei to. Ko ná dae konto, amo wó ba abam tei ye a daare a le á min-zwoŋo kom ko jeiga kam ne a yage. Nam leiri-na á wo se ko yé ke konto. 6Ko daare, abam kwaane de á na chuli kikia yalo Nikolayi nɔɔna bam na ke to. Amo tete de chuli ba na ke tei to.
7Nɔɔno maama nam kwaane o pore o zwa se o cheigi Wɛ Sin-laao kom na tɛ kolo de wɛ-di sem nɔɔna bam to. Wolo maama na wane wo-balwaaro dam to, amo wó pa konto tu chwoŋa se o zo Wɛ ywoni jei sem wo o di tio kolo bia na pae ŋwea to.#Pulim 2:9
Semuna tiina kɔgɔ kom tɔnɔ
8Daa‑n popone tɔnɔ n pa Wɛ tontoŋeno wolo na nii Yezu kɔgɔ kom na wo Semuna ne to. Popone we:
Taane dento nwoŋi wolo na ye boboa kam de kweelim tu to tei mo. Wonto nam ta mo ye wolo na tega ye o jwoori o bi o jege ŋwea to.
9Amo maŋe a yei cham delo na yi abam to ni ne. A yei we yiniga jege abam. Ko daare, abam nam ye naduna mo Wɛ tei ne. Ko ná ye balo na pae ba ye Juu tiina ye ba ba tɔge chwoŋa to, amo yei ba na yaale abam tei to. Banto wo setaana pɛ chwoŋa wone mo. 10Yé ta‑á kɔre-na foone de á na wó na yaara yalo to. Nii-na! Setaana pɛ lage o pa ba ja abam badaara ba pe, se o maŋe abam o nii. Abam nam wó na cham se ko maŋe de da fuga. Ko ná maŋe ko twɛ á toone de, se á ta ta‑á jege wo-dedoa de Wɛ. Abam ná ke konto, amo wó pa á na Wɛ pɛɛre delo na ye ŋwea chekke to.
11Nɔɔno maama nam kwaane o pore o zwa se o cheigi Wɛ Sin-laao kom na tɛ kolo de wɛ-di sem nɔɔna bam to. Wolo maama na wane wo-balwaaro dam to, toone delo na ye belei tu to daa bá wane‑o de chɔge.#Gurim 20:14
Pɛregama tiina kɔgɔ kom tɔnɔ
12Daa‑n popone tɔnɔ n pa Wɛ tontoŋeno wolo na nii Yezu kɔgɔ kom na wo Pɛregama ne to. Popone we:
Taane dento nwoŋi wolo wom na jege se-zɔɔ kolo na tiini ko jege ni ye ko ye nia yalei to tei mo.
13Amo yei abam na zoore mɛ to, ye setaana pɛ mo tei jei sem konto. De konto de, abam ta wo kwei amo á yage. Antipa déem zege amo chega kam kwaga ne de o wo maama mo. Ba ma daare ba go‑o abam tei ne, setaana pɛ na zoore jei selo ne to. De konto na maŋe ko ke to de, abam daa ta wo leiri á wo de amo.
14Amo nam jege abam taane fenfee se a ta. Nɔɔna wora abam wone ye ba sɛ berem delo na ye Balaam nyem to. Faŋa faŋa to wonto mo bere Pɛ Balaki se o soge Isarele tiina o pa ba to tusim wone. Ba ma di wodiiru telo na ye jwona nyem to, ye ba daare ba chɔge nɔɔna kaana.#2 Piita 2:15 15Nikolayi berem dem de maŋe de ye konto mo. Nɔɔna badaara wora á wone ba de na tɔge berem dem konto. 16Nam leiri-na á wo. Ko ná dae konto, amo wó ba abam tei lela. A maa wó le se-zɔɔ kom na wo a ni ne to a ma ke jara dedaane-ba.
