Jeelim 18

Wɛ kaanem tiina de Levi dwi tiina totoŋa yam taane

1 Baŋa Wɛ déem ma ta de Aron o we:

“Nmo de n bia, ko woli de á chorro Levi dwi tiina bam mo jege se á ta‑á nii se nɔɔn-nɔɔno yé chɔge wara-jei chullu tem. Ko nam ná ye Wɛ kaanem tiina bam, nmo de n bia bam mo jege se á ta‑á nii ba baŋa ne, se ba yé ke ba chɔge. 2Nmo dé n bia ná yeini á toŋe wara-vwei dem totoŋa, se á pa se á chorro Levi dwi tiina bam taa tui ba woli abam wone ba taa toŋa. 3Ta‑á nii ba baŋa ne se ba taa toŋe wara-jei sem maama totoŋa yam. Nam yé pa-na se ba yi ba dwei wara-vwei dem wo-zela yam, naa kaanem dakaa kam. Á ná pɛ-ba chwoŋa pa se ba ke konto, abam de banto maama wó te mo. 4Banto mo wó woli abam wone se á ta‑á toŋe wara-jei sem totoŋa yam maama. Ko ná dae banto yerane, nɔn-gaa ba jege chwoŋa se o twɛ abam totoŋa jei sem.#Hiburu 9:6-7

5Nmo de n bia bam wó nii wara-vwei dem tete, de kaanem dakaa kam totoŋa baŋa ne, se amo bane daa yé zaŋe de Isarele tiina bam. 6Amo tete mo kuri Levi dwi dem Isarele dwia yam maama wone se ba taa ye a nyem. A laam ma kwei-ba a pa abam kaanem tiina bam se ba taa zeini abam. 7Nmo de n bia bam yerane mo wó taa toŋe kaanem tiina totoŋa yam. Abam mo jege chwoŋa se á ta‑á ke kaanem á pa-ne dakaa kam baŋa ne, ye á ta daare á gaale á zo wara-vwei gare-jale dem yiga ne. Kaanem totoŋe dem á na wó toŋe to ye pɛɛre mo amo na kwei a pa abam. Nɔn-gaa ná kwaane se o twɛ á totoŋa jei sem, kotu jege se o te mo.”

Wɛ kaanem tiina bam pɛɛra taane

8 Baŋa Wɛ ma ta de Aron o we:

“Amo kwei pɛɛra yalo maama Isarele tiina bam na yeini ba jaane ba tui ba pa-ne to mo a ke abam jeŋa ne se á ta‑á nii ya kaanem baŋa ne. Amo nam pɔɔre abam nyem mo ya wone se á ta‑á jega taa wuu. 9Ko ná ye pɛɛra yalo na tiini ya ye wose ye nɔɔna jaane ba tui ba pa-ne to, á wó pɔɔre á nyem pɛɛra yalo ba na wo zwɛ kaanem dakaa kam baŋa ne to wone mo. Ko ná ye ba wodiu pɛɛra yam, de ba wɛleera saarem pɛɛra yam, de ba wɛleere jene pɛɛra yam, nmo de n bia wó jwoŋi á nyem ya maama wone. 10Á nam jege se á maŋe wara-jei sem wone mo á di wonnu tem konto, te na tiini te ye wose to ŋwaane. Á baara bam maama mo jege chwoŋa se ba di-te. Nam pa-na se te taa ye wose abam tei ne.

11Ko ta ná ye pɛɛra yalo á na wó pɔɔre Isarele tiina pɛɛra yalo á na zeiŋi wɛɛne á yaare-ya amo yiga ne to wone, amo kwei tento se te taa ye nmo de n bia bam nyem mo. Nmo bu-baara de n bukwa jege chwoŋa se ba di-te taa wuu. N diga tiina bam wolo maama ná maŋe de chullu tem, kotu jege chwoŋa se o jwoŋi te wone o di.

12Ko ta ná ye pɛɛra yalo nɔɔna na yeini ba pɔɔre ba nuga wone, de ba Vini sa-sona wone, de ba wodiiru telo maama na yeini te lwoori yiga te ke to wone ba ja ba ba ba pa-ne to, amo kwei tento a pa abam mo. 13Wodiiru telo maama tega kam na yeini te ke ye nɔɔna ja-te ba ba ba pa-ne to wó taa ye abam nyem. N diga tiina bam wolo maama ná maŋe de chullu tem, kotu jege chwoŋa se o jwoŋi te wone o di.#Nwoŋim 23:19

