Jeelim 27
27
Zelofehada bukwa bam taane
1Maala, de Noah, de Hogela, de Milika, dedaane Tiraza déem ye Hefera bu Zelofehada bukwa mo. Hefera maa ye Gilead bu. Gilead de maa ye Makira bu. Makira maa ye Manasɛ bu. Manasɛ maa ye Josɛf bu. 2Bukwa banto déem ma zaŋe ba vo wara-jei sem ni ne ba yi Moses, de kaanem tu Eleaza, de Isarele yiga tiina, de ba kɔ-fɔrɔ kom maama tei. Ba ma zege ba yiga ne ye ba ta ba we, 3“Debam kwo déem tege kagoa kam ne, ye o ba jege bakeiri. O nam ya tɔge o tere Kora kwaga tɔgena bam wone. Banto déem ke ni daane se ba lɔ Baŋa Wɛ kwaga ne. Dé kwo nam tege o tete wɛleera baŋa ne mo. 4Abam nam wó sɛ se debam kwo yere jei o sɔ-yuu kom wone, de o na ba jege bakeira to ŋwaane na? Pa-na se debam balo na ye o bukwa to jwoŋi tega kalo na wó taa ye dé nyem to, ne dé kwo chorro tem na wó jwoŋi ba nyem tei to.”
5Moses ma ja ba taane dem o vo Baŋa Wɛ yiga. 6Baŋa Wɛ ma ta ded‑o o we, 7“Zelofehada bukwa bam wo ba chega wone. Pɔɔre-na tega ba kwo chorro tega kam wone á pa-ba. Banto mo jege se ba jwoŋi tega kalo na ye ba kwo nyem to.#Josua 17:3-6 8Nam ta n bere Isarele tiina bam we: ‘Nɔɔno ná tega ye o ba jege bakeira, se o bukɔ lɛɛre o jwoŋi o tega o ta tei. 9O nam ná tega ye o ba jege bukɔ de, se o chorro jwoŋi o tega kam. 10O nam ná maŋe o ba jege chorro de, se o kwo chorro tem jwoŋi o tega kam. 11O ná yɔɔre o ba jege chorro naa o kwo chorro, se wolo de daa na ye o yera nɔɔno ye konto tu bwola ded‑o to jwoŋi-ka o taa tei. Amo ni mo konto a na kwei a pa Isarele tiina bam se ko taa vei wuu. Ko maa ye ni delo amo Baŋa Wɛ na pɛ nmo, Moses to mo.’ ”
Josua leiri Moses yuu ne
12 Baŋa Wɛ ma ta de Moses o we, “Amo wó pa se n vo Abarim peero tem wone, ye n di peo kolo na wora to yuu. Nmo ná diina, se n nii n na tega kalo a na lage a kwei a pa Isarele tiina bam to. 13Nmo nam ná nii-ka n ti, n de lage n te mo nenɛɛne n zembaaro Aron na tege tei to. 14Kokuri to, á déem na wo Zin kagoa kam wone ye Isarele tiina kɔgɔ kom jege-ne ba poona to, abam balei nwoŋi a ni dem kwaga ne ye á wo pɛ se Isarele tiina bam maane ba lɔre we, amo yɔɔre a ye wose mo.”#Jeelim 20:12 (Konto déem ke Meriba-kadese na wo Zin kagoa kam wone to mo, mɛ na na nwoŋi peo kom yera ne to.)
15Moses ma leiri Baŋa Wɛ o we, 16“Nabiina maama Ŋwea Tu Baŋa Wɛ, nam beeri nɔɔno n leiri amo yuu ne, se o taa nii nɔn-kɔgɔ konto baŋa ne. 17Wonto wó taa tɔge nɔɔna bam yiga ye ba taa nwoŋi ba ke jara, ye ba daare ba jwoori ba sam wone. Ko ná dae konto, nmo Baŋa Wɛ nɔn-kɔgɔ kom wó taa nye de pei-kɔgɔ na wora ye se ba jege nayero tei to mo.”
18 Baŋa Wɛ ma ta de Moses o we, “Nun bu Josua nam ye wolo amo jworo na wo o tei ne se o wane o toŋe n totoŋe dem to mo. Kwei n jeŋa n daŋe o yuu ne se o leiri n yuu ne o taa toŋa. 19Pa se o vo o zege kaanem tu Eleaza, de Isarele kɔ-fɔrɔ kom maama yiga ne, se n tiŋi‑o o totoŋe dem ŋwaane ye nɔɔna bam maama zege ba nia. 20Ke dam delo nmo na jege to dwoŋi n pa‑o, se Isarele tiina kɔgɔ kom taa sɛ‑o.#Josua 1:16-17 21O de nam jege se o taa vei Eleaza tei mo, se wonto wane o tɔge Yurim memaŋa kandwɛ dem baŋa ne o lɔre amo Baŋa Wɛ boboŋa na ye tei to.#Nwoŋim 28:30 Konto to, Eleaza wó bere‑o amo ni dem se o yeini ja nɔɔna bam o nwoŋi se ba kwaare jara, naa se ba jwoori ba sam wone.”
22Moses déem seene o ke Baŋa Wɛ ni dem na bere tei to mo. O ma ja Josua o vo Eleaza de nɔn-kɔgɔ kom maama tei se o zege ba yiga ne. 23O ma kwei o je o daŋe Josua yuu ne, ye o tiŋi‑o yiga tu totoŋe dem ŋwaane, ne Baŋa Wɛ déem na pɛ ni se o ke tei to.
Currently Selected:
Jeelim 27: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
