Jeelim 3
3
Levi dwi dem taane
1Maŋa kam Baŋa Wɛ déem na ŋɔɔne de Moses Sinayi peo kom yuu ne to, Aron de Moses diga kam tiina mo tento: 2Aron déem jege bu-baara bana mo. Nadab mo ye o bakeiri-kwea. Abihu ma saŋe o kwaga, de Eleaza, dedaane Itamara. 3Ba déem nam lwogi nuga Aron bu-baara bam konto yuu ne mo ba le-ba se ba taa ye Wɛ kaanem tiina ye ba toŋe ba pa‑o. 4Baŋa Wɛ nam pɛ se Nadab de Abihu te mo. Kokuri to, Sinayi kagoa kam seeni mo banto déem kwei min-yɔɔ ba zwɛ se ba ma zuli Baŋa Wɛ, ye o wo pɛ chwoŋa se ba zwɛ mini dem konto dwoŋi.#Chullu 10:1-2 Ba maa ba jege bia. Konto ŋwaane, Eleaza de Itamara yerane déem mo toŋe Wɛ kaanem tiina totoŋe ye ba kwo Aron ta ŋwe.
5 Baŋa Wɛ ta ma ta de Moses o we:
6“Pa se Levi dwi dem nwoŋi ba zege kaanem tu Aron yiga ne, se ba taa toŋe ba woli‑o. 7Banto wó taa toŋe wara-jei sem totoŋa mo ba pae Aron de Isarele tiina kɔ-fɔrɔ kom maama. 8Ba wó taa nii wara-vwei dem wo zela yam baŋa ne, ye ba daare ba taa toŋe totoŋa yalo maama na maŋe de wara-jei sem to ba pae Isarele tiina bam. 9Pɔɔre Levi tiina bam se ba taa toŋe ba woli Aron de o bia bam. Le-ba Isarele dwi tiina bam maama wone se ba yɔɔre ba taa toŋe totoŋa yam konto yerane. 10Ko nam ye se n tiŋi Aron de o bu-baara bam mo se ba taa ye amo kaanem tiina. Nɔn-gaa ná tiini o yi wara-vwei dem yera, se ba go kotu.”
11 Baŋa Wɛ daa ta ma ta de Moses o we:
12“Amo kuri Levi dwi tiina bam mo se ba taa ye amo nyem. A le-ba Isarele tiina bam wone se ba leiri bakeiri-kwe selo maama abam na wó lo to yuu ne mo. 13Kokuri to, amo déem na go Ejipti tiina bakeiri-kwe sem maama to, a daare Isarele tiina bakeiri-kwe sem de ba vare-kwe sem mo se ba taa ye amo nyem. Levi tiina bam mo jege se ba leiri bakeiri-kwe sem yuu ne ba ji amo nyem. Amo mo ye Baŋa Wɛ wom.”
Ba jeeli Levi tiina bam ni
14Sinayi kagoa kam ne mo Baŋa Wɛ déem tage de Moses o we, 15“Jeeli Levi dwi tiina bam ni se ko tɔge de ba sɔ-yuni tem, de ba di sem. Nam jeeli ba baara balo na yi chana se ko taa vei to n popone ba yera n tiŋi.” 16Moses ma seene o ke tei Baŋa Wɛ na pɛ ni se o ke to.
17Levi bia bam yera mo tento:#Nwoŋim 6:16-25
Gereson, de Kohafe, de Merari.
18Gereson sɔ-yuni tem ye Libini de Simeyi mo. 19Kohafe sɔ-yuni tem maa ye Amiram, de Izehara, de Heboron, de Yuzeli. 20Merari sɔ-yuni tem de maa ye Mahili de Musi.
Levi dwi tiina sɔ-yuni tem mo konto.
Gereson sɔ-yuu kom de ba totoŋe dem
21Libini de Simeyi di sem déem nwoŋi Gereson sɔ-yuu kom wone mo. 22Ba baara balo na yi chana se ko taa vei ye ba jeeli ba ni to déem ye morro terepɛ de bia yanu (7,500). 23Banto sɔ-yuni tem déem mo jege se ba yeini ba chwi ba vwoa wara-vwei dem kwaga ne, de wɛ-zoore seeni. 24Gereson sɔ-yuu kom yiga tu wom déem ye Layeli bu Eliasafe mo.
25Ko déem ye Gereson sɔ-yuu tiina totoŋe mo se ba taa nii wara-vwei dem baŋa ne, de gwaaro telo na kwoli-de to, de gare-jale delo na leigi de ni dem ne to. 26Ba ta wó taa nii gare-jala yalo na kwoli wara-jei sem konkɔlɔ kom mɛ vwei dem tete de kaanem dakaa kam na wora to, de gare-jale delo na leigi konkɔlɔ kom ni dem ne to, de ŋone selo ba na mae ba chwi wara-vwei dem to. Ba ta jege se ba taa nii wonnu tem konto totoŋa yam maama baŋa ne se ya ke lanyerane.
Kohafe sɔ-yuu kom de ba totoŋe dem
27Amiram, de Izehara, de Heboron, de Yuzeli di sem déem nwoŋi Kohafe sɔ-yuu kom wone mo. 28Ba baara balo na yi chana se ko taa vei to déem ye morro nana de bia yaredo (8,600) mo. Banto totoŋe dem mo ye se ba taa nii wara-vwei dem wo zela yam baŋa ne. 29Ba sɔ-yuni tem déem mo jege se ba yeini ba chwi ba vwoa yam wara-vwei dem tega-kuri seeni. 30Kohafe sɔ-yuu kom yiga tu wom déem ye Yuzeli bu Elizafan mo.
