Nwoŋim 33

Isarele tiina bam yage Sinayi peo kom jei sem

1 Baŋa Wɛ daa ma ta de Moses o we, “Zaŋe-na se á kɛ! Nam ja Isarele tiina bam n na jaane n nwoŋi Ejipti ne n ba ywo-seeni to, se á vo tega kalo amo na gwoni ni dedaane á nabaara Abaraham, de Izaak, de Jakob se a pa banto de ba dwi dem to.#Pulim 12:7 2Amo wó toŋe maleka se ka tɔge á yiga ka bere abam chwoŋa. Amo tete nam wó zeili Kanaan tiina bam, de Amori tiina bam, de Hiti tiina bam, de Pɛrizi tiina bam, de Hivi tiina bam, de Jebusi tiina bam maama. 3Ba tega kam á na maa vei to tiini ka ywomma de varem de kɔnɔ. Amo nam za bá tɔge de abam se dé vo, á na ye zwabani-nyena to ŋwaane. Amo ná tɔge de abam, a wae a chɔge abam chwoŋa ne.”

4Nɔɔna bam na nigi ta-chɛɛre dem konto to, ba maa keera ye ba ve se ba zo gare-laaro de wo-nyenno. 5Baŋa Wɛ nam ya wuuri o ta Moses mo se o ta de Isarele tiina bam we, “Baŋa Wɛ ná maŋe o tɔge de abam fenfee de, o wó chɔge abam mo, á zwa na ba ni to ŋwaane. Nam lɔɔre-na á yera wo-nyenno se Wɛ laam lɔre o na wó ke abam tei to.” 6Konto ŋwaane, Isarele tiina bam na zege Sinayi peo kom jei sem ne ba maa kɛ to, ba daa wo kwei wo-nyenno ba ke ba yera ne.

Jeerim vwei dem

7Ba ná yeini ba beeri ba yi mɛ ba na wó tigisi to, Moses déem yeini o vo dáa dáa mo de-ba o chwi vwei dedwoŋi. O déem bwoi-de we, ‘Jeerim vwei’ mo. Wolo maa na yeini o lage se o ni Baŋa Wɛ kwora to wó vo o zo vwei dem wone mo.

8Moses ná yeini o maa vei se o zo jeerim vwei dem wone, nɔɔna bam maama wó nwoŋi ba zege ba vwoa yam nia ne mo. Ba laam maa nii‑o se o vo o yi vwei dem o zo de wone. 9O nam ná zo vwei dem wone, kunkwoŋo kolo na zege deiki to laam yeini ko ba ko dɔge vwei dem ni dem ne mo, ye Baŋa Wɛ laam zege kunkwoŋo kom wone o ŋɔɔne de Moses.#Lei 99:7 10Nɔɔna bam nam ná nɛ kunkwoŋo kom konto, ba wó yeini ba zege ba vwoa yam nia ne mo, ye ba chɔɔle tega ne ba zuli Wɛ. 11Moses ná yeini o zo vwei dem wone, Baŋa Wɛ ŋɔɔne ded‑o jaja nenɛɛne nɔɔno na ŋɔɔne de o dwoŋi tei to mo.#Nia Gulim 34:10 Ko kwaga ne Moses maa yeini o jwoori nɔɔna bam tei, mɛ ba na zoore to. Nɔn-doŋo wolo na ye Moses zeinnu to maa yeini o maŋe jeerim vwei dem wone. Wonto maa ye Nun bu Josua.

Baŋa Wɛ nenɔŋ-fɔrɔ kom

12Moses déem tage de Baŋa Wɛ mo o we, “Nmo seene n bere-ne we a tɔge nɔɔna banto yiga se a ja-ba a vo tega kam baŋa. Nmo nam ta wo pɛ se a lɔre a zeinnu wom mo. Nmo ta ma‑n tɛ we nmo yei amo wo ye a kikia su n yi. 13Tento maama nam ná seene ko ye chega, se n bere-ne n chwei sem chekke. Konto wó pa se a fɔge a sɛ nmo ni lanyerane, ye a ta ke nmo boboŋa yam na lage tei to. Nam yé swei we n tete mo kuri dwi dem konto nɔɔna bam se ba taa ye nmo nyem.” 14Baŋa Wɛ ma leiri Moses o we, “Amo tete mo wó taa wo nmo tei ne, ye a pa se n bochare zuri.”

15Moses ma ta o we, “Nmo nam ná ba lage n tɔge debam se dé vo, se n yé pa se dé gɔ naga. 16Nmo nam ná tɔge n wo dé tei ne ye dé via, nɔɔna maama wó lɔre we nɔɔna banto kikia su nmo yi. Ba ta wó lɔre we debam ye dé yera mo logo baŋa nɔɔna maama wone.”

17 Baŋa Wɛ laam ma ta de Moses o we, “Amo wó ke kolo maama nmo na lage to, a na yei nmo wo ye n kikia su amo yi to ŋwaane.”

18Moses daa ma ta de Baŋa Wɛ o we, “A lwoori‑m mo se n pa-ne pwola se a na nmo nenɔŋ-fɔrɔ kom chekke.”

19 Baŋa Wɛ ma leiri o we, “Amo mo ye Baŋa Wɛ wom. Amo wó duri wolo maama a na kuri to yibwona ye a ke zaane kotu yuu ne. Amo nam wó bere‑m a lanyerane dem se n yia na-de, ye a daare a pa se n ni a yere dem chekke. 20Nmo nam ba jege se n na a yibia mo, kolo ŋwaane wolo maama ná nɛ amo yibia, konto tu wó te mo. 21Nii ywo! Peo kodwoŋi zege ywo-seeni bwola bwola. Véi n ta‑n zege ko baŋa ne. 22Amo nam ná lage a tɔge n tei ne se a kɛ de a nenɔŋ-fɔrɔ kom, a wó ja‑m se n seigi peo gugworo ne, ye a kwoli n yibia de a jeŋa, se a wane a gaale‑m a kɛ. 23Ko kwaga ne a laam wó dɔne a jeŋa se n wane n na amo kwaga kam. Se ko ná ye amo yibia, n ba jege se n na-ka.”

Currently Selected:

Nwoŋim 33: KBG

Highlight

Copy

Compare