Nwoŋim 18

Jetero

1Midian tiina kaanem-tu wodwoŋi déem mo wora, o yere na ye Jetero. Wonto maa ye Moses tembaaro. O ma ni Wɛ na ke tei maama o pa Moses dedaane Isarele tiina bam, ye o ja-ba o nwoŋi Ejipti ne to. 2-3Moses déem nam ya pɛ se o kaane Zipora de o bia balei bam vo o tembaaro Jetero tei ne mo se ba taa wora. Bia bam dedoa yere mo ye ‘Geresom’. Kokuri to, Moses déem we, “Amo ye veiru mo sa-teo ne.”#Nwoŋim 2:21 4Wodwoŋi wom yere maa ye ‘Eliazera’.#18:4 Eliazera kuri mo ye Wɛ ye amo zeinnu Kokuri to, o déem we, “Amo kwo Wɛ wom mo woli-ne. Wonto mo jwoŋi-ne Ejipti Pɛ wom jeŋa ne o yage, pa se o wo go-ne.”

5Moses déem maa chwi o vwoa yam Wɛ peo kom#18:5 Wɛ peo kom = Sinayi peo kom (Nwoŋim 3:1) teiŋa ne. O tembaaro Jetero déem ma vo o tei kagoa kam ne. O ma ja Moses kaane wom de o bia balei bam o woli da. 6Jetero ya toŋe ni mo o pa Moses o we, “Amo maa beene nmo tei. N kaane wom de n bia balei bam de maa tɔga.” 7Ba na yi to, Moses ma nwoŋi se o jeeri-ba. O déem ma tiiri o tembaaro wom yiga ne, ye o daare o kukwori‑o. Ba ma bwei da-kwaga, ye ba laam daare ba zo Moses vwei dem wone se ba lare. 8Moses ma lwoni kolo maama Baŋa Wɛ na toŋe Ejipti Pɛ wom de o nɔɔna bam yerane pa se o vere Isarele tiina bam to o bere Jetero. O ta ma ta ded‑o ba na jeeri cham delo maama chwoŋa kam yuu ne to, de Baŋa Wɛ na ke tei o vere-ba to.

9Jetero na nigi konto to, o wo ma pwoli de Baŋa Wɛ na woli Isarele tiina bam to. 10O ma tei Wɛ ye o we, “Baŋa Wɛ maŋe de teem! O vere abam Ejipti tiina bam de ba Pɛ wom jeŋa ne o yage. 11Amo laam lɔre we Baŋa Wɛ mo daga o dwoi wa yam maama. Kokuri to, o pɛ se o nɔɔna bam lu Ejipti tiina bam dam kuri ne, de ba na bɛɛse-ba tei maama to.” 12Jetero ma ja varem o ba se ba zwɛ ba ma ke kaanem ba pa Wɛ, ye o kwori o ja pɛɛra yadwonna o woli da se o pa‑o. Aron de Isarele nakwa bam maama de ma ba Moses de o tembaaro wom tei, se ba tɔge daane ba di wodiu kom ba ma zuli Wɛ.

13Tega na poore to, Moses ma jeini se o cheigi nɔɔna balo na tu o tei ba saŋe daane to taane. Nɔɔna bam na daga to ŋwaane, ba zege Moses yiga ne mo taa, zezeŋa ne se ko vo ko yi dedaan-ni ne. 14Moses tembaaro Jetero na nɛ konto to mo o bwei‑o we, “Bɛŋwaane mo ye nmo toŋe totoŋe dento n pae nɔɔna bam n yerane? Nii nɔɔna bam na zege ywo-seeni tetete wɛɛne se ko yi dedaan-ni ne, ye nmo yerane mo bore ba taane.” 15Moses ma leiri‑o o we, “Kokuri to, nɔɔna bam yeini ba tui amo tei se ba lɔre Wɛ boboŋa na ye tei ya pa-ba to mo. 16Nɔɔna balo ná jege kantɔgɔ ba tetare ne, ba yeini ba tui amo tei mo se a bere-ba wolo na jege bora to. Amo ta wó daare a bere-ba Wɛ nia yam de o bera yam maama se ba taa ni ya kuri.”

17Jetero ma leiri o we, “Nmo na ke tei to ba tɔge chwoŋa. 18Nmo ná lage n ta‑n ke konto, ko bá dáane de n yera na chɛ. Nɔɔna bam yera de maa wó chɛ. Totoŋe dento daga de dwoi nmo yerane jaanem. 19Cheigi amo kwea yanto a na lage a pa‑m to, se Wɛ wó taa wora nmo tei ne. Nɔɔna bam ná yeini ba jege kantɔgɔ, ko lana se n kwei ba taane dem n ja n vo Wɛ yiga ne mo. 20Nmo ta jege se n bere-ba Wɛ nia yam, dedaane o bera yam na bere kolo to, se ba lɔre ba na wó tɔge chwoŋa kalo to. 21Ko daare, beeri nɔɔna bam maama wone n kuri balo na ye jawale-nyena ye ba kɔre Wɛ to. Banto wó taa ye balo nɔɔna na jege ba chega ye ba ba tɔge sabu-laga chwoŋa to mo. Nmo laam wó tiŋi nɔɔna bam konto se ba taa ye yiga tiina ye ba nii nɔɔna baŋa ne. Badwonna wó taa nii nɔɔna moro baŋa ne, badwonna maa nii bi bi, badwonna maa nii finnu finnu, ye badaara nii nɔɔna fuga fuga baŋa ne. 22Maŋa maama ba wó taa cheigi balo na jege taane to se ba bore ba bora. Ko ná ye wo-chɛɔ, ko ye se ba kwei taane dem ba ja ba nmo yiga ne mo se n bore-de. Ko nam ná ye ta-balaŋa, ba tete mo wó bore.#Nia Gulim 17:8 Konto wó pa se totoŋa yam ke mɔle ya pa‑m, yiga tiina bam na tɔge ba zeŋe nmo zele dem to ŋwaane. 23Nmo ná ke konto dwoŋi nenɛɛne Baŋa Wɛ na bere‑m to, ko daa bá ni‑m. Nɔɔna bam de nam wó jwoori ba sam ne dedaane bochare-zuru.”

24Moses déem ma cheigi Jetero bera yam ye o sɛ-ya. 25O ma beeri Isarele tiina bam maama wone o kuri jawale-nyena se ba taa ye yiga tiina ye ba nii nɔɔna moro moro baŋa ne, se badwonna taa nii bi bi, se badwonna nii finnu finnu, ye badaara nii fuga fuga baŋa ne.#Ezera 7:25 26Maŋa maama banto mo yeini ba bore Isarele tiina bam taane. Ko ná ye wo-chɛɔ, ba wó kwei taane dem ba ja vo Moses yiga ne mo se o bore-de. Ko nam ná yeini ko ye ta-balaŋa, ba tete mo wó bore-de.

27Ko kwaga ne mo Moses bane o tembaaro Jetero o yage chwoŋa ne pa se o jwoori o vo o tete teo.

Currently Selected:

Nwoŋim 18: KBG

Highlight

Copy

Compare