Kikia 23

1Pɔɔl ma yɔɔre o nii nakwa bam kɔgɔ kom seeni ye o we, “Amo dwonna Isarele dwi tiina bam, ko ná ye chwei selo a na tɔge a ŋwea wone se ko ba ko yi zem to, foone tera a bochare ne, ye Wɛ yei konto.” 2Juu tiina kaanem yuu tu wom, o yere na ye Anania to, na nigi Pɔɔl na tage kolo to, o ma ta balo na zege Pɔɔl tei ne to se ba fere o ni. 3Pɔɔl ma leiri Anania o we, “Wɛ tete mo wó seene o mage nmo. Nmo nye de kabira kalo nɔɔna na fɔge to mo. Nmo ye wolo na jei se n di amo taane se ko tɔge Juu tiina nia yam mo, ye nmo tete mo chɔge-ya de n na pɛ ni we ba mage amo to.” 4Nɔɔna balo na zege Pɔɔl tei ne to ma ta ded‑o ba we, “Nmo jege debam kaanem yuu tu wom n twea!” 5Pɔɔl ma leiri-ba o we, “A dwonna bam, amo maŋe a yeiri we o seene o ye kaanem yuu tu wom mo. Ko popone Wɛ tɔnɔ kom ne ko we, n yé zaŋe n ŋɔɔne n chɔge wolo na ye yuu tu n dwonna wone to yiga.”#Nwoŋim 22:28

6Pɔɔl na lɔre we kɔgɔ kom nɔɔna badaara ye Saduka tiina, ye badaara de ye Farisi tiina to, o laam ma ŋɔɔne baŋa baŋa de kwor-dɛa ba kɔgɔ kom wone o we, “A dwonna bam, amo ye Farisi tu ye a kwori a ye Farisi tiina bu. Ba zem saŋe amo se ba di amo taane de a na jege teena we twa wó jwoori ba bi toone wone to ŋwaane.”

7O na tage konto o ti to, Farisi tiina bam de Saduka tiina bam ma bobo se ba mage ni-kantɔgɔ daane. Ba kɔgɔ kom maama ma pɔɔre belei. 8Kokuri to Saduka tiina bam bere we twa biim tera, ye ba tɛ we malese tera, chira de nam tera. Ko daare Farisi tiina bam maa bere we tento maama ye chega mo.

9Ba maama ma ke sɔɔ se ko tiini ko gaale. Wɛ nia zamesem tiina badaara na nwoŋi Farisi tiina kɔgɔ kom wone to ma zaŋe wɛɛne ba tɔne de dam ba we, “Debam wo nɛ kolo nɔɔno wonto na ke o chɔge to. Ko nam wó wane ko taa ye chega we chiru naa maleka mo ŋɔɔne ded‑o.”

10Ba ni-kantɔgɔ kom maa fɔge ko pula. Ko ma pa se foone zo soja tiina dedɛɛro wom we ba ga wó ja Pɔɔl ba vaŋe ba tore mo. O ma pa ni se o soja tiina bam zo kɔgɔ kom wo ba ja Pɔɔl ba wone ba ja nwoŋi, se ba daare ba ja‑o ba jwoori ba vo ba dam jei sem.

11Dɛ dem konto tete ne dé Teiru wom ma ba o zege Pɔɔl tei ne ye o we, “Ta‑n jege baare. Nmo maŋe n zege amo chega kam kwaga ne n bere Jerusalem tiina. Nmo nam jege se n daa‑n ke konto mo Rom teo ne de.”#Kikia 18:9

Ba kwaane se ba go Pɔɔl

12Tega na poore to, Juu tiina badaara ma la se ba ke ni daane. Ba ma du de Wɛ we ba daa bá di wodiu naa ba nyɔ kolokolo se ko ta nii ba ná go Pɔɔl. 13Nɔɔna balo na ke ni daane konto to dwoi nɔɔna finna. 14Ba laam ma zaŋe ba vo ba kaanem yiga tiina bam de ba teo kom nakwa bam tei ba ta ba we, “Debam maama ke ni daane mo dé tiini dé du de Wɛ we, dé daa bá di kolokolo se ko taa nii dé ná go Pɔɔl. 15Ko laam daare se abam de á kɔgɔ kom maama mo toŋe ni soja tiina dedɛɛro wom tei ne se ba ja Pɔɔl ba nwoŋi ba ba ba pa abam. Abam wó ke se ko taa ye nenɛɛne á lage se á faŋe á nii o ni taane mo. Ko daare debam wó vo dé ke siri se dé go‑o chwoŋa ne ye o ta wo yi abam tei.”

