Nwoŋim 31

Bezaleli de Oholiaba taane

1 Baŋa Wɛ déem ma ta de Moses o we:

2“Amo mo kuri Yuri bu Bezaleli. O kwo-nakwe maa ye Hura ye wonto nwoŋi Judah dwi dem wone. 3Amo kwei a jworo mo a pa‑o, pa se o jege swa, de yi-poro, de yeino se ko tiini ko gaale, ye o wae o gɔgere wonnu dwi dwi. 4O ta wae o kwei sabu-seŋa, de lu-nyenno, de channa o ma naane wonnu telo na tiini te lana to. 5O ta wae o kwei kandwa-nyenno de dɛ o sara o ma gɔgere wonnu dwi dwi. 6Amo nam le Dan dwi tu Ahisamaki bu Oholiaba mo se ba taa toŋe daane. Gɔgɔ kolo maama na daare to, a ta pɛ-ba swa dwi dwi se ba de tɔge ba woli se kolo maama amo na bere‑m to wane ko toŋe chekke. Wonnu tem mo tento:

7Wara-vwei dem, de ni-gwonim dakaa kam, de wɛleera saarem ni-pugu kom na kwoli-ka to, dedaane wonnu telo maama na pae se vwei dem lamma to mo konto,

8de tabolo kom de ko zela yam, de sabu-seŋa min-zwon-zego kom de ko zela yam maama, de talwoŋa zwɛɛm dakaa kam,

9de zwɛɛm kaanem dakaa kam de ka zela yam maama, de ware-zoŋa kam de ka na wó zege woŋo kolo baŋa ne to,

10de nenɔŋa gwaaro telo kaanem tu Aron de o bia bam na jege se ba zo-te se ba toŋe kaanem totoŋa to, 11de Wɛ swolim nuga kam, de talwoŋ-ywoŋa kam ba na wó zwɛ Wɛ di-yuu kom ne to.

Nam pa se ba ke woŋo maama se ko tɔge amo na bere‑m tei to.”

Siu dɛ dem taane

Nwoŋim 20:8-11; Chullu 23:3; Nia Gulim 5:12-15

12 Baŋa Wɛ ta ma ta de Moses o we:

13“Ta Isarele tiina bam se ba taa yei da yarepɛ dɛ dem ni ne. Abam ná ke á tɔge amo ni dem da yarepɛ dɛ dem ŋwaane, ko wó taa ye maana abam de á dwi maama tei ne, se á lɔre we amo Baŋa Wɛ mo kuri abam se á ta‑á ye amo nyem. 14Da yarepɛ dɛ dem wó taa ye de yera mo amo ŋwaane. Wolo nam ná chɔge de chullu tem, o jege se o te mo. Nɔɔno wolo maama ná toŋe totoŋa dɛ dem konto ne, kotu daa yé tɔge o woli Isarele dwi dem wone. 15Kwei-na da yaredo á toŋe á totoŋa. Ko daare se da yarepɛ dɛ dem taa ye de yera de pae amo Baŋa Wɛ. Ko maa ye siu dɛ mo. Wolo ná toŋe de dɛ dem ne, se á go kotu. 16Isarele tiina bam de ba dwi maama wó taa nege da yarepɛ dɛ dem mo ye ba tɔge de chullu tem se ko taa vei wuu. 17Dɛ dem konto ye maana dɛ mo de pa amo de Isarele tiina bam se ko taa vei wuu, se á guli we amo kwei da yaredo mo a ma a naane wɛyuu de tega baŋa. A laam ma sii da yarepɛ dɛ dem ne, a naanem totoŋe dem na ti to ŋwaane.”

18 Baŋa Wɛ na ŋɔɔne de Moses Sinayi Peo kom yuu ne o ti to, mo o kwei kandwa-pelɛ selei sem o pa‑o. Wɛ nam ya mo mɛ o tete jeŋa o popone o ni-gwonim dem botara ya baŋa ne.#Nia Gulim 9:9

Currently Selected:

Nwoŋim 31: KBG

Highlight

Copy

Compare