Galatia 3

Dé na wó na chega Wɛ tei ne tei to

1Abam Galatia tiina boboŋa tera á yuu ne. Bera mo tulimi abam pa se á swa daa tera? Ba déem tɔɔle ba bere abam jaja ko na ke tei ye Yezu Krista te dagara kam yuu ne to. 2Amo lage se a bwei abam woŋo kodwoŋi yerane mo a nii: Abam déem na sɛ Wɛ Sin-laao kom se ko taa wo á tei ne to, bɛ mo pɛ ko ke? Ko ye abam kikia na tɔge Wɛ ni-kaana yam to ŋwaane mo na? Aawo. Ko ye á na sɛ o kwor-ywoŋa kam á na nigi to ŋwaane mo. 3Bɛ mo ye á boboŋa jei konto? Abam na bobo se á tɔge Yezu to, á dɛ Wɛ Sin-laao kom dam ŋwaane mo á tɔge‑o. Á laam boŋe se á pipiri á da á tete dam ŋwaane mo se á vo á ti na? 4Wonnu telo maama na yi abam to wó ji kafɛ mo á tei ne na? Aawo. Te bá wane te ji kafɛ! 5Wɛ nam woli abam de o Sin-laao kom, ye o daare o ma o dam o ke wo-kenkagela á tei ne. O na ke konto to, ko ye á kikia na tɔge o nia yam to ŋwaane mo na? Aawo. Ko nam ye á na sɛ o kwor-ywoŋa kam á na nigi to ŋwaane mo.

6Ko ná ye Abaraham, ko popone Wɛ tɔnɔ kom ne ko we, Wonto ke o wo-dedoa de Baŋa Wɛ, ye konto ŋwaane mo Wɛ pɛ o na chega.#Pulim 15:6 7Konto wó pa á lɔre we, Abaraham dwi tiina chekke ye balo na ke ba wo-dedoa de Wɛ to mo. 8Faŋa faŋa to ba maŋe ba popone Wɛ tɔnɔ kom ne we, Wɛ wó pa dwi-gɛ tiina de na chega o tei ne, ba na ke ba wo-dedoa ded‑o to ŋwaane. Mo kokuri Wɛ ma pa Abaraham wuuri o lɔre o kwor-ywoŋa kam na wó taa ye tei to. O ma ta ded‑o o we, “Amo wó da nmo baŋa ne mo a swɛ logo baŋa dwi maama swolim.”#Pulim 12:3; 18:18 9Konto to, balo maama de na ke ba wo-dedoa de Wɛ, ne Abaraham déem na jege wo-dedoa tei to mo wó jwoŋi swolim Wɛ tei ne.

10Ko nam ná ye balo na tiini ba jege boboŋa we, ba wó na chega Wɛ ni-kaana yam tɔgem ŋwaane to, Wɛ sɔla ta wó taa wo ba baŋa ne mo. Ko popone Wɛ tɔnɔ kom ne ko we, “Wolo maama ná wo sɛ se o toŋe o tɔge kolo maama na popone ko ke Wɛ nia tɔnɔ kom wone to, Wɛ wó sɔɔle lwarem o yage kotu baŋa ne.”#Nia Gulim 27:26

11Dé nam yei lanyerane we, nɔɔn-nɔɔno bá na chega Wɛ tei ne de o ná tɔge o nia yam yerane. Ko nam popone we, “Wolo na jege chega Wɛ tei ne to wó na ŋwea o wo-dedoa kam ŋwaane.”#Habakuki 2:4 12Wɛ ni-kaana yam nam ba tɔge wo-dedoa keim na ye tei to. Ya nam tɔge nɔɔno kikia na ye tei to mo, ne ko na popone we, “Wolo kikia na yɔɔre ya tɔge Wɛ ni-kaana yam to wó na ŋwea ya baŋa ne.”#Chullu 18:5

13Dé ya lage dé na chɔgem, dé kikia na wo tɔge Wɛ ni-kaana yam maama to ŋwaane. Yezu Krista nam tege dagara kam yuu ne mo o ma ŋwe de wɛleera jene, ye o le debam chɔgem dem konto wone. Wɛ ma pa se Yezu leiri debam yuu ne, ye o na chɔgem delo na maŋe de debam to. Ko ye nenɛɛne ko na popone we, “Wolo maama ba ná leigi daa yuu ne ba go, Wɛ sɔɔle lwarem mo o yage kotu yuu ne.”#Nia Gulim 21:23 14Yezu Krista déem sɛ se o na chɔgem dem konto, se ko wane ko pa dwi-gɛ tiina de na chwoŋa se ba na Wɛ swolim o ŋwaane, ne Abaraham na nɛ Wɛ swolim tei to. Konto ŋwaane, debam wó wane dé jwoŋi Wɛ Sin-laao kom, ne Wɛ na pwooli se o pa debam tei to, dé na ke dé wo-dedoa dé sɛ‑o to ŋwaane.

