Gurim 14

Pipeila kam de ka nɔɔna bam taane

1Amo laam ma nii a na Pipeila kam ka na zege Zion peo kom yuu ne. Nɔɔna morro bi de finna-bana bam (144,000) maa tɔge ba wora. Pipeila kam yere de ka kwo yere dem ma popone ba tira ne.#Gurim 7:3 2A ma ni kwora na ŋɔɔne Wɛ telaao ne. Ka maa dɔna nenɛɛne na na wuuri ye doa bage tei to. A na nigi kwora kam konto to, ka kwori dem maa nye de kɔn-magena na mage ba kwanno tei to. 3Nɔn-kɔgɔ kom maa zege ko yɔɔre Wɛ paare yituŋu kom, de wonnu tena tem na ŋwe to, de nakwa bam. Ba maa leeni leiŋ-doŋa kalo nɔɔn-nɔɔno na bá wane o zamese-ka to ko ná dae nɔɔna morro bi de finna-tena bam yerane (144,000). Banto mo ye balo Wɛ na le logo baŋa nabiina wone ye o ŋwe ba wɛleera jene to. 4Banto nam mo chege ba tete de wo-digiru keim, ye ba wo tɔge ka-laga wo-zɔɔna kikia. Banto yeini ba tɔge Pipeila kam kwaga mo ba vei jei selo maama ka na wó vo to. Wɛ mo le-ba nabiina wone o ŋwe ba wɛleera jene, pa se banto da yiga ba ji o nyem, de Pipeila kam de nyem. 5Banto nam wo fɔge ba fɔ vwa. Ba maa jege bora ye tusim tera.

Wɛ malese setɔ na tage wonnu telo to

6Amo laam ma na maleka tu wodwoŋi, ka na jaane wɛyuu ne. Ka maa jege Wɛ kwor-ywoŋa kalo na jege kuri taa wuu to se ka tɔɔle ka bere balo na zoore logo baŋa ne to.

Ko nam ye paare dim jei sem maama ne mo,

de nabiina dwi maama,

de taana dwi maama tiina,

de teene maama tiina.

7Ka maa ŋɔɔne de kwor-dɛa ka we, “Nam kɔre-na Wɛ se á daare á ta‑á pa‑o zula, kolo ŋwaane maŋa kam yia se o di nabiina taane. Nam kuni-na dwoona á zuli wolo na ke wɛyuu jei sem, de tega baŋa kam, de naneo kom, dedaane buli sem to.”

8Maleka kadwoŋi ma saŋe ka kwaga ye ka tɛ ka we, “Babilon te-fɔrɔ kom chɔge ywoo! Ko yɔɔre ko chɔge mo zɔŋŋ. Ko déem nam yeini ko pa nabiina dwi maama mo tɔge ba ke ko kabwoŋa kikia yam, nenɛɛne sa-dɛɛra mo ba nyɔge ba su tei.”#Izaya 21:9

9Malese setɔ tu de ma saŋe, ye ka tɛ de kwor-dɛa ka we, “Wolo maama ná zuli varem wom de o kamɔgɔ kom, ye ba daare ba la ba gwona yam o tiri ne naa o jeŋa ne, 10Wɛ ban-lom dem laam wó ba kotu baŋa ne, ne ba lwogi sa-dɛɛra mo ba su na-zoŋa ba pa o nyɔ o su tei. Wolo maama ná sɛ varem wom konto, chilibugu kolo na jege mini to mo wó di kotu pa o na cham dedɛ Wɛ malese sem yiga ne, de Pipeila kam yiga ne.#Jeremia 25:15 11Mini dem na di ba yera yam tei to wó pa se nyoa nwoŋi da ka yɔɔre ka taa zaŋe mo taa taa se ko taa vei wuu. Balo maama na zuli varem wom de o kamɔgɔ kom to, de balo maama de na lage gwona yalo na bere o yere dem to bá na siu kɔtaa, wea de tete maama.”

12Konto mo tei Wɛ nɔɔna bam jege se ba taa fɔge ba zege de pu-dɛa. Banto mo ye balo na sɛ Wɛ nia yam ye ba kwori ba jege wo-dedoa de Yezu to.

13Amo laam ma ni kwora na ŋɔɔne telaao ne ka we, “Nam popone tento: Ko na zege zem se ko taa vei to, balo na sɛ dé Teiru wom ye ba ba ba te to, wó taa jege yu-ywoŋo.” Wɛ Sin-laao kom ma leiri ko we, “Ko ye chega mo. Banto wó sii de ba totoŋ-chɛɛra yam, kolo ŋwaane ba keim-laaro mo wó taa tɔge-ba.”

Wɛ borem maŋa kam na ye tei to

14Amo laam ma nii a na kunkwoŋ-pwoŋo, ye wolo na nye de nabiinu bu to jei ko baŋa ne.#Danyeli 7:13 Sabu-seŋa yipuga ma pu o yuu ne, ye o daare o zei sekwara kalo na jege ni to. 15Maleka kadwoŋi ma nwoŋi Wɛ diga kam wone. Ka ma tɔɔle baŋa baŋa ka ta de wolo wom na jei kunkwoŋo kom baŋa ne to ka we, “Logo baŋa faao kom laam bege ko ti. Kwei n sekwara kam n ma n gaane faao kom, se ko maŋa kam yia.”#Joweli 3:13 16Wolo wom na jei kunkwoŋo kom baŋa ne to laam ma vuvugi o sekwara kam logo baŋa ne o ma gaane ko wodiiru tem.

17Amo daa ma na maleka kadwoŋi na nwoŋi Wɛ diga kalo na wo telaao ne to wone, ye ka de jege sekwara kalo na jege ni to. 18Maleka kadwoŋi na nii mini baŋa ne to ma nwoŋi Wɛ kaanem bimbini dem seeni. Ka ma tɔɔle de kwor-dɛa ka ta de maleka kalo na zei sekwara kam to ka we, “Kwei n sekwara kam na jege ni to n ma n gwori Vini tio-bia bam, se logo baŋa tio-bia bam konto laam bege ba ti.”

19Maleka kam laam ma kwei ka sekwara kam ka fere Vini tio-bia bam ka gwori. Ka ma kwei-ba ka de kazɔ-zɔŋɔ wone se ba tɛ ba ma ke sana, se ko bere Wɛ ban-zɔŋɔ kom na wó ba nabiina baŋa tei to. 20Kazɔgɔ kom maa zege teo kom dáa ne mo. Ba maa nɔne tio-bia bam ko wone se ba nyoa bam taa nwoŋa. Ba nyoa bam na nwoŋi to maa ye jana. Jana bam ma nwoŋi ba pɛɛle tega ne ba vo nenɛɛne stadia moro dedoa de bia yaredo (1,600),#14:20 stadia 1,600 = kilomiita 300 ye ba na luuna tei to diini ko maŋe de siseiŋa ni mo.#Izaya 63:3

Currently Selected:

Gurim 14: KBG

Highlight

Copy

Compare