Kikia 21

Pɔɔl vei o yi Jerusalem

1Dé laam ma bane-ba ye dé daare dé viiri. Dé ma kwei dé yiga dé yɔɔre naneo kom wo dé vo dé yi Kos. Tega ma poore. Dé daa ma yi Rodizi. Dé ma zege dáane dé vo Patara. 2Dé na yi dáane to, dé ma na nabworo kodwoŋi ko na lage ko vo Fonikia to. Dé ma vo dé zo ko wo ye dé tɔge dé kɛ. 3Dé na maa vei to, dé ma tole dé na Kupirus buburu kom. Dé ma yage-ko dé jagwia seeni ye dé daare dé kɛ. Dé ma vo dé yi Siria. Dé na yi da to, dé vo dé bɛ dé zege Tura ne. Ko ye dáane mo ba jege se ba le nabworo kom zela yam. 4Dé ma nwoŋi dé vo dé lage balo de na ye Yezu tɔgena to, ye dé ke da yarepɛ ba tei ne. Dé na wora to, Wɛ Sin-laao kom dam ma pa se ba ta de Pɔɔl se o yé zaŋe o vo Jerusalem. 5Debam maŋa kam na kɛ to, dé ma zaŋe dé kwei dé chwoŋa se dé viiri. Yezu nɔɔna bam, de ba kaana, de ba bia maama ma ja debam ba nwoŋi teo kom wone ba vo se ba yage. Dé na vei dé yi naneo kom ni to, debam maama ma kuni dwoona tega ne dé ware Wɛ. 6Dé na ware Wɛ dé ti to, dé ma bane daane ye dé zo nabworo kom. Banto ma jwoori sɔŋɔ.

7Dé ma zaŋe dé yage Tura dé tole naneo kom ni dé vo dé yi Tɔlemaya. Dé na yi da to, mo dé nɛ dé nu-bia. Dé ma jɔɔne-ba ye dé ke dɛ dedwe ba tei ne. 8Tega na poore to, dé ma zaŋe dé vo dé yi Kazaria. Dé ma vo dé peini Filipi ba sɔŋɔ ne. Wonto mo bere nɔɔna Wɛ kwor-ywoŋa kam ye o tɔge o ye nɔɔna barepɛ balo ba na le Jerusalem ne to wo dedoa.#Kikia 6:5; 8:5 9O maa jege o bukwa bana o tei ne. Wɛ Sin-laao kom dam wo ba tei ne se ba taa tɔɔle Wɛ kwora kam. 10Dé na ke da fenfee dáane konto to, Wɛ ni-jwoŋinu wodwoŋi ma nwoŋi Judea o ba debam tei. O yere mo Agabu. #Kikia 11:28 11O na tu debam tei konto to, o ma le Pɔɔl kila o teiŋa ne o ma vɔ o tete nɛ de o jea o ke daane. O laam ma ta o we, “Mo Wɛ Sin-laao kom na tɛ kolo: Juu tiina balo na zoore Jerusalem ne to wó ja kila kanto tu ba vɔ tento dwoŋi, ye ba daare ba ke‑o dwi-gɛ tiina jeŋa ne.”

12Dé na nigi konto to, debam balo maama na wora to ma kwaane dé lwoori Pɔɔl se o daa yé vo Jerusalem. 13O ma leiri o we, “Bɛŋwaane mo abam laara ye á boŋe se á pa amo wo chɔge? Amo ba jege keim se a ke, ba ná lage ba vɔ-ne Jerusalem ne naa ba ná lage ba go-ne de. Amo wó sɛ se a te dé Teiru Yezu yere ŋwaane.” 14Dé na lwoori‑o taa dé ga to, dé ma yage ye dé ta we, “Wɛ wó ke o boboŋa na lage kolo to.”

15Dé na ke da fenfee da to, dé ma zaŋe dé kwaleme dé wonnu dé nwoŋi dé maa kɛ Jerusalem. 16Yezu tɔgena badaara ma zaŋe Kazaria ne ba tɔge debam. Ba ma ja debam ba vo nɔɔno wolo sɔŋɔ dé na lage dé peini da to. O yere mo Manason. O maa ye Kupirus tu ye o maŋe o sɛ Yezu faŋa faŋa.

