Jeelim 14

Nɔɔna bam ywori Moses kwaga ne

1Isarele tiina kɔgɔ kom maama déem yɔɔre ba kaase tete dem konto ne ye ba keeri bɔge-bɔge. 2Ba maa jege Moses de Aron ba poona ye ba we, “Dé ya ná tege Ejipti wone, naa kagoa kanto wone, ko ya wó taa gara.#Nwoŋim 16:3 3Baŋa Wɛ jege debam o zoore Kanaan tega kam wone se bɛ mo? Ko ye se ba go debam mo, se ba daare ba vere dé kaana de dé bia ba taa tei. Dé ná jwoori Ejipti teo, ko gara!” 4Ba ma ŋɔɔne ba bere daane ba we, “Pa-na se dé kuri yiga tu se konto tu ja debam o jwoori Ejipti.”

5Moses de Aron maa vwi ba yibi sem tega ne ye nɔn-kɔgɔ kom maama déem jeeri ba yiga ne. 6Nun bu Josua de Jefunɛ bu Kaleb ma kaare ba gwaaro wo-chechɔgɔ ŋwaane. Banto balei déem tɔge ba wo balo na vei ba nii tega kam to wone mo. 7Ba ma ta de nɔn-kɔgɔ kom maama ba we, “Tega kalo dé na vei dé kaare dé nii to lana lanyerane. 8Baŋa Wɛ yi nam ná su dé kikia, o wó ja debam o zo te-ywoŋa kam konto wone, ye o daare o kwei-ka o pa debam. Ka ywomma mo de varem de kɔnɔ. 9Nam yé pa-na se dé lɔ Baŋa Wɛ kwaga ne. Yé kɔre-na foone de nɔɔna balo na zoore tega kam wone to, dé na wó wane-ba dé di to ŋwaane. Woro daa tera se ba duri ba seigi ko wone. Baŋa Wɛ nam wo dé tei ne. Yé pa-na se dé taa kɔre foone!”

10Isarele tiina kɔ-fɔrɔ kom boboŋa ma ja se ba dole Moses de Aron de kandwa ba go. Baŋa Wɛ ma pɔpɔ o chu o zege wara-vwei dem baŋa ne o veere o tete de o nenɔŋ-fɔrɔ kom o bere Isarele tiina bam maama.

Moses lwoori Wɛ o pa nɔɔna bam

11 Baŋa Wɛ ma ta de Moses o we, “Tetɛ mo amo wó peene a tete de nɔɔna banto? Ba wó taa jege-ne ba gwoona taa se ba vo ba maŋe yei ne mo? A ke wo-kamuna dedɛ ba tetare ne, ye ba ta ve-ne. 12Amo laam nam lage a chɔge-ba de jawe-chɛɛro mo. A wó pa se ba dwi dem ti se a daare a pa nmo ji dwi-doore kwo. Dwi delo na wó zege nmo yera ne to wó taa daga, ye de ta dana de dwoi banto na ye tei to.”

13Moses ma leiri Baŋa Wɛ o we, “Nmo nam ná ke konto, Ejipti tiina bam wó ni ko ŋwa. Nmo déem kwei n dam-fɔrɔ kom n vere n nɔɔna bam Ejipti tiina bam jeŋa ne mo. 14Banto wó pa se balo na zoore Kanaan tega kam ne to lɔre ko ni ne. Ba nam maŋe ba yei we nmo, debam Tu Baŋa Wɛ wom wo n nɔɔna bam tei ne. Ba lɔre we n veere n tete jaja n bere debam, ye n yeini n pa n kunkwoŋo kom wo dé baŋa ne. Ba ta lɔre we n tɔge debam yiga mo ne kunkwoŋo na zege deiki to wea maama ne, ye n daare n ji ne mini tei tete ne. 15Nmo nam ná zaŋe n go n nɔɔna bam bedwe baŋa ne, dwi-gɛ tiina balo na yei nmo ni ne to wó ta we, 16‘Ko ye ba Baŋa Wɛ wom na ware se o ja-ba o zo tega kalo wone o na gwoni ni se o pa-ba to ŋwaane mo o go-ba kagoa kam wone.’ 17Konto ŋwaane, de Teiru Baŋa Wɛ, pa se n dam-kamunu kom bere jaja. Nmo maŋe n ta n tete taane we:

18 Baŋa Wɛ yeini o peene o bane.

O swono kom nam ba tia.

O maa kwei nɔɔna wɛleera de ba tusim

o yage o maa chɛ-ba.

Se ko ná ye balo na gɛ bora to,

o yeini o waare-ba de ba bia maama mo

se ko yi ba naaro,

de ba na-jwooru dwia yatɔ naa yana laŋa ne.#Nwoŋim 34:6-7

19Nmo swono kom na seene ko gaale to ŋwaane, a lwoori‑m se n kwei nɔɔna banto wɛleera n ma n chɛ-ba. Ta ke n pa-ba nenɛɛne n na maŋe n yeini n ke tei de-ba ko zege ba na nwoŋi Ejipti teo ne to.”#Nwoŋim 32:11

