Gurim 16

1Amo laam ma ni kwor-dɛa na ŋɔɔne baŋa baŋa Wɛ diga kam wone, ye ka ta de Wɛ malese serepɛ sem ka we, “Kwei-na zwe serepɛ selo Wɛ ban-lom dem na wo se wone to á ja vo á lwo á yage logo baŋa ne.”

2Da-yiga maleka kam ma kwei ka zoŋa kam ka ja vo ka lwo ka yage logo baŋa ne. Ka na ke konto to, ŋɔn-zana ma ja balo na lage varem wom gwona yam ye ba zuli ko kamɔgɔ kom to.

3Maleka kalo na saŋe to ma lwo ka zoŋa kam ka yage naneo kom wone. Ko na bam ma ji ne too jana na ye tei to. Woŋo maama na zoore naneo kom wone to ma te.

4Malese setɔ tu wom ma lwo o zoŋa kam o yage bu-tole sem wone de buli sem de wone. Se na bam ma ji jana. 5Amo ma ni Wɛ maleka kalo na nii bwi sem baŋa ne to na we:

“Wo-pwoŋo Tu Baŋa Wɛ,

nmo na maŋe n wora boboa ne

ye n daa‑n ta wora to,

nmo tɔge chega de nmo na ke tei n waare-ba to.

6Kokuri banto go n nɔɔna bam de n sampwori sem

pa se ba jana nwoŋi.

Nmo laam ma‑n pa na bam ji jana

se nɔɔna bam konto de nyɔ.

Mo kolo na maŋe de ba keim dem to.”

7Amo ma daare a ni kwora kadwoŋi na ŋɔɔne Wɛ kaanem bimbini dem seeni ka we:

“Dam-fɔrɔ Tu Baŋa Wɛ,

nmo na di nɔɔna taane tei to

yɔɔre ko tɔge chega mo.”

8Malese sena tu wom ma kwei o zoŋa kam o lwo o yage wea kam yera ne. Wea kam ma jwoŋi dam se ka wulim dem zwɛ nɔɔna de mini. 9Ka mini dem na tiini de zwɛ nɔɔna konto to, ba ma twe Wɛ yere dem, o na tei yaara yam konto to ŋwaane. Ba nam wo leiri ba wo de ba kikia yam se ba daare ba zuli Wɛ.

10Malese senu tu wom ma lwo o zoŋa kam varem wom paare yituŋu kom baŋa ne. Lim ma ba de li varem wom paare dim jei sem maama. Nɔɔna ma done ba yeila de ba yaara yam. 11Ba ma ŋɔɔne ba twe Telaao Tu Wɛ wom, ba yaara yam de ba yera ŋɔna yam ŋwaane. Ba nam daa ta wo leiri ba wo de ba kikia yam.

12Malese seredo tu wom ma lwo o zoŋa kam o yage Yuferata bu-zaŋa kam wone. Ka na bam ma we, ye ko daare chwoŋa ko pa pwa balo na nwoŋi wɛ-puli jei sem ne to se ba wane ba bɛ. 13Amo ma daare a na chichiri-zɔɔna yatɔ na nye de mantwaaro to. Ba dedoa ma nwoŋi kayanchɔrɔ kom ni ne. Wodwoŋi de ma nwoŋi varem wom ni ne, ye dedoa kam de nwoŋi varem wolo na bere we o ye Wɛ sampwora ye o gane nɔɔna to ni ne. 14Chichiribia bam konto ye setaane nyena mo, ye ba wae ba ke wo-kenkagela. Ba ma zaŋe ba vo logo baŋa pwa bam maama tei se ba maama la daane ba ti ba yiga jara ŋwaane Dam-fɔrɔ Tu Baŋa Wɛ dɛ-kamunu kom dɛ ne.

Yezu tage o we:

15“Cheigi-na. A lage a ba ne ŋweeno na dare o ba tei to mo. Wolo na fɔge o che o tete to wó taa jege yu-ywoŋo. Wolo na yei o gwaaro tem tiŋim to, amo ná pɔpɔ a ba konto, chaveera bá ja‑o nɔɔna yiga ne, o na bá zaŋe de kuri-nɔrɔ to ŋwaane.”

16Chichiribia batɔ bam ma pa logo baŋa pwa bam la daane jeiga kadwoŋi ne. Ba maa bwoi jeiga kam konto de Juu tiina taane ba we, ‘Amagedon’.

17Malese serepɛ tu wom laam ma lwo o zoŋa kam wɛyuu ne. Kwor-dɛa laam ma ŋɔɔne Wɛ diga kam paare yituŋu kom jei sem ne ka we, “Ko ke ko ti.” 18Ka na tage konto to, doa maa pepela ka baga ka wuura. Sɔɔ ma tiini ko gaale ye tega kam de ziziŋi. Tega kam na tiini ka ziziŋi tei to ba jege dwoŋi. Tega nam maŋe ka wo ziziŋi konto dwoŋi ye nabiina wora logo baŋa ne. 19Te-fɔrɔ kolo yere na ye Babilon to ma yare kuni betɔ ko chɔge. Logo baŋa dwi tiina teene dem maama de ma vi tega ne. Wɛ maa wo swei te-fɔrɔ Babilon ni ne se o waare-ko. O ban-zɔŋɔ kom ma tiini ko ba teo kom baŋa, nenɛɛne o lwogi sa-dɛɛra mo o su na-zoŋa pa se ko nyɔ ko su tei. 20Tega kalo maama na wo naneo tetare ne to ma fɔɔre ka tiga jei ne, ye peero tem de yɔɔre te jei. 21Do-kandwa na duna ne luuru tei to maa nwoŋi wɛyuu ne ya toe nɔɔna baŋa ne. Nɔɔna bam ma ŋɔɔne ba twe Wɛ yere, do-kandwa yam na pɛ ba na yaara dedɛ to ŋwaane.

Currently Selected:

Gurim 16: KBG

Highlight

Copy

Compare