Wɛ ni-kaana yam kuri na ye tei to

15A nu-bia bam, a lage a ma logo baŋa chega mo a ma bere abam Wɛ chega kam na ye tei to. Nɔɔna balei ná ke ni-sɛɛm, ye ba ná gwoni ni ba pa daane, nɔɔn-nɔɔno daa bá wane o chɔge ba ni dem konto, naa o ke woŋo kodwoŋi o daa woli da. 16Wɛ déem pwooli se o zeini Abaraham de wo-laaro, se o daare o zeini o dwi dem de. Ko na popone Wɛ tɔn-dwoŋo kom ne tei to, ko wo popone we, “o dwi tiina.” Ko nam popone we, “o dwi dem” mo.#Pulim 12:7; 13:15; 24:7 Konto ba bere we nɔɔna dedɛ taane mo ba ŋɔɔna. Ko nam ye nɔɔno dedoa taane mo, ye dwi tu wom konto ye Yezu Krista mo. 17Wɛ déem gwoni ni de Abaraham ye o pwooli kampwola de ŋwaane. Konto kwaga ne, bena bia yana de fintɔ (430) laam na kɛ to, o daa ma kwei o ni-kaana yam o pa Juu tiina. Amo na lage se á lɔre kolo to mo ye we, Wɛ ni-kaana yam konto ware ya chɔge ni-gwonim delo o ya na maŋe o pa Abaraham to. Ya ta maa ware ya pa o kampwola kam ji kafɛ. 18Wɛ nɔɔna bam ya ná wae ba jwoŋi o wo-laaro tem o ni-kaana yam ŋwaane, ko ya daa bá taa ye o kampwola kam ŋwaane. Dé nam yei we, Wɛ déem zeini Abaraham o kampwola kam ŋwaane mo.

19Ko na ye konto to, bɛŋwaane mo Wɛ kwei o ni-kaana yam o ke o nɔɔna jeŋa ne? O kwei-ya o woli de o kampwola kam se ya wane ya pa dé lɔre tusim na ye tei to mo. Ya déem jege se ya taa wora se ko vo ko yi maŋa kam Abaraham dwi tu wom na wó ba logo baŋa to mo. Wonto maa ye wolo Wɛ na tiŋi o ni dem o ŋwaane to. Wɛ déem tɔge o malese jeŋa mo o kwei o nia yam o pa o nɔɔna bam, ye yiŋinu mo wora ba tetare laŋa ne. 20Yiŋinu maŋe se o taa wora nɔɔna balei laŋa ne mo. Wɛ nam na ye ŋo dedoa to mo pa se o tete gwoni o ni de Abaraham ye yiŋinu tera.

21Konto maama nam bere we Wɛ ni-kaana yam de o kampwola kam ware ya maŋe daane mo na? Aawo, ko bá ye konto. Ni-kaane tera de na wó wane de pa nɔɔna na ŋwea Wɛ tei ne. Ni-kaane konto dwoŋi ya ná wora, dé ya wó wane dé tɔge de baŋa ne dé na chega Wɛ tei ne. 22Wɛ tɔnɔ kom nam bere debam we, nabiina maama wo wɛleera dam kuri ne mo, ye ba daa ba jege chwoŋa se ba tɔge da ba ma jwoŋi ba tete. Konto to, ko ye balo na ke ba wo-dedoa ba sɛ Yezu Krista to mo wó jwoŋi wo-laaro telo Wɛ na pwooli se o pa-ba to, Yezu na jege ba chega to ŋwaane.

23Ko daare maŋa kam Wɛ ta na wo pore chwoŋa se dé ke dé wo-dedoa dé sɛ Yezu to mo Wɛ ni-kaana yam cheiŋi debam, ye dé laam ba dé lɔre wo-dedoa chwoŋa kam na ye tei to. 24Konto mo Wɛ ni-kaana yam déem jege debam ya kwɛa, se ko vo ko yi maŋa kam dé na lɔre Yezu Krista to, se dé laam na chega Wɛ tei ne dé wo-dedoa kam ŋwaane. 25Wɛ laam na pore chwoŋa se dé ke dé wo-dedoa de Yezu to, woŋo daa tera ko na wó taa tei debam.

26Abam na me de Yezu Krista to, á maama ye Wɛ bia, á na jege wo-dedoa ded‑o to ŋwaane. 27Abam wolo maama na jwoŋi sɛɛm pa se o me de Yezu Krista to laam nye de Yezu tete mo. 28Konto to, popɔra tera Juu tu de dwi-gɛ tu laŋa ne. Popɔra ta tera kabaa de wolo na tei o tete to laŋa ne. Ko ná ye baaro naa kaane de, popɔra ta tera. Abam na me de Yezu Krista to, á maama ye ŋo dedoa mo. 29Abam na ye Yezu nyem to, ko pa se á tɔge á ye Abaraham dwi tiina mo. Á maa wó jwoŋi wo-laaro, nenɛɛne Wɛ déem na pwooli kampwola de Abaraham tei to.

Currently Selected:

Galatia 3: KBG

Highlight

Copy

Compare