Chullu 9

Wɛ kaanem tiina bobo ba totoŋa

1Da nana dɛ dem ne ye ba ke kaanem tiina kwɛɛm chulu kom ba ti to, mo Moses bwoŋi Aron, de o bu-baara bam, de Isarele nakwa bam se ba jeeri. 2O ma ta Aron o we, “Beeri na-bala na ba jege gɛɛ ka yera ne to se n ma‑n ke wɛleere saarem kaanem n pa Baŋa Wɛ, se n daare n beeri pi-bala na ba jege gɛɛ to de se n ma n ke zwɛɛm pɛɛre kaanem n pa‑o. 3Nam ta de Isarele tiina bam se ba beeri bo-bala wɛleere saarem kaanem ŋwaane. Ba ta maa wó beeri na-bala na ye bene, de pi-bala na ye bene to mo se ba ma ba ke zwɛɛm pɛɛre kaanem. Te nam ba jege se gɛɛ taa wo te yera ne. 4Ba ta wó beeri nabea, de pi-bea mo se ba ma ba ke yazura pɛɛre kaanem ba pa Baŋa Wɛ. Ba ta wó ja muni pɛɛre delo nuga na viiri de wone to se ba ma ba ke kaanem. Kokuri to, Baŋa Wɛ zem wó ba o veere o tete ba tetare ne.”

5Ba ma seene ba ja kolo maama Moses na pɛ-ba ni se ba ja ba ba to ba jeeri Wɛ wara-jei sem manchwo-peena yam ne. Isarele tiina kɔ-fɔrɔ kom maama de ma fɔɔre ba yi jei sem se ba zuli Baŋa Wɛ. 6Moses déem ma ta de-ba o we, “Tento maama tɔge ni delo Baŋa Wɛ na pɛ abam se á ke to, se o laam ba o veere o tete de o nenɔŋ-fɔrɔ kom abam yiga ne.”

7O ma daare o ta Aron o we, “Fɔɔre n yi kaanem dakaa kam se n ke wɛleere saarem kaanem dem, de zwɛɛm pɛɛre kaanem dem, se n tɔge tento baŋa n ma n le nmo tete lwarem dedaane nɔɔna bam lwarem Wɛ yiga ne.#Hiburu 7:27 Ta kwei Isarele tiina vara bam n ma‑n ke kaanem ba ŋwaane, se n le ba lwarem Wɛ yiga ne, nenɛɛne Baŋa Wɛ na pɛ ni se n ke tei to.”

8Aron ma seene o yi kaanem dakaa kam ye o kwei na-bala kalo na wora o tete wɛleere saarem ŋwaane to o gwoni ka ba. 9O bia bam ma ja ka jana ba yi o tei ba pa‑o, ye o kwei o noa o laŋe jana bam. O laam ma kwei-ba o taare kaanem dakaa kam nyea yam, ye o daare o lwo balo na daare to kaanem dakaa kam teiŋa ne. 10O ma lɔɔre na-bala kam lara kam, de ka tapwale-bia bam, de chwɛ dem kuri seeni dem maama o kwei-te o zwɛ kaanem dakaa kam baŋa ne, nenɛɛne Baŋa Wɛ na pɛ Moses ni se ba ke tei to. 11Ko nam ná ye varem wom nɔna yam, de o tankɔlɔ kom, o jaane-te mo o nwoŋi ba tigisim jeiga kam o vo dáa o zwɛ.

12Ko kwaga ne, Aron ma kwei varem wolo na wora zwɛɛm pɛɛre kaanem ŋwaane to o gwoni o ba. O bia bam ma ja ka jana bam ba vo ba pa‑o. O de ma kwei-ba o dole dole o yage kaanem dakaa kam sɛ sena sem ne. 13Ba ma kwei varem wom nɔna yam yera yera ba ja vo ba pa‑o, de o yuu kom de. O ma zwɛ te maama kaanem dakaa kam baŋa ne. 14O ta ma zare varem wom wo-zela yam, de o nɛ sem, ye o laam kwei te maama o daŋe zwɛɛm pɛɛre dem baŋa ne o zwɛ o pa Wɛ.

15Aron déem ta ke kaanem nɔɔna bam maama ŋwaane. O ma kwei bo-bala kalo na wora ba wɛleere saarem ŋwaane to o gwoni ka ba, ye o ke kaanem o pa Wɛ se o saare ba wɛleera, nenɛɛne o na ke tei dedaane o tete nyem dem to.

16O laam ma kwei zwɛɛm pɛɛre dem o ke kaanem se ko maŋe de de chwoŋa kam na ye tei to. 17O déem ta ma kwei wodiu pɛɛre dem de o woli da. O ma zwɛ muni jaguli-yi de wone o kwei o woli dɛ maama ba na ke zwɛɛm pɛɛre delo tetete to wone, ye o zwɛ-te kaanem dakaa kam baŋa ne.

18O ta ma kwei na-bala kam de pi-bala kam na wora se se ke yazura pɛɛre kaanem nɔɔna bam ŋwaane to o gwoni se ba. O bia bam ma ja vara bam jana ba vo ba pa‑o. O de ma kwei-ba o dole dole o yage kaanem dakaa kam sɛ sena sem ne. 19Ba laam ma tigisi lara kalo maama na wo na-bala kam de pi-bala kam yera ne to. Ko maa ye vara bam nabili-bworu tem, de lara kalo na meeli ba wo-zela yam yera ne to, de ba tapwale-bia bam, de ba chwa yam kuri seeni mo. 20Tento maama mo ba déem kwei ba daŋe vara bam nyɔɔna baŋa ne, ye Aron kwei lara kam o zwɛ kaanem dakaa kam baŋa ne. 21Ko daare vara bam nyɔɔna yam, de ba jazem chwa yam, Aron déem zeiŋi-te wɛɛne mo, se te ta ye pɛɛre te pae Baŋa Wɛ. Ko nam ke nenɛɛne Moses na pɛ-ba ni se ba ke tei to mo.

22Aron déem na ke kaanem dem dwi maama o ti to, o ma zeiŋi o je o jeeri Isarele kɔ-fɔrɔ kom ye o kwei Wɛ zaane o ma swɛ ba swolim. O laam ma zege kaanem dakaa kam teiŋa ne o jwoori o tu tega.

23Moses dedaane Aron ma zo wara-vwei dem wone. Ba daa na nwoŋi to, mo ba kwei Wɛ zaane ba ma swɛ nɔɔna bam swolim. Baŋa Wɛ ma veere o nenɔŋ-fɔrɔ kom nɔɔna bam maama yiga ne. 24Min-vogo ma pɔpɔ ko nwoŋi Baŋa Wɛ tei ne ko chu ko di zwɛɛm pɛɛre dem, dedaane lara kam maama na wo kaanem dakaa kam baŋa ne to kula!#1 Pwa 18:38; 2 Tigisim 7:1-3 Nɔɔna bam maama na nɛ konto to, mo ba bage de kwor-dɛa ye ba daare ba vwi ba yibia tega ne ba zuli Wɛ.

Currently Selected:

Chullu 9: KBG

Highlight

Copy

Compare