Ɛseta 4
4
Modekayi beeri wolim Ɛseta tei ne
1Modekayi na maane kolo maama na ke to, o ma kaare o gwaaro, o wo na chɔge to ŋwaane. O ma zo gare-nyenyaaro, ye o daare o puki o yuu maama dedaane tentwarem. O ma nwoŋi o kare teo kom maama wone o via ye o laare de kwor-dɛa baŋa baŋa. 2O ke konto mo o vo o yi Pɛ sɔŋɔ manchwoŋo ni dem, ye o wo zo pɛ sɔŋɔ kom wone, ko na chula se nɔɔna zo gare-nyenyaaro ba zo dáane to ŋwaane. 3Pɛ wom ni dem na yi mɛ de mɛ o paare laŋa kateira yam maama wone to, Juu tiina bam yɔɔre ba laare bugi-bugi mo. Ba maa vɔ ni, ye ba keera, ye ba ta chwoosa. Ba dedɛ ma zo gare-nyenyaaro, ye ba daare ba jei tentwarem wone.
4Ka-nyaana dedaane tontoŋena balo na nii Ɛseta to ma na Modekayi na ke kolo to, ye ba ta ba bere Ɛseta. Ko ma tiini ko daane‑o. O ma toŋe gwaaro o pa Modekayi se o leiri o gare-nyenyaaro tem se o daare o zo-te. O maa wo sɛ. 5Tontoŋena balo pɛ wom na le se ba taa nii Ɛseta to dedoa yere ye Hatake mo. Ɛseta laam ma toŋe‑o Modekayi tei ne se o bwei o lɔre kolo na daane‑o to. 6Hatake ma nwoŋi o vo Modekayi tei, ye o wo teo kom kapworo kom ne, ko na jeeri de pɛ sɔŋɔ manchwoŋo to. 7Modekayi de ma ta o bere‑o kolo maama na yi‑o to, dedaane Haman na gwoni ni se o tiŋi sabu-fɔrɔ teo kom kwɛɛm ŋwaane, ne o ná nɛ chwoŋa se o pa Juu tiina maama na chɔgem. 8O laam ma daare o kwei tɔnɔ kolo na pɛ nɔɔna ni se ba chɔge Juu tiina bam ye ba tɔɔle ko taane Susa ne to o bere Hatake. O ma kwei ko dwoŋi o pa‑o se o ja o vo o pa Ɛseta. O ta tage‑o mo se o maŋe tɔnɔ kom wo wonnu tem o bere Ɛseta, se o daare o ta‑o we, o véi pɛ wom tei o lwoori‑o se o duri Juu tiina bam yibwona.
9Hatake ma seene o vo Ɛseta tei o bere‑o kolo Modekayi na tage to. 10Ɛseta ma leiri‑o o we:
“Nam véi n ta de Modekayi we, 11ko zege pɛ nakwa ne, se ko yi nɔn-bia bam na wo kateira yam maama wone to, nɔɔno maama yei we chwoŋa tera se nɔɔno zo pɛ wom tei ye o wo bwoŋi‑o. Ba ta yei we wolo ná zo da ye pɛ wo bwoŋi‑o, ba jege se ba go konto tu mo. Debam teo kom wadaa mo konto. Ko nam ye pɛ ná zeiŋi o sabu-seŋa nacheiga kam o jeeri kotu, mo ba bá go‑o. Chana mo tento nam, pɛ na wo toŋe o bwoŋi-ne.”
12Modekayi na nigi Ɛseta kwora kam to, 13o ma toŋe o ta‑o o we:
“Yé ta‑n boŋe we, n na wo pɛ sɔŋɔ kom wone to ŋwaane, nmo yerane wó ta‑n ye Juu tu se n lu. 14Nmo ná maŋe da chemm maŋa kanto, nam lɔre se wolim wó nwoŋi jei sedwonna ne de ba Juu tiina bam ŋwaane, se ba na verem. Nmo nam wó te, ye n kwo sɔŋɔ kom de ti. Dé nam yeiri dé tia. Dɛ dedwoŋi ne ko zege ko ye maŋa kanto kikia yam ŋwaane mo n tu n ji ka-pɛ!”
15Ɛseta laam ma leiri Modekayi o we:
16“Véi n la Juu tiina bam maama na wo Susa ne to n ke daane. Vɔ-na ni se á lwoori Wɛ á pa-ne. Yé di-na wodiu, nam yé nyɔ-na na da yatɔ, wea dedaane tete maama. Amo de a ka-nyaana bam de wó ke konto. Dé ná ti, amo laam wó zo pɛ wom tei, de ko na maŋe ko chula to de. Ko ná ye se a te ko ŋwaane, a sɛ se a te!”
17Modekayi laam ma viiri o vo o ke kolo maama Ɛseta na bere se o ke to.
© 2020, Ghana Institute of Linguistics, Literacy and Bible Translation (GILLBT)