17Nɔɔno maama kwaane o pore o zwa se o cheigi Wɛ Sin-laao kom na tɛ kolo de wɛ-di sem nɔɔna bam to. Wolo maama na wane wo-balwaaro dam to, amo wó pa konto tu Wɛ wodiu kolo yere na ye ‘Manna’ ye ko seigi nabiina yiga ne to se o di. Ko woli da, amo wó kwei kandwɛ-pwoŋo a pa konto tu. Yere-doore wó taa wo kandwɛ dem konto baŋa ne ye nɔɔn-nɔɔno yeiri-de, ko ná dae wolo na jwoŋi-de to yerane.
Tuatera tiina kɔgɔ kom tɔnɔ
18Daa‑n popone tɔnɔ n pa Wɛ tontoŋeno wolo na nii Yezu kɔgɔ kom na wo Tuatera ne to. Popone we:
Taane dento nwoŋi Wɛ Bu wom tei mo. Wonto yia mo nye de min-vogo, ye o napera nyeena ne channa tei.
19Amo maŋe a yei abam na ke tei to. Amo yei á na jege nɔɔna swono ye á kwori á jege wo-dedoa de Wɛ tei to. Amo yei abam na toŋe á woli nɔɔna ye á jege pu-dɛa tei to de. A nam ta yei abam na tiini á toŋe leile konto se ko dwoni á na maŋe á toŋe tei boboa ne to.
20Ko daare, amo jege abam taane se a ta. Abam yeini á yage chwoŋa á pa kaane wolo na bere we o ye Wɛ ni-jwoŋinu to, o yere mo Jezebele. Wonto na yeini o bere amo nɔɔna bam tei to, o gane-ba mo o pae ba tusa. O ma pa ba ke bwoorim, ye ba daare ba di wodiiru telo na ye jwona nyem to. 21Amo nam pɛ wonto maŋa mo se o leiri o wo de o kikia yam. O maa wo sɛ se o yage o wo-zɔɔna kikia yam. 22Nii-na. Amo wó pa se jaweo ja‑o se o daa yé wane o zaŋe wɛɛne. O na tigi da konto to, o de balo maama na tɔge daane ba ke bwoorim to wó yaare se ko chɛ ba yera ne. Ba ná wo leiri ba wo de ba kikia yam ba na tɔge ded‑o ba ke to, amo nam wó chɔge-ba lela. 23Amo wó mage balo na sɛ o berem dem to a go. Konto to, wɛ-di sem nɔɔna bam maama wó ba ba lɔre we, amo mo ye wolo wom na seene o yei nabiina bochara de ba boboŋa to.#Lei 7:9 Amo wó ke abam dedoa dedoa se ko maŋe de á kikia na mae tei to.
24Ko daare abam badwonna na wo Tuatera ne to wo tɔge kaane wom konto bera yam. Abam nam wo kwaane se á lɔre setaana pɛ berem dem, nɔɔna badaara na bwoi-de we setaane boboŋ-lilirru to. Amo nam daa bá che abam de chullu tedwonna a woli da. 25Á nam ta‑á jege abam na maŋe á tɔge tei to, se a laam ba abam tei.
26Wolo maama ná wane wo-balwaaro dam ye o toŋe o tɔge amo boboŋa se ko vo ko kweeli, amo wó pa konto tu dam se o taa tei logo baŋa dwi tiina maama. 27O wó taa tei-ba de dam. O maa wó kwei luu-dedɔrɔ o ma wane-ba, ye o daare o chɔge-ba, nenɛɛne nɔɔno na mage kambi o chochoge tei to.#Lei 2:9 28Konto mo ye dam delo amo Kwo na maŋe o kwei o ke a jeŋa ne to. Amo wó daare a pa se tetete chalechoa kam taa wo konto tu tei ne.
29Nɔɔno maama nam kwaane o pore o zwa se o cheigi Wɛ Sin-laao kom na tɛ kolo de wɛ-di sem nɔɔna bam to.
Currently Selected:
Gurim 2: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