16Pɔɔl nakɔ bu déem maa wora. O ma ni keim dem konto ŋwa. O ma zaŋe o vo o zo soja tiina dam jei sem o ta o bere Pɔɔl. 17Pɔɔl na nigi konto to, o ma bwoŋi soja tiina yiga tu dedoa se o ba. O ma ta ded‑o o we, “Ja nɔn-doŋo konto n vo n dedɛɛro wom tei, se o jege taane mo se o ta ded‑o.”

18Yiga tu wom ma tɔge o yiga o ja‑o o vo dedɛɛro wom tei. O ma ta o we, “Pɔɔl na ye peeno to mo bwoŋi amo o ta se a ja nɔn-doŋo konto a ba nmo tei, o na jege taane se o ta de nmo to ŋwaane.” 19Dedɛɛro wom ma ja o jeŋa o vaŋe‑o o ja nwoŋi dáa. O ma bwei‑o o we, “Nmo jege bɛ mo se n ta n bere-ne?”

20O ma ta o we, “Juu tiina kɔgɔ kom mo ke ni daane ba sɛ se ba jwa toŋe ni nmo tei ne se n ja Pɔɔl n vo ba kɔgɔ kom wo se ko taa ye nenɛɛne ba lage se ba faŋe ba nii o ni taane mo. 21Nam yé zaŋe n sɛ ba ni, kolo ŋwaane nɔɔna na dwoi nɔɔna finna to mo lage ba seigi ba tete chwoŋa ni ne se ba taa cheigi‑o. Ba maama nam dugi de Wɛ se ba yé di naa ba nyɔ kolokolo se ko taa nii ba na wó go Pɔɔl maŋa kalo to. Ba nam ti yiga mo se ba ke konto leile, ye ba laam cheigi se nmo ná sɛ ba ni dem.” 22Dedɛɛro wom na nigi konto to, o ma ta ded‑o o we, o yé ta o bere nɔɔn-nɔɔno we o tu o ta keim dem o bere‑o. O ma daare o pa se nɔn-doŋo kom viiri.

23Dedɛɛro wom laam ma bwoŋi o yiga tiina balei o ta de-ba o we, “Pa-na se soja tiina bia yalei (200) zaŋe se ba nwoŋi ba vo Kazaria, dedaane sisei dira fuserepɛ (70) de chichwoa dolena bia yalei (200). Á jege se á ke siri se á nwoŋi ko maŋe de luu nogo tete ne. 24Le-na sisei á pa Pɔɔl se o di, se o de wane o vo o yi gɔmena tu Feliki tei de yazura.”

25Dedɛɛro wom laam ma popone tɔnɔ tento:

26“Amo Kaludu Lusia popone tɔnɔ konto a pa nmo Feliki wolo na ye debam yuu tu gɔmena tu wom. A jɔɔne nmo.

27Juu tiina badwonna mo jaane nɔɔno wonto ye ba kwaane se ba go‑o. Amo nam lɔre we o ye Rom teo jeŋa nɔɔno mo. Konto ŋwaane amo de a nɔɔna bam ma vo dé jwoŋi‑o dé yage. 28A ya lage se a lɔre woŋo kolo ŋwaane ba na jaane‑o ba saŋe to mo. Mo kokuri a jaane‑o a vo a zege ba nakwa kɔgɔ kom yiga ne. 29A ma lɔre we ba saŋe‑o ba tete chullu tem ŋwaane mo. Kolokolo nam tera ko na maŋe se ba go‑o naa ba pe‑o. 30Nɔɔno nam mo tage o bere-ne we Juu tiina badaara mo ke ni daane se ba chɔge nɔɔno wom. Konto ŋwaane mo amo boŋe ye a toŋe‑o nmo tei ne. Amo ma ta de balo na saŋe‑o to we, ba ba nmo tei ba ta kolo na ke to.”

31Soja tiina bam laam ma zaŋe ba ja Pɔɔl ba nwoŋi, ne ba na pɛ-ba ni se ba ke tei to. Ba ma ja‑o tete dem konto ba vo ba yi Antipatera. 32Tega na poore to, soja tiina balo na vei tega ne to ma zege dáane ba jwoori ba vo ba dam jei sem. Ba ma daare sisei dira bam yerane mo se ba tɔge de Pɔɔl ba vo. 33Ba ma ja‑o ba vo ba yi Kazaria. Ba na yi da to, ba ma kwei tɔnɔ kom ba pa gɔmena tu wom ye ba ke Pɔɔl o jeŋa ne. 34O ma ga tɔnɔ kom ye o daare o bwei Pɔɔl o we, teo kɔ mo o nwoŋi? O na lɔre we o nwoŋi Kilikia to, 35o ma ta o we, “Nmo saŋena bam ná tua, amo wó bwei nmo taane dem a nii.” O ma daare o pa ni we ba ja Pɔɔl ba vo sɔŋɔ kolo Pɛ Herodi déem na lɔge to se ba pe‑o da ye ba taa yere‑o.

Currently Selected:

Kikia 23: KBG

Highlight

Copy

Compare