Chullu 20

Tusim na jege waarem tei to

1 Baŋa Wɛ daa ma ta Moses o we:

2“Ta de Isarele tiina bam we: Abam balo na ye Isarele dwi tiina de veira balo na zoore á wone to wolo maama ná kwei o bu o ke kaanem o pa Moleka jwoni dem, kotu jege se o te mo. Á teo nɔn-kɔgɔ kom maama wó dole‑o de kandwa mo ba go. 3Amo wó nwoŋi kotu kwaga ne se o daa yé tɔge o woli Isarele dwi dem wone. Kokuri to, o ke o chɔge amo wara-jei sem mo ye o daare o yaale amo yere dem na ye wose to, de o na kwei o bu o ke Moleka jwoni dem jeŋa ne to ŋwaane. 4Á teo kom nɔɔna bam yiga nam ná tera de konto tu na ke keim-lɔŋɔ kolo to, ye ba ve se ba go‑o ko ŋwaane, 5amo tete mo wó nwoŋi kotu dedaane o sɔŋɔ tiina bam maama kwaga ne se ba daa yé tɔge ba woli ba dwi tiina bam wone. Amo ta wó ke konto de balo maama na dɛ ba zuli Moleka ba daare amo to mo.

6Abam wolo ná ywori amo kwaga ne o daare o vo yi-nara naa chichiri vora tei se ba veere wonnu ba bere‑o, amo wó nwoŋi konto tu kwaga ne. A nam wó le‑o se o daa yé tɔge o woli Isarele dwi dem wone. 7Pɔɔre-na á tete de wo-digiru maama, se á ta‑á ye wose. Kokuri to, amo mo ye abam Tu Baŋa Wɛ wom. 8Ta‑á sɛ-na amo bera yam, se á ta‑á tɔge-ya. Kokuri to, amo mo ye Baŋa Wɛ. A maa pae se abam ye wose.

9Wolo maama ná sɔɔle lwarem o pa o kwo naa o nu, konto tu jege se o te mo. Ko nam wó taa ye o tete yiga mo de o na wó te to.

10Nɔɔno ná ke kabwoŋa de o dwoŋi kaane, se ba go baaro wom de kaane wom maama. 11Nɔɔno nam ná peini de o kwo kaane, o yaale o kwo wom mo konto. Baaro wom de kaane wom maama mo jege se ba te. Ko wó taa ye ba tete yiga de ba na wó te to. 12Nɔɔno nam ná peini de o bu-kaane, ba maama balei jege se ba te mo. Ba yɔɔre ba toŋe kolo na jege chaveera to mo. Ko wó taa ye ba tete yiga de ba na wó te to. 13Baaro de o dwoŋi baaro ná peini daane, ne baaro na yeini o peini de kaane tei to, ba yɔɔre ba toŋe wo-zɔɔne mo. Ba maama balei jege se ba te mo. Ko wó taa ye ba tete yiga de ba na wó te to. 14Nɔɔno ná di kaane ye o ta swo o kaane wom nu o woli da, ko ye puseŋa kikia mo konto o kea. Ba jege se ba zwɛ banto batɔ maama mo ba go. Yé sɛ-na se keim-lɔŋɔ kom konto ke á tetare ne.

15Baaro wolo ná ke sare-peiga de varem, kotu jege se o te mo, se á daare á go varem wom de. 16Kaane nam ná kwei o tete o pa varem peini ded‑o, á wó go kaane wom de varem wom maama mo. Ba jege se ba te mo. Ko wó taa ye ba tete yiga de ba na wó te to.

17Nɔɔno ná swo o nakɔ, ba ná ye nu daane, naa kwo daane mo de, ye ba peini daane, ba yɔɔre ba ke chaveera keim mo. Ba wó ja-ba ba vo ba dwi tiina yiga ne mo, ye ba zeili-ba se ba daa yé tɔge ba woli ba dwi tiina bam wone. Baaro wom na peini de o nakɔ wom to ŋwaane, ko wó ni wonto mo. 18Nɔɔno ná peini de kaane wolo ta na jege o chana zarem o ke to, ba maama tusi chullu tem seeni pa se ba digiri. Ba jege se ba zeili ba maama mo, se ba daa yé tɔge ba woli ba dwi tiina bam wone.

19Ko dae se baaro peini de o nu zembaaro, naa o nu nyaane, naa o kwo nakɔ. Wolo ná ke keim dem konto, kotu yaale o choro mo. Ba maama maŋe se ba na waarem mo. 20Nɔɔno nam ná peini de o kwo zembaaro kaane, naa o kwo nyaane kaane, o yaale o kwo choro kom mo. Baaro wom de kaane wom yɔɔre ba maŋe se ba na waarem mo. Ba nam bá na dwi. 21Nɔɔno ná swo o zembaaro kaane, naa o nyaane kaane, ye o peini ded‑o, kotu jege digiru Wɛ chullu tem seeni mo, ye o ta yaale o choro kom. Ba nam bá na dwi.

22Nam yɔɔre á ta‑á tɔge amo bera yam de a nia yam, se á ta‑á ke ya maama. Abam ná wo ke konto, amo na lage a ja abam a zo tega kalo wone to wó ve abam mo. 23Ko nam ná ye dwi-gɛ tiina balo amo na lage a zeili-ba se ba daare tega kam ba pa abam to, se á yé ta‑á tɔge-na ba chwei sem. Amo nam chuli-ba mo, ba na ke wo-zɔɔna yanto dwoŋi to ŋwaane. 24Amo nam gwoni ni mo de abam se a kwei ba tega kanto a pa abam se á ta‑á tei-ka ye á zoore ka wone. Tega kam konto tiini ka ywomma de varem de kɔnɔ. Amo mo ye abam Tu Baŋa Wɛ wom. A ma pɔɔre abam se á ta‑á ye á yera de dwi-gɛ tiina maama. 25Konto ŋwaane abam jege se á ta‑á pɔɔre vara de zuna balo na maŋe de chullu tem to, de balo na jege digiru chullu tem seeni to daane mo. Nam yé digiri-na á tete de wonnu telo amo na pɛ se te taa ye wo-zɔɔna te pae abam to, ne te ná ye vara de zuna de tega-veila de. 26Pɔɔre-na á tete amo ŋwaane se á ta‑á ye wose. Kokuri to, amo Baŋa Wɛ wom ye wose mo. A ma pɔɔre abam se á yɔɔre á ta‑á ye á yera de dwi-gɛ tiina maama, se á daare á ta‑á ye amo tete nɔɔna bam.

27Abam wone baaro wolo, naa kaane wolo ná ye yi-naro naa chichiri voro, kotu jege se o te mo. Á wó dole-ba de kandwa mo á go. Ko wó taa ye ba tete yiga de ba na wó te to.”

Currently Selected:

Chullu 20: KBG

Highlight

Copy

Compare