14Woŋo kolo maama Isarele tiina bam na yɔɔre ba kwei ba ke amo jeŋa ne to de wó taa ye abam nyem. 15Isarele tiina bam bakeiri-kwe sem, de ba vare-kwe sem ba na yeini ba ja ba ba se ba pa-ne to maama ye abam nyem mo. Á nam wó pa se ba ŋwe sabu mo se ko leiri ba bakeiri-kwe sem yuu ne. Ko ta ná ye vare-kwe selo na wo maŋe de chullu tem to, ba wó ŋwe sabu se ŋwaane. 16Ba ná lage ba ŋwe sabu ba bakeiri-kwe sem ŋwaane, abam wó jwoŋi sɛkɛle sabu-dala yanu mo bu wolo na yi chana to ŋwaane. Sabu kom konto dunni jege se ko tɔge de wara-jei sem maŋem chekke na ye tei to mo. Sɛkɛle dedoa maa ye gɛra kuni finlei. 17Ko nam ná ye vare-kwea kalo na ye naao, naa pia, naa boŋo, ko dae se á jwoŋi sabu ko ŋwaane. Vara bam konto dwoŋi yɔɔre ba ye amo nyem mo. Á jege se á kwei ba jana á miisi kaanem dakaa kam yera ne mo, ye á daare á zwɛ ba lara kam á ma‑á ke zwɛɛm kaanem á pa-ne, se ka lwom dem taa ywomma de pa-ne. 18Vara bam konto nɔna nam ye abam nyem mo se á di, nenɛɛne á na jege chwoŋa se á di vara nyɔɔna yalo á na zeiŋi wɛɛne amo ŋwaane to, de ba jazem chwoa yam tei to. 19Pɛɛra yalo maama Isarele tiina bam na pɔɔre se ba kwei ba pa-ne to mo amo kwei-ya se ya taa ye nmo de n bia bam nyem, bakeiri de busankane maama. Ya wó taa ye abam nyem taa wuu. Amo ni dem konto wó yɔɔre de taa wora ko pae nmo de n kwaga kam se ko taa vei wuu.”

20 Baŋa Wɛ laam ma ta de Aron o we:

“Ba ná lage ba pɔɔre tega kam ba pa Isarele tiina bam, nmo bá‑n tɔge n jwoŋi n popɔra ka wone. Nmo daa bá‑n na n nyɔn-mage nyem, ko ná dae amo yerane. Amo tete nam mo yɔɔre a maŋe a pa‑m.#Nia Gulim 10:9; 18:2

21Ko ta ná ye Levi dwi tiina bam, amo wó pa ba jwoŋi ba ŋweero totoŋa yalo ba na jege ba toŋe wara-vwei dem wone to baŋa ne. Isarele tiina bam ná yeini ba le popɔra dedoa ba wonnu tem popɔre fuga maama wone se ba pa-ne, amo wó kwei amo popɔra kam konto a pa Levi dwi tiina bam.#2 Tigisim 31:4 22-23Banto yerane mo jege se ba taa nii wara-vwei dem baŋa ne, se nɔɔn-nɔɔno yé chɔge de chullu tem. Nɔn-gaa daa ba jege chwoŋa se o fɔɔre o yi wara-vwei dem. Wolo ná ke konto, kotu tusim dem wó taa wo o yuu ne ye o jege se o te mo. Levi tiina bam de jege se ba na waarem ko ŋwaane. Ni dento a na pɛ abam to wó taa wora mo taa wuu ko pae abam de á kwaga kam.

Levi tiina bam nam bá tɔge ba jwoŋi ba popɔra tega kam pɔɔrem baŋa ne, ne ba chorro Isarele tiina bam na wó na tei to. 24Ko na ye tei to, amo kwei Wɛ-teiri pɛɛra yalo Isarele tiina na jaane ba tui ba pa-ne to a pa-ba se ya taa ye ba popɔra. Konto ŋwaane mo a nam tage Levi tiina bam taane a we, ba bá tɔge ba na ba popɔra Isarele tiina tega kam pɔɔrem baŋa ne.”

25 Baŋa Wɛ laam ma ta de Moses o we:

26“Ta n bere Levi tiina bam we: Abam ná jwoŋi Wɛ-teiri pɛɛra yalo na ye abam nyem to Isarele tiina bam tei ne, se á de le popɔra dedoa fuga maama wone á pa Baŋa Wɛ. Ya wó taa ye abam tete Wɛ-teiri pɛɛra á na le banto Wɛ-teiri pɛɛra yam wone to mo. 27Baŋa Wɛ wó jeeli á Wɛ-teiri pɛɛra yam konto, nenɛɛne á ya ná kwei á tete mena naa sa-doora á pa‑o to mo. 28Á wó tɔge chwoŋa kam konto á le Isarele tiina bam Wɛ-teiri pɛɛra yam maama wone, se á de ke pɛɛra á pa‑o. Á ma‑á wó kwei abam tete Wɛ-teiri pɛɛra yam konto á pa Wɛ kaanem tu Aron. 29Á jege se á le wonnu telo na tiini te lana to á pɛɛra yam wone mo se te taa ye Baŋa Wɛ nyem. Pɔɔre-na-te á pa‑o.

30Ta ta de Levi tiina bam we: Abam ná pɔɔre wonnu telo na tiini te lana to á pa Wɛ, o wó jeeli á pɛɛra yam konto, nenɛɛne á ya ná kwei á tete mena naa sa-doora á pa‑o to mo. 31Abam de á diga tiina jege chwoŋa se á kwei kolo na daare á pɛɛra yam wone to á di mɛ seeni á na lage to. Kokuri to, pɛɛra yam konto ye á ŋweero telo á na nɛ wara-vwei dem totoŋa baŋa ne to mo. 32Á ná yɔɔre á le wonnu telo na tiini te lana to se te taa ye á Wɛ-teiri pɛɛra á pa‑o, á bá na chɔgem chullu tem seeni. Pɛɛra yalo Isarele tiina bam na jaane ba tui ba pa-ne to ye wose mo. Ko dae se á kwei-ya á di yɔɔ yɔɔ. Á ná tɔge chwei sem konto, á bá te chullu tem chɔgem ŋwaane.”

Currently Selected:

Jeelim 18: KBG

Highlight

Copy

Compare