Nwoŋim 36

1Ko ná ye Bezaleli de Oholiaba dedaane gwaro telo maama Baŋa Wɛ na pɛ-ba swa dedaane yi-poro se ba taa wae ba ke wara-jei sem de se zela yam maama to, banto jege se ba yɔɔre ba toŋe se ko tɔge kolo maama Baŋa Wɛ na bere tei to mo.”

2Moses déem ma bwoŋi Bezaleli de Oholiaba dedaane gwaro telo maama Baŋa Wɛ na pɛ-ba dam ye ba boboŋa ja se ba toŋe to se ba ba. O laam ma ta-ba se ba bobo totoŋa yam. 3Ba de maa jwoŋi pɛɛra yalo maama nɔɔna bam na pɛ se ba maa ke wara-jei sem to Moses jeŋa ne. Se ko ná ye nɔɔna bam, ba ta yɔɔre ba jaane wo-ywoŋo pɛɛra mo ba tui Moses tei dɛ maama zezeŋa ne, ye ya laam tiini ya gaale. 4Tontoŋena bam laam ma yage wara-jei sem totoŋa ye ba vo Moses tei ba we, 5“Pɛɛra yalo nɔɔna bam na jaane ba ba totoŋa yam ŋwaane to daga ya dwoi totoŋe delo Baŋa Wɛ na pɛ debam ni se dé toŋe to.”#Nwoŋim 25:2

6Moses ma toŋe kwora se ka yi nɔɔna bam maama se ba daa yé ja pɛɛra ba ba wara-jei sem totoŋa yam ŋwaane. Ba ma seene ba yage. 7Kokuri to, ba na maŋe ba pa tei to yi se ko toŋe totoŋa yam se ya ti.

Wara-jei sem

8Gwaro telo na tiini ba jege swa to déem ma ke daane ba ke wara-jei sem. Ba ma kwei gare-jale-laaro fuga na nwoŋi gare-fefale delo na ye chekke to, ye ba daare ba kwei gare-ŋone selo nyenyero na ye nazwon-pupwia, de nasoŋ-pupwia, de nasoŋo chwɛ-chwɛ to ba ma gɔgere cherubi nyenyero ba ke gare-jala yam yera ne. 9Gare-jala fuga kam maama déem mae daane mo. Gare-jale dedwe dedɔrem maa ye jatwogo de noa ni maŋem kuni finlei-nana. De kayɔlɔ baŋa maa ye jatwogo de noa ni maŋem kuni bena. 10Ba ma nyaane gare-jala yanu ba twoŋi daane, ba ta daare ba nyaane yanu yadwonna yam de ba twoŋi daane. Te laam ma ji gare-puna yalei. 11-12Ba daa ta maa kwei gare-ŋone selo nyenyero na ye nazwon-pupwia to ba ke kuna finnu ba lei gare-pum ni-dedɔrɔ kom seeni. Ba ma daare ba ke konto gare-pum dedwoŋi dem ne. Ba ma ke kuna yam gare-puna yalei nia dedwaaro tem na jeeri daane to yera ne. 13Ba ta ma ke sabu-seŋa gwoli finnu mo se se ja gare-puna yalei yam se ke daane. Ko ma pa se gare-puna yalei yam meeli daane pa se wara-jei sem ji woŋo dedoa.

14Ba déem ma kwei boŋo koro ba sɔ gare-jala se ba ma-ya ba pu wara-vwei dem yuu kom seeni. Ya maama ke daane se ya taa ye fuga-dedoa mo. 15Ya maa mae daane mo. Ya dedɔrem baŋa ye jatwogo de noa ni maŋem kuni fintɔ. Ya kayɔlɔ baŋa maa ye jatwogo de noa ni maŋem kuni bena. 16Ba ma kwei gare-jala yanu ba twoŋi daane se ya ji gare-pum, ye ba daare ba kwei gare-jala yaredo yam na daare to mo ba twoŋi daane se ya de ji gare-pum. 17Ba ma ke kuna finnu ba lei gare-pum ni-dedɔrɔ kom seeni, ye ba daare ba ke konto gare-pum dedwoŋi dem ne. 18Ba déem ta kwei channa ba maa ke gwoli finnu pa se se twoŋi gare-puna yalei yam daane se ya ji gɔrɔ dedoa. 19Ba ta ma pwoni pi-bɛ tankwallo ba daare ba seini-te nasoŋo se ba maa kwoli wara-vwei dem, ye ba kwei twan-nyenno ba daŋe boboa twanno tem baŋa ne.

