Kolosia 1

1Amo Pɔɔl wolo Wɛ na tiŋi-ne de o tete boboŋa se a taa ye Yezu Krista totoŋa nakwe to mo popone tɔnɔ konto, ye dé nu-bu Timoti mo tɔge o woli-ne. 2Dé popone se dé pa abam balo na ye Wɛ nɔɔna ye á zoore Kolosia ne to. Abam maa ye dé nu-bia balo na tɔge Yezu Krista de á wo maama to.

Dé Kwo Wɛ wó pa abam zaane de yazura.

Lei keim

3Maŋa kalo maama debam ná yeini dé lwoori Wɛ dé pa abam, dé ta ke Wɛ lei abam ŋwaane. Wonto maa ye dé Teiru Yezu Krista Kwo. 4Kokuri to, dé lɔre abam na jege wo-dedoa de Yezu, ye á kwori á jege Wɛ nɔɔna bam maama swono tei to. 5Konto maa pae se á jege teena we, á wó na ywoni Wɛ tei ne. Ko ye abam na bobo á ni Wɛ kwor-ywoŋa kam to mo pɛ á lɔre we, o tiŋi ywoni dem konto telaao ne o pa abam. Wɛ kwora kam konto maa ye ta-ŋom delo na seene de ye chega to mo. 6O kwor-ywoŋa kam konto laam jage ka yi logo baŋa jei maama, ye ka fɔge nɔɔna lanyerane, ne ka na maŋe ka fɔge abam tei, ko zege maŋa kalo á na bobo á lɔre Wɛ zaane dem na seene de ye tei to. 7Ko ye Epafera déem mo bere abam Wɛ chega kam konto. Wonto maa ye debam nu-bu-swono ye o toŋe de o wo maama o pa Yezu Krista debam ŋwaane.#Kolosia 4:12 8Wonto ta mo tage o bere debam Wɛ Sin-laao kom na pɛ abam taa jege swono á bochara ne tei to.

9Abam na yɔɔre á tɔge Yezu konto to, dé yeini dé lwoori Wɛ mo maŋa maama dé pa abam, ko zege maŋa kam dé na lɔre abam ni ne to. Dé lwoori‑o se o pa á ta‑á yei o boboŋa na lage tei to, se o daare o pa á na swa de yi-poro maama, ne o Sin-laao kom na pae tei to. 10Abam laam wó wane á tɔge chwoŋa se ko maŋe de dé Teiru wom na lage tei to, ye á kikia maama wó su o yi. Dé lwoori Wɛ se o woli abam se á ta‑á ke totoŋ-laaro dwi dwi lanyerane, se á boboŋa taa pula maŋa maama Wɛ taane wone. 11Wɛ nam wó tɔge o paare dem ŋwaane o woli abam de o dam-fɔrɔ kom, se á wane á fɔge á zege lanyerane, ye á jege pu-dɛa wonnu maama baŋa ne. 12Á wó wane á ta‑á ke dé Kwo Wɛ lei de wopwolo, kolo ŋwaane o pɛ abam chwoŋa se á tɔge á na wo-laaro telo o na tiŋi se o pa nɔɔna balo na ye o nyem to. Wɛ nɔɔna bam jeiŋa jei maa tiini de jege pwooni lanyerane o tei ne. 13Dé Kwo Wɛ ma vere debam lim wone o yage, se wo-lwanno daa yé taa jege dam dé baŋa ne. O ma daare o ja debam o zo o tete Bu-swono kom paare dem wo. 14Ko nam ye o Bu Yezu mo kwei o ŋwea o ma ŋwe dé wɛleera jene, pa se Wɛ yage-ya o ma chɛ debam.