20 Baŋa Wɛ ma leiri Moses o we:

“A sɛ nmo wɛ-lworo kom ye a kwei ba wɛleera a yage a chɛ-ba. 21Ne amo na jege ŋwea taa wuu tei ye a dam dem wó ba de lɔre jaja logo baŋa jei maama wone tei to, a nam dugi de a tete mo we, 22ko ná ye nɔɔna balo na nɛ a nenɔŋ-fɔrɔ kom de wo-kenkagela yalo a na ke Ejipti wone dedaane kagoa kam wone to, banto ve se ba sɛ amo ni, ye ba ta kwaane se ba faŋe-ne ba nii kuni dedɛ. 23Mo kokuri ba wolowolo bá zo tega kalo a na gwoni ni de ba nabaara bam se a pa-ba to wone. Balo maama na gwooni amo to bá na tega kam konto. 24Amo tontoŋeno Kaleb boboŋa nam ye ya yera mo de o dwonna bam boboŋ-balwaaro tem. O kwei o bochare maama mo o ma o tɔge-ne. Konto ŋwaane amo wó pa se o zo tega kalo o na vei o nii to se o de o kwaga kam taa tei-ka.#Jeelim 26:65; Josua 14:9-14 25Tɔ. Amaleki tiina de Kanaan tiina bam na zoore bwollu laŋa kam ne ye ba che á chwoŋa to ŋwaane, jwa tetete se á maama jwoori á pipiri á mage á yuni kagoa kam seeni se á kwei Nane-soŋo chwoŋa kam á ta‑á via.”

26 Baŋa Wɛ daa ma ta de Moses de Aron o we:

27“Tetɛ mo amo wó peene a tete de puseŋ-nyena banto? Ba wó taa jege-ne ba poona taa se ba vo ba maŋe yei ne mo? Amo nigi Isarele tiina bam pompona kam ba na tiini ba ke to. 28Konto to, ta-na á bere-ba we:

‘Ne amo Baŋa Wɛ na jege ŋwea tei to, ko ye chega mo we a seene a lage a ke abam ne á na tage tei ye a ni to mo. 29Abam wó te kagoa kanto wone mo se á yera yam faare tega kam jei maama ne. Á baara balo maama na yi bena finlei ba daŋe ye ba tɔge ba wo jeelim dem wone to wó te mo, ba na poone amo to ŋwaane. 30Abam wolowolo bá zo tega kalo amo déem na dugi duuri se a pa abam se á jeini da to. Jefunɛ bu Kaleb de Nun bu Josua yerane mo wó zo da. 31Ko nam ná ye á bia balo á na jege ba lwia we tega kam tiina wó vere-ba ba taa tei to, a lage a pa se ba zo tega kalo abam na ve se á jwoŋi to mo ba taa tei. 32Se ko daare abam tete, á wó te kagoa kanto wone mo 33á daare á bia bam. Banto maa wó da á zwabania kikia yam ŋwaane ba beeri kagoa kanto wone ye ba yaare taa, bena finna, se ko yi maŋa kalo abam nɔn-kweero tem maama na wó te ba ti to. 34Á na kwei da finna á kaare tega kam maama á nii to, mo amo de kwei dɛ maama se de taa ye bene á na wó yaare de wone to. Amo wó pa se á yaare bena finna á wɛleera yam ŋwaane, se á ma‑á lɔre we amo nwoŋi á kwaga ne.’

35Amo Baŋa Wɛ mo tage konto! A wó yɔɔre a pa kolo maama a na tage to ba puseŋ-nyena banto baŋa ne, ba na ke ni daane se ba yaale amo to ŋwaane. Ba lage ba te kagoa kanto wone mo.”

36Ko ná ye Moses déem na toŋe nɔɔna balo se ba vo ba ŋɔ ba nii tega kam ye ba jwoori ba ŋɔɔne ta-balwaaro ka ŋwaane pa se nɔn-kɔgɔ kom maama poone‑o to, 37Baŋa Wɛ kwei jawe-chɛɛro mo o de banto wone pa se ba te. 38Balo na vei ba nii tega kam to, ko ye Nun bu Josua, de Jefunɛ bu Kaleb yerane mo wori ba wone.

Nɔɔna bam gɛ chwoŋa se ba zo ba jwoŋi tega kam

39Moses déem na jaane Baŋa Wɛ kwora kam o ba o lwoni o bere nɔɔna bam to, mo ba wo chɔge ye ba keeri lanyerane. 40Tega na poore tetete to, mo ba zaŋe se ba vo Kanaan zwonnu laŋa kam. Ba maa we, “Dé tiini dé tusi dedaane dé na ve Baŋa Wɛ ni dem to. Dé laam ti yiga se dé vo dé kwei tega kam Baŋa Wɛ na gwoni ni se o pa debam to.”

41-42Moses ma leiri-ba o we, “Abam nam ve Baŋa Wɛ ni se bɛ? Yé véi-na, se ko bá maŋe ko pa abam. Baŋa Wɛ na tere á tei ne to ŋwaane, á dona wó wane abam ba di mo. 43Amaleki tiina de Kanaan tiina bam ná nwoŋi ba kwaare jara de abam, ba wó go abam, á na ywori Baŋa Wɛ kwaga ne ye o daa tere á tei ne to ŋwaane.”

44De konto de, nɔɔna bam ta ma fe ba tete ye ba yɔɔre ba vo ba di zwonnu laŋa kam seeni. Moses wo dɛ de-ba o vo. Baŋa Wɛ ni-gwonim dakaa kam de nam wo nwoŋi ba zoorem jeiga kam ne. 45Amaleki tiina de Kanaan tiina bam déem ma nwoŋi ba zwonnu jei sem ne ba ba ba jeeri-ba de jara. Ba ma di Isarele tiina bam ye ba pare-ba ba vo ba yi Horama teo.

Currently Selected:

Jeelim 14: KBG

Highlight

Copy

Compare