Chullu 11

Wodiiru telo na maŋe de dim de telo na wo maŋe to

Nia Gulim 14:3-21

1 Baŋa Wɛ déem ma ta Moses de Aron o we:

2“Ta-na de Isarele tiina bam we: Vara balo na kare ba vei tega baŋa ne to wone, abam jege chwoŋa se á di vara banto dwi mo:

3Á wae á di varem wolo maama napɔɔna na lɔge belei ye ba yeini ba done gaao ba guli ba jwoori ba done to.

4-6Vara badwonna nam done gaao ba guli ba jwoori ba dona, ye ba napɔɔna laam wo lɔge belei. Ko dae se abam di-ba. Kona, de pe-ware, de zwona ye konto dwoŋi mo. Vara bam konto wo maŋe de chullu tem. 7Teira de nam wo maŋe se á di-ya. Ya napɔɔna lɔge belei chekke, ye ya laam ba done gaao ya gula ya jwoori ya dona. 8Vara bam konto maama dwi dae se á done ba nɔna. Ba ná tega, bere á yé dwei-ya. Ba wo maŋe de chullu tem abam tei ne.

9Ko ná ye wonnu telo na wo naneero tem wone, naa bwi sem wone to, ywona yalo maama na jege nabili-pelwaro, ye poro ta kwoli te yera to, á jege chwoŋa se á di-ya. 10Ko daare ko ná ye wonnu telo maama na zoore na wone ye te ba jege nabili-pelwaro dedaane poro te yera ne to, te ná maŋe te ye ywona naa wo-korro mo, wonnu tento dwi ye wo-zɔɔna mo te pae abam. 11Konto ŋwaane, abam dae se á di-te, nam yé dwei-na te wo-tegero de. 12Woŋo kolo maama na zoore na wone to ná ba jege nabili-pelwaro dedaane poro, ko ye wo-zɔɔne mo abam tei ne.

13Ko ta ná ye zuna, á wó chuli ba dwia yanto mo. Ba dae se á di-ba, ba na ye wo-zɔɔna to ŋwaane.

Maaro, de duura dwi maama, 14de chilachi, de kalwonnu dwi maama, 15de bachangaaro dwi maama, 16-18de kunkwooru dwi maama, de lenlane, de naneo zuna, de kawuli dwi maama, de bugacheeni, de nakelakɔro, 19de buga ni zuna, de kabakollo dwi maama, de pɛbia, dedaane jenjwaano.

20Wo-korro telo na jege vɔna ye te kare te vei tega ne to wó taa ye wo-zɔɔna abam tei ne. 21Á nam jege chwoŋa se á di wo-korro tem konto dwia yalo nɛ sem na pae te jwolisa tega ne to. 22Te maa ye kayere, de manchwanno, de charebombore, de wo-korro tento dwi. Tento maama maŋe se á di-te. 23Se ko ná daare wo-korro telo na jege vɔna ye te ta kare te tuuri tega ne to, te ye wo-zɔɔna mo te pae abam.#11:1-23 Dé bá wane dé lɔre vara, de zuna, de wo-korro yera yam maama chekke, ba na ye faŋa faŋa nyena to ŋwaane.

Wo-zɔɔna chullu tem

24Wonnu tem konto maama ná tega, te yera yam wó lɔgese wolo maama ná dwei-ya, pa se kotu taa jege digiru Wɛ chullu tem seeni se ko yi dedaan-ni maŋa. 25Wolo ná kwei te wo-teko, kotu maŋe se o zare o gwaaro mo, se dedaan-ni maŋa ná yia, se o laam kwɛ o tete de chullu tem.

26Vare-dwi delo maama na wo lɔge de napɔɔna yam tetare ne belei chekke to, naa dwi delo na ba guli gaao o jwoori o done o liri to wo maŋe de chullu tem. Wolo maa ná dwei wo-teko konto dwi, kotu de jege digiru Wɛ chullu tem seeni mo. 27Vara balo maama na vei nɛ sena baŋa ne ye ba mae jataala mo ba via to wo maŋe de Wɛ chullu tem. Wolo maa ná dwei ba wo-tegero, kotu de wó taa jege digiru chullu tem seeni mo se ko yi dedaan-ni maŋa. 28Wolo maama ná zeŋe vara bam konto wo-teko, kotu jege se o zare o gwaaro mo se dedaan-ni maŋa ná yia, se o laam kwɛ o tete de chullu tem, vara bam konto na ye wo-digiru te pae abam to ŋwaane.