31Ko déem ye Kohafe sɔ-yuu tiina totoŋe mo se ba taa nii Wɛ ni-gwonim dakaa kam baŋa ne, de tabolo kom, de min-zwon-zego kom, de kaanem dakɛ sem, dedaane zela yalo kaanem tiina bam na yeini ba kwei ba ma toŋe ba totoŋa to, de gare-jale delo na leigi de che Wɛ di-yun-gala kam to, dedaane wonnu tem konto maama totoŋa yam baŋa ne.#Nwoŋim 37:1–38:8
32Wɛ kaanem tu Aron bu Eleaza déem mo ye Levi dwi dem yiga tiina bam yuu tu. Ba ma tiŋi wonto se o taa nii balo maama na toŋe wara-vwei dem totoŋa yam to baŋa ne.
Merari sɔ-yuu kom de ba totoŋe dem
33Mahili de Musi di sem déem nwoŋi Merari sɔ-yuu kom wone mo. 34Ba baara balo na yi chana se ko taa vei ye ba jeeli ba ni to déem ye morro teredo de bia yalei (6,200) mo. 35Merari sɔ-yuu kom yiga tu wom déem ye Abihali bu Zureli mo. Banto sɔ-yuni tem déem mo jege se ba yeini ba chwi ba vwoa yam wara-vwei dem baŋa seeni.
36Ko déem nam ye Merari sɔ-yuu tiina totoŋe mo se ba taa nii ywoa yalo na jaane wara-vwei dem pa de zege to, dedaane da-gare sem, de ywoa yam, de dɛ sem na zege luuru telo baŋa ne to, de se zela yam maama baŋa ne. Ba ta jege se ba taa nii wonnu tem konto totoŋa yam maama baŋa ne mo. 37Ko ta ye Merari sɔ-yuu tiina totoŋe mo se ba taa nii wara-jei sem konkɔlɔ ywoa yam, de da-dɛɛra yam na zege luuru telo baŋa ne to, de paara yam, dedaane ŋone sem baŋa ne.#Nwoŋim 38:9-20
38Ko nam ná ye Moses, de Aron, de Aron bu-baara bam, ba yeini ba chwi ba vwoa yam wara-jei sem yiga ne mo, se ko jeeri wɛ-puli seeni. Banto mo lage ba taa nii wara-vwei dem de de totoŋa yam baŋa ne ba pae Isarele tiina bam. Nɔn-gaa ná tiini o yi wara-vwei dem yera, se ba go kotu. 39Levi dwi dem baara balo na yi chana ye Moses de Aron jeeli ba ni sɔ-yuu de sɔ-yuu, ne Baŋa Wɛ na pɛ-ba ni se ba ke tei to déem ye morro finlei-telei (22,000) mo.
Levi tiina de bakeiri-kwe sem jeilo kom
40 Baŋa Wɛ daa ma ta de Moses o we, “Jeeli Isarele tiina bakeiri-kwe selo maama na yi chana se ko taa vei to se n popone ba yera n tiŋi. 41Abam nam wó pa se Levi dwi tiina bam leiri á bakeiri-kwe sem yuu ne ba ji amo nyem. Amo mo ye Baŋa Wɛ wom! Levi tiina vara bam de wó leiri Isarele tiina maama vare-kwe sem yuu ne ba taa ye amo nyem.”
42Moses ma seene o jeeli Isarele tiina bakeiri-kwe sem ni, nenɛɛne Baŋa Wɛ na pɛ‑o ni se o ke tei to. 43Bakeiri-kwe selo na yi chana se ko taa vei ye ba popone ba yera to déem maa ye morro finlei-telei de bia yalei de fuserepɛ-batɔ (22,273).
44 Baŋa Wɛ laam ma ta de Moses o we:
45“Laam pɔɔre Levi tiina bam se banto leiri Isarele tiina bakeiri-kwe sem yuu ne ba ji amo nyem. Ta pɔɔre Levi tiina vara bam se banto de leiri Isarele tiina bam maama vare-kwe sem yuu ne. Levi dwi tiina bam wó taa ye amo nyem mo. Amo mo ye Baŋa Wɛ wom. 46Ko na ye tei to, Isarele tiina bakeiri-kwe sem ni daga ba dwoi Levi tiina bam ni na mae tei to, de nɔɔna 273. Abam jege se á jwoori á yeigi nɔɔna bam konto mo. 47Á wó ŋwe sɛkɛle sabu-dala yanu mo bu-kwea maama ŋwaane. Sabu kom konto dunni jege se ko tɔge wara-jei sem maŋem chekke na ye tei to mo. Sɛkɛle dedoa maa ye gɛra kuni finlei. 48Á wó kwei sabu kom konto á pa Aron de o bu-baara bam, se á ma‑á jwoori á yeigi bakeiri-kwe selo na dwoi Levi tiina bam ni na mae tei to.”
49Moses ma sɛ ye o jwoŋi bakeiri-kwe sem konto yera sabu se o jwoori o yeigi-ba. 50Sabu kom maama déem ye sɛkɛle sabu-dala moro dedoa de bia yatɔ de fuseredo-yanu (1,365) mo. Ko dunni maa tɔge wara-jei sem maŋem chekke na ye tei to. 51Moses laam ma kwei-ko o pa Aron de o bu-baara bam, nenɛɛne Baŋa Wɛ na pɛ ni se o ke tei to.
Currently Selected:
Jeelim 3: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