20Ba déem ma kwei golesaa dɛ ba ma ke ywoa yalo na zege cheppe to, se ba ma ke wara-vwei dem. 21Ywei maama dedɔrem baŋa maŋem maa ye jatwogo de noa ni maŋem kuni fuga mo, ye de kayɔlɔ baŋa seeni ye jatwogo de noa ni maŋem dedoa de chichworo. 22Ba laam ma sare nwa balei ywei maama yera ne se ba pa ywei maama taa wae de twoŋi dedaane dedwoŋi na saŋe-de to. 23Ba ta ke ywoa finlei se ya zege ya maŋe de wara-vwei dem tega-kuri seeni, 24ye ba daare ba kwei lu-nyenno ba maa ke wonnu telo na wó teili ywoa yam to finna, pa se luuru telei taa zege ywei dedoa maama ŋwaane. Te maa jege chwiim jei selei mo se ywei nwa bam wane ba zege se wone. 25Ba daa ta ma ke konto se ko maŋe de wara-vwei dem baŋa seeni saŋa kam de, se ywoa finlei taa zege da. 26Ba ma ke lu-nyenno wonnu finna se te teili ywoa yam. Luuru telei maa wora ywei dedoa maama ŋwaane. 27Ko ná ye saŋa kalo na wo bira-kwaga ne ye ka jeeri wɛ-zoore seeni to, ba ma ke ywoa yaredo se ba chwi-ya dáane. 28Ba ta ma ke ywoa yalei ba woli da se ba chwi-ya vwei dem kwaga saŋa kam gugworru telei tem ne. 29Ba ma twoŋi gugworru ywoa yam konto se ya meeli daane. Ko zege tega kam ne mo ko meeli se ko taa diini baŋa kam mɛ sabu-seŋa kwane dem na leigi da to. 30Bira-kwaga kam seeni ywoa yam déem ye nana mo, ye ya jege luuru fuga-teredo telo na teili-ya to.

31-32Ba ma kwei golesaa dɛ mo ba ma-se ba gare wara-vwei dem sɛ sem maama. Dagare senu mo gare ywoa yam na wo saŋa kalo maama ne to, se ya ja daane chekke. Tega-kuri seeni saŋa kam, de baŋa seeni saŋa kam de bira-kwaga seeni saŋa kam mo konto. 33Tetare dagara kam ma tole ka zege saŋa kam daa dedoa ne ka vo ka yi daa kadwoŋi kam, ka twoŋi ywoa yam maama ka ke daane. 34Ba déem ta kwei sabu-seŋa ba kwoli ywoa yam, ye ba daare ba maa ke kwana ba meeli ywoa yam yera ne se dagare sem taa tore ya wone. Ba ta ma kwoli dagare sem de sabu-seŋa.

35Ba ta ma kwei gare-fefale de gare-ŋone selo nyenyero na ye nazwon-pupwia, de nasoŋ-pupwia, de nasoŋo chwɛ-chwɛ to ba ma sɔ gare-jale delo na wó che Wɛ di-yun-gala kam to. Ba ma daare ba gɔgere cherubi nyenyero ba ke gare-jale dem yera ne. 36Ba ta ma sare golesaa da-dɛɛro tena mo ba taare-se de sabu-seŋa, se gare-jale dem lei se yera ne. Ba laam ma ke sabu-seŋa gwoli sena ba meeli se yera ne, ye ba daare ba kwei lu-nyenno ba ma ke luuru se te teili da-dɛɛro tem.

37Ko ná ye wara-vwei ni dem, ba ma kwei gare-fefale selo na ye chekke to de gare-ŋone selo nyenyero na ye nazwon-pupwia, de nasoŋ-pupwia, de nasoŋo chwɛ-chwɛ to ba ma sɔ gare-jale delo na wó lei ni dem ne to. Ba ma daare ba gɔgere nyenyero gare-jale dem yera ne. 38Ba ma ke da-dɛɛro tenu, ye ba meeli gwoli te yera ne. Ba ma kwoli se yuni tem de se nia yam de sabu-seŋa. Ba ta ma kwei channa ba ma mɔ luuru tenu se te teili da-dɛɛro tem, ye ba pale gare-jale dem dɛ sem baŋa ne.

Currently Selected:

Nwoŋim 36: KBG

Highlight

Copy

Compare