Ɛseta 3
3
Haman boŋe se o ti Juu tiina bam
1Ko na ke fee to, mo Pɛ Zeregese zeiŋi Haman se o ji wolo na saŋe pɛ kwaga o taa nii teo kom to. Haman nam ye Hamedata bu mo, ye o nwoŋi Agagi dwi dem wone.#3:1 Agagi dwi dem déem chuli Isarele tiina bam ko dáane. 2Pɛ wom ma pa o dedɛɛra balo na toŋe o sɔŋɔ kom ne to maama ni se ba tiiri tega ne ba ma zuli Haman. Ba maama ma sɛ ba ke konto, ye Modekayi yerane ve se o tiiri o zuli‑o. 3Pɛ dedɛɛra badwonna bam maa yeini ba bwei‑o ba we, “Bɛŋwaane mo n ve pɛ wom ni dem?” 4Dɛ maama wone, ba maa jege‑o ba nyenyɔna se o de sɛ o tiiri, ye o ba sɛa. O laam ma ta o bere-ba o we, o ye Juu tu mo, ko nam wo maŋe se o tiiri konto dwoŋi. Ba ma vo ba ta o taane dem de Haman, se ba lɔre wonto wó ja keim dem tetɛ. 5Haman na lɔre we Modekayi ve se o tiiri o pa‑o to, mo o bane zaŋe. 6O ta na lɔre we Modekayi ye Juu tu to, o ma jeeli we o ná go Modekayi yerane, ko bá zuri o bane. O ma ke o boboŋa ne se o chɔge Juu tiina balo maama na zoore Pɛ Zeregese paare dim laŋa kam ne to.
7Pɛ Zeregese paare dim bena fuga-yalei bene dem wone, de boboa chana kam, ka yere na ye Nisan to wone mo Haman pɛ se ba ta jɔrɔ se o lɔre chana kalo de dɛ delo chekke o na wó wane o ke o boboŋa yam to. Jɔrɔ kom yere mo ‘Pura’. Ko ma le chane fuga-selei chana kam ka yere na ye Adare to mo.#3:7 Chana kam da fuga-yatɔ dɛ dem (3:13). 8Haman na lɔre konto to, o laam ma yi pɛ wom tei ye o we, “Nɔɔna badwonna mo jage ba yi nmo paare dim laŋa kam ni maama. Ba dwi dem zoore kateira maama ne mo. Ba chullu nam ye te yera mo de nɔɔna maama chullu. Ko kwaga ne, ba ba tɔge nia yalo debam na pɛ dé teo nɔɔna bam se ba taa tɔge to. Konto ŋwaane, yé sɛ se debam de-ba taa zoore daane. 9Pɛ, nmo nam ná sɛ a boboŋe dem, se n pa ni we ba jege se ba te mo. Konto ná kea, amo wó kwei lu-nyenno dunni na wó yi kilo morro bia yatɔ de finna (340,000) to a pa balo na nii teo kom totoŋa baŋa ne to, se ba tiŋi-te nmo paare dem ŋwaane.”
10Pɛ wom ma sɛ ye o daare o le o jeŋa jafole delo na bere o dam to, #3:10 jafole Ba yeini ba ma jafole dem konto ba nye twanno se ko bere we pɛ yei te ni ne. o pa Haman. Wonto maa ye Agagi tu Hamedata bu ye o chuli Juu tiina bam. 11Pɛ wom ma ta de Haman o we, “Ta‑n jege n sabu kom. Nɔɔna bam de nam wo n jeŋa ne, se n ke-ba n na lage tei to.”
12Ko ma pa se Haman bwoŋi pɛ wom tɔn-poponna, ye o pa ba popone twanno pɛ wom yere ŋwaane. O ta pɛ se ba popone o ni dem de teo maama dwi taane, nenɛɛne ba na yeini ba popone-de tei to. O laam ma kwei Pɛ Zeregese jafole dem o nye te baŋa ne, ye o we ba ja-te ba vo o paare laŋa kam ni maama ne ba pa pɛ wom yiga tiina, de kateira yam dedɛɛra, de dwi tiina maama nakwa. Haman déem ke konto boboa chana kam da fuga-yatɔ dɛ dem ne mo. 13Balo na ye se ba pa taane dem jage to ma ja ni dem konto ba vo Pɛ Zeregese paare dim laŋa kateira yam maama ne. Ni dem bere we chwoŋa tiga se chane fuga-selei chana kam, ka yere na ye Adare to, da fuga-yatɔ dɛ ne, se ba chɔge Juu tiina maama ba ti dɛ dedwe wone. Ko ná ye ba nɔn-donno, naa nɔn-kwe, naa kaana, naa bu-somwa de, se ba go ba maama, ye ba daare ba vere ba jejegero ba ja ba viiri. 14Ba déem ma pa se kateiri de kateiri maama taa jege de tɔnɔ, se nɔɔna maama wane ba lɔre ni dem jaja, ye ba daare ba ti yiga se dɛ dem laam yi.
15Pɛ wom ni dem ma pa se balo na pae taane dem jage to duri lela ba vo ba yi jei maama. Ba ta ma tɔɔle taane dem Susa dam jei sem wone. Pɛ wom dedaane Haman maa jei ba jege sana ba nyɔa. Susa teo kom nɔɔna maama boboŋa nam vugimi.
Currently Selected:
Ɛseta 3: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)