Wɛ Bu Yezu na ye wolo to

15Yezu yɔɔre o jege Baŋa Wɛ nyenyego, ye nabiina yia na‑o. Nɔɔn-nɔɔno nam ba nae Baŋa Wɛ tete.#Hiburu 1:3 O ye Wɛ Bu-doa mo ye o zege wonnu telo maama Wɛ na naane to yiga ne. 16Wɛ dɛ wonto ŋwaane mo o ke wonnu maama. Te maa ye wonnu telo maama na wo wɛyuu ne de tega baŋa ne to, de telo nɔɔna na wae ba nae de yia, de telo ba na ba nae to, ko woli de malese, de wonnu telo maama na jege dam nabiina baŋa ne to. Ko ná ye wonnu telo maama na wora to, Wɛ dɛ Yezu ŋwaane mo o ke-te se ko pa o na zula te baŋa ne. 17Yezu maŋe o wora mo boboa ne ye kolokolo ta tera. Ko ye wonto ŋwaane mo wonnu maama jege kuri lanyerane ye te toŋe te tɔge daane. 18Ko ná ye Yezu nɔɔna bam tei ne, wonto mo ye ba yuu tu, ye ba kɔgɔ kom nye de o yera yam mo. O ta maa ye ba pulim jei. Ko ye Yezu mo dɛ yiga o bi toone wone ye o na Wɛ ŋwe-doŋa kam, se ko pa o taa wo wonnu maama yiga ne.#Gurim 1:5 19Baŋa Wɛ tete boboŋa mo lage se o Bu Yezu taa nye ded‑o fase. 20Wɛ boŋe se o da o Bu wom ŋwaane mo o jwoori o ke wonnu maama o tete jeŋa ne. O Bu Yezu na tege dagara kam yuu ne ye o jana nwoŋi to mo pɛ se wonnu maama jwoori te fɔge daane de Wɛ, ne ko ná ye logo baŋa wonnu tem de wɛyuu wonnu tem maama de.

21Ko nam ná ye abam, á déem ye Wɛ dona mo. Abam boboŋa de á kikia maama déem lage wo-lwanno yerane mo pa se á ba lage Wɛ ni taane. 22Ko daare leile konto, Wɛ laam pɛ se abam ded‑o fɔge daane, o Bu wom na jigi nabiinu ye o daare o te to ŋwaane. Wɛ ke konto se á wane á ba á zege o yiga ne de wo-pwoŋo, ye á ye nɔn-laaro balo na ba jege tusim to. 23Abam nam jege se á yɔɔre á ta‑á tɔge Wɛ chega kam de á wo-dedoa, se á yé ywori ka wone. Á yé pa se á boboŋa leiri de teena yalo á na jege Wɛ kwor-ywoŋa kam ŋwaane to. Ka ye Wɛ kwora kalo abam na maŋe á ni ye ba tɔɔle-ka dɔŋɔ ni maama ne to mo. Wɛ nam kuri amo mo se a taa ye o tontoŋeno ye a tɔɔle o kwor-ywoŋa kam konto.

Pɔɔl na toŋe o pa Yezu nɔɔna tei to

24Amo na yaare tei abam ŋwaane to mo yeini ko pa-ne wopwolo. Ko na chɛ amo yera ne tei to ye Yezu Krista na yaare o daare tei to mo konto. Amo yaara yam nam mo wó woli Yezu yaara yam wone se ko pa o nɔn-kɔgɔ kom na zeinim lanyerane. 25O nɔɔna bam nye de o tete yera mo, ye Wɛ tiŋi-ne se a taa toŋa a pa-ba. Amo na toŋe tei a pa abam to mo ye a yeini a kwaane a tɔɔle Wɛ kwora kam maama jilli. 26Ko zege faŋa faŋa to, Wɛ chega kam konto déem seigi nabiina tei ne, ye Wɛ laam le-ka o bere o tete nɔɔna bam. 27Ko ye Wɛ tete boboŋa na lage tei to o ma pa ba lɔre o chega kam konto. O lage se logo baŋa dwi maama tiina mo lɔre o chega kam na tiini ka jege lam tei to. Wɛ chega kalo déem na seigi ye ka laam ba ka lɔre jaja to mo ye we, Yezu Krista wo abam bochara ne, pa se á jege teena we á wó na nenɔŋ-fɔrɔ Wɛ tei ne. 28Konto ŋwaane debam yeini dé tɔɔle Yezu Krista taane mo dé bere nɔɔna maama. Dé tɔge Wɛ chega kalo maama dé na yei to dé maa kaane-ba, ye dé daare dé bere-ba chekke, se ko pa ba maama laam wane ba zege Wɛ yiga ne, de ba na me de Yezu ye ba boboŋa kweere to. 29Amo nam kwaane a fe a tete a toŋe konto, pa se ko chɛ a yera ne. Ko nam ye dam-fɔrɔ kolo Yezu na yeini o ke a bochare ne to mo a mae a toŋe konto.

Currently Selected:

Kolosia 1: KBG

Highlight

Copy

Compare