Jeelim 24
24
1Balaam déem yɔɔre o lɔre we Baŋa Wɛ lage se o swɛ Isarele tiina bam swolim mo. Konto ŋwaane, o daa wo nii o tankwa yam wone se o lɔre kolo na wora, nenɛɛne o ya na maŋe o ke tei to. O ma pipiri o yibia o nii kagoa kam seeni. 2O ma kwoni o nii o na Isarele tiina bam na chwi ba vwoa yam dwi de dwi. Se nɛ sem ni ne mo Wɛ Jworo tu o baŋa ne. 3O ma bobo se o tole taane dem o we:
“Amo, Beora bu Balaam taane mo tento.
A yi-nɛɛre dem pae se a lɔre wonnu jaja.
4A maa yeini a ni Wɛ kwora,
pa se a lwoni o taane dem a bere nɔɔna.
A vwi a yibia tega ne ye a ta nae mo,
pa se Dam-fɔrɔ Tu Wɛ wom veere wonnu o bere-ne.
5Isarele tiina bam,
nii á vwoa yam na chwi de nenɔŋa tei!
Jei selo á na zoore to tiini se lana.
6Á vwoa yam nye de nabare#24:6 nabare naa konkware selo ba na jeiri ba geene to
selo na jage jei maama to.
Ya ta nye de gaara
yalo na ke buga ni ne to mo.
Abam zoorem jei ta maa ye nenɛɛne
kenkaa-vɔɔro telo Baŋa Wɛ na jeiri to,
de Sedare teeni na zege buga ni ne to mo.
7Doa wó taa nene dedɛ ka pa-ba,
pa se ba wo-dwa ke lanyerane.
Ba pɛ wó taa dana o dwoi Pɛ Agagi,
se o yere zaŋe de jage jei maama ne.
8 Baŋa Wɛ mo jaane-ba o nwoŋi Ejipti wone.
O na yeini o jaŋe tei o pa-ba to
nye de nabea kalo na ware ka ja to mo.
Ba wó wane dwia yalo na dwoni de-ba to ba li,
se ba daare ba chochoge ba kwi,
ye ba zɔ-ba de ba che-tɛɛra yam.
9Isarele tiina kɔgɔ kom nye de nywoŋo
na tigi ko dɔ to mo.
Nɔɔn-nɔɔno bá sɛ se o vo o zaŋe-ko.
Wolo ná sɔɔle swolim o ke abam yuu ne,
Wɛ de wó swɛ konto tu swolim.
Se wolo ná sɔɔle lwarem o pa abam,
Wɛ de wó sɔɔle lwarem mo o ke konto tu de yera ne.”
10Balaam na tole o taane dem o ti to, mo Balaki bane zaŋe o baŋa ne. O ma pu o jagula o mage daane ye o we, “Amo bwoŋi‑m se n ba n sɔɔle lwarem mo n chɔge a dona. Nmo nam sɔɔle lam n pa-ba tento n ke betɔ mo. 11Laam ta‑n viira! Amo ya seene a ta we a lage a ŋwe‑m dedɛ mo n totoŋa ŋwaane. Baŋa Wɛ nam wo pɛ‑m chwoŋa se n ke kolo na wó pa n na n ŋweero tem to.”
12Balaam ma leiri‑o o we, “Amo maŋe a ta de nɔɔna balo nmo na toŋe a tei ne to a we, 13‘Pɛ Balaki ná maŋe o lɔ sɔ-fɔrɔ mo, ye o laam su ko ni de sabu-seŋa dedaane lu-nyenno se o kwei o pa-ne de, amo ta bá wane a ve ni delo Baŋa Wɛ na kwei o pa-ne to. A ba jege chwoŋa se a tɔge a tete boboŋa baŋa ne a ke wo-laao naa wo-balɔrɔ. Baŋa Wɛ na yeini o pa-ne ni se a ta kolo to yerane mo a jege se a ta.’ 14Tɔ. A nam seene a lage a jwoori a tete nɔɔna bam tei ne mo. Nam cheigi, se a ta a bere‑m Isarele tiina bam jwa na wó ke tei de nmo nɔn-bia bam to.”
Balaam taane bena tu
15Balaam ma bobo se o tole taane dem ye o we:
“Amo, Beora bu Balaam taane mo tento.
A yi-nɛɛre dem pae se a lɔre wonnu jaja.
16A maa yeini a ni Wɛ kwora,
pa se a lwoni o taane dem a bere nɔɔna.
A yeini a jwoŋi yeino mo Yuu-tu Wɛ wom tei ne.
A vwi a yibia tega ne ye a ta nae mo,
pa se Dam-fɔrɔ Tu Wɛ wom le wonnu o bere-ne.
17A na nɛ tei veera wone to dae leile woŋo.
Ko ta ba bwola se ko ke.
A ma na we dedɛɛro wó nwoŋi Jakob dwi dem wone,
ne chalechoa na puli tei to.
Pɛ wom konto wó jeini Isarele teo kom wone.
O maa wó mage Moaba tiina yuni tem o chochoge.
O ta wó chɔge Sɛfi dwi tiina bam maama.
18Wonto ta wó wane Edom tiina bam o di,
ye o pa se ba tega kam ji o nyem,
ba na ye o dona to ŋwaane.
Ko daare, Isarele tiina bam wó di yiga de dam.
19Dedɛɛro wó nwoŋi Jakob dwi dem wone.
Wonto wó chɔge balo maama ta na daare teo kom wone to.”
20Balaam ma pipiri o nii Amaleki tiina bam seeni. O ta ma tole o taane dem o we:
“Amaleki dwi tiina bam ya jege dam
ba dwoi logo baŋa dwi tiina bam maama.
Ba kweelim jei nam wó taa ye chɔgem yerane mo.”
21Balaam ta ma nii Keni tiina bam seeni. O ma tole o taane dem o we:
“Abam Keni tiina bam na zoore mɛ to dana lanyerane.
Á peiga jei maa wo peero gugworru wone.
22Nam lɔre-na we Asuri#24:22 Asuri naa Asiria tiina bam jeŋa ná zo abam,
á maŋa yi mo konto se ba chɔge abam ba ti.”
23Balaam ta ma tole o taane dem o we:
“Lɛɛro wo á yuni ne!
Baŋa Wɛ ná boŋe se o ke konto,
wɔ mo wó wori?
24Nabwooru mo lage te nwoŋi Kitim#24:24 Kitim = Cyprus teo kom ne te ba,
se te nɔɔna zaŋe Asuri tiina de Ebera tiina baŋa ne
ba bɛɛse-ba.
Kitim tiina bam de nam wó ba ba na ba chɔgem.”
25Balaam na tole o taane dem maama o ti to, o laam ma zaŋe o jwoori o tete sɔŋɔ. Balaki de ma zaŋe o viiri.
Currently Selected:
Jeelim 24: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