29Ko nam ná ye tega-veila, te dwia yanto mo ye wo-digiru te pae abam:

Twarro, de baywoa, de titwoa, de balworu dwi maama, 30de kachelachoro, de kweeru, de balei, de bwe, de puswollu, de manlɛ.

31Tega-veila maama wone, wonnu tem konto ye wo-digiru te pae abam. Te dwi ná tega ye nɔɔno wolo ná dwei-ko, kotu de wó taa jege digiru Wɛ chullu tem seeni se ko yi dedaan-ni maŋa. 32Wonnu tem konto nam ná tega ye te to woŋo kolo maama baŋa ne, ko de wó taa jege digiru mo. Ko ná ye daa mo ba mɛ ba ke-ko, naa gɔrɔ, naa tankɔlɔ, naa gare-nyenyaaro de, ba nam ná jege-ko ba toŋe totoŋe delo to maama de, ba jege se ba misi-ko na wone mo, se dedaan-ni maŋa ná yia, se ko laam kwɛ de chullu tem. 33Wo-digiru tem konto dedoa ná tega ye ko to kɔɔro wone, woŋo kolo maama na wo kɔɔro wom wone to de wó taa jege digiru. Ba jege se ba lɔ kɔɔro wom mo. 34Na ná zege kɔɔro wom konto ne ye ba lwo ba dwei wodiu kolo ya na maŋe se ba di-ko to, ko de daa bá maŋe se ba di-ko. Wo-nyɔɔro telo maama na wo kɔɔro wom konto wone to de nam jege digiru Wɛ chullu tem seeni mo. 35Wo-digiru tem ná tega ye te to te dwei woŋo kolo maama, ko de wo taa jege digiru mo. Ko ná ye kura, naa kambia mo te dwei, abam jege se á chɔge kura yam, naa kambia kam mo. 36Ko nam ná ye buli-yi, naa gwoŋo kolo ba na koge se nɔɔna taa vei ba mɔɔne na ko wone to, ye wo-teko kom ná to jei sem konto wone, se bá taa jege digiru. Se wolo nam ná liiri wo-teko kom, kotu mo wó taa jege digiru Wɛ chullu tem seeni. 37Wo-digiru tem konto ná tega ye te to wo-dwa balo abam na lage á du to wone, wo-dwa bam ta bá taa jege digiru. 38Se wo-dwa bam ná wo na wone ba bugi mo, ye wo-teko kom ná to ba wone, wo-dwa bam wó taa jege digiru te pae abam.

39Varem wolo na maŋe de dim to ná tega ye wolo dwei‑o, kotu wó taa jege digiru Wɛ chullu tem seeni mo se ko yi dedaan-ni maŋa. 40Wolo ná di varem wom konto nɔna yadwonna, kotu wó zare o gwaaro mo, se dedaan-ni maŋa ná yia, se o laam kwɛ o tete de chullu tem. Wolo de ná kwei varem wom, o de wó zare o gwaaro mo, se dedaan-ni maŋa ná yia, se o de laam kwɛ o tete de chullu tem.

41Ko nam ná ye tega-veila, te maama ye wo-zɔɔna mo. Ko chula se á di-te. 42Tento ná tuura, naa te ná vei nɛ sena baŋa ne, naa te ná jege nɛ dedɛ mo te via de, ko chula se á di-te. Te ye wo-zɔɔna mo. 43Nam yé chɔge-na á tete de-te, se á tɔge te ŋwaane á ji wo-digiru. 44Amo mo ye abam Tu Baŋa Wɛ wom. Pɔɔre-na á tete de wo-digiru maama, se á ta‑á ye wose. Kokuri to, amo tete ye wose tu mo. Nam yé chɔge-na á tete de tega-veila, naa wo-korro telo na kare te vei tega kam baŋa ne to. 45Amo mo ye Baŋa Wɛ wom. A déem jaane abam a nwoŋi Ejipti ne se a taa ye abam Tu Wɛ wom mo. Nam ta‑á ye-na wose, amo tete na ye wose tu to ŋwaane.”#1 Piita 1:15-16

46Wɛ nia yanto wora se abam ta‑á yei vara, de zuna, de wonnu telo na zoore na wone to, de tega-veila ni ne mo. 47Abam maa wó da ya baŋa se á wane á pɔɔre kolo na jege digiru Wɛ chullu tem seeni ye ko wo maŋe de dim to, dedaane kolo na maŋe de chullu tem ye á jege chwoŋa se á di-ko to.

Currently Selected:

Chullu 11: KBG

Highlight

Copy

Compare