Pɔɔl na wo Jerusalem ne ye ko ke‑o tei to

17Dé na yi Jerusalem to, dé nu-bia bam ma jeeri debam lanyerane. 18Tega na poore to, Pɔɔl ma zaŋe o tɔge dedaane debam se dé vo dé na Jemsi. Yezu kɔgɔ kom nakwa bam de maama maa wora. 19Pɔɔl ma jɔɔne-ba. O ma tole kolo maama Wɛ na tɔge omo totoŋa yam baŋa ne o ke dwi-gɛ tiina tei ne to o bere-ba. 20Ba na nigi kolo maama o na tage to, ba ma ke Wɛ lei ko ŋwaane. Ba laam ma ta de Pɔɔl ba we, “Debam nu-bu, n nɛ ko na ye tei. Juu tiina morro kɔgɔ kɔgɔ laam mo tu ba sɛ Yezu, ye ba ta tɔge Wɛ ni-dwoora yam de ba wo maama. 21Ba nigi we nmo yeini n bere Juu tiina balo na zoore dwi-gɛ tiina wone to se ba yage Wɛ nia yalo o na ke Moses jeŋa ne to. Ba nigi we n tɛ nɔɔna bam konto se ba daa yé taa gwoni ba bia peina, se ba ta yé taa tɔge debam Juu tiina kikia na ye tei to. 22Dé nam wó ke tɛ mo? Juu tiina balo na wo ywo-seeni to jege se ba lɔre we nmo tua. 23Tɔ. Dé wó bere‑m nmo na wó ke tei. Nɔɔna bana wo debam tei ne ba na tiŋi ba ni de Wɛ.#Kikia 18:18 24Ba ná lage ba vo Wɛ diga kam se ba kwɛ ba tete de Wɛ, nmo jege se n tɔge n vo mo, se n daare n ŋwe ba na ke kolo to jene. Konto wó pa-ba chwoŋa se ba fane ba yuni. N ná ke konto, nɔɔno maama wae o lɔre we, ba na tɛ kolo ba pa nmo to dae chega. Ba nam wó lɔre we nmo tete tɔge Wɛ nia yam na bere tei to mo. 25Ko daare dwi-gɛ tiina balo na tu ba sɛ Yezu to, debam maŋe dé popone tɔnɔ dé pa-ba ye dé ta kolo dé na boŋe to we, ba yé zaŋe ba di wodiu kolo nɔɔna na mɛ ba kaane jwona to, naa ba di woŋo kolo na jege jana to, naa ba di varem wolo ba na jujugi ba go to. Dé daa ta ma ta-ba se ba fɔge ba ja ba tete de kabwoŋa kikia maama.”

26Pɔɔl ma sɛ ba taane dem. Tega na poore to, o ma ja nɔɔna bam o vo se o tɔge o kwɛ o tete de Wɛ. O ma daare o zo Wɛ diga kam se o ta o bere ka yiga tiina bam da yalo ni ta na daare se nɔɔna bam kwɛ ba tete de Wɛ ba ti, ye ba dedoa dedoa laam go ba wonnu ba kaane Wɛ to.

27Da yarepɛ yam ni na daare fee se ya ti to, Juu tiina badaara ma na Pɔɔl Wɛ diga kam wone. Banto nwoŋi Asia teo kodwoŋi mo. Ba ma pa se nɔn-kɔgɔ kom maama na wora to bane zaŋe de Pɔɔl pa se ba zi‑o. 28Ba ma laare ba ta ba we, “Dé badwonna Isarele dwi tiina bam, nii-na ywo! Nɔɔno wonto mo ye wolo na tole jei maama o bere nɔɔna maama se ba yé taa nege debam Isarele dwi tiina, se ba yé taa sɛ Wɛ nia yalo debam na tɔge to, se ba daare ba pa Wɛ diga kanto de ji kafɛ. Ko woli da, o ta jaane dwi-gɛ tiina badwonna mo o zo ywo-seeni pa se ba digiru chɔge jeiga kalo na ye Wɛ tete nyem to.” 29Ba déem tage konto dwoŋi kolo ŋwaane ba ya nɛ Torofima de Pɔɔl na tɔge daane teo kom wone ye o ye dwi-gɛ tu na nwoŋi Efesia to. Ba déem boŋe we nɔɔno wom konto mo Pɔɔl jaane o zo Wɛ diga kam.

30Teo kom nɔɔna bam maama ma tiini ba chiŋi. Ba ma duri ba vo jeiga kam. Ba laam ma zi Pɔɔl ba tuuri ba ja nwoŋi Wɛ diga kam wone ye ba daare ba pe ka nia yam maama. 31Nɔn-kɔgɔ kom maa kwaana se ba go Pɔɔl. Rom soja tiina dedɛɛro wom ma ni we bobɔga to Jerusalem teo kom maama wone mo. 32O na nigi konto to, o ma ja soja tiina de ba yiga tiina badaara, ye ba duri lela ba vo ba yi kɔgɔ kom na wo mɛ to. Nɔɔna bam na nɛ‑o de o soja tiina bam konto to, ba ma yage Pɔɔl magem. 33Dedɛɛro wom ma vo Pɔɔl tei o ja‑o. O ma pa ba kwei chaponno telei ba ma vɔ‑o.#Kikia 20:23 O ma daare o bwei se o lɔre nɔɔno wom na ye wolo to de o na ke kolo to. 34O na bwei konto to, nɔɔna badaara kɔgɔ kom wone ma laare ba ta n ni n ni. Sɔɔ kom na ye tei to ma pa se dedɛɛro wom ware se o lɔre kolo na ke chekke to. Konto ŋwaane o ma pa o nɔɔna bam ni se ba ja Pɔɔl ba vo ba dam jei sem. 35Ba na jaane‑o ba yi nateina yam diinim jei to, soja tiina bam déem jege se ba kwei‑o mo ba zeŋe, kolo ŋwaane nɔn-kɔgɔ kom yia tiini ya seene o baŋa ne. 36Nɔɔna bam maama ma pɛ ba pu o kwaga ye ba laare ba tɛ ba we, “Pa-na dé go‑o!”

37Soja tiina bam na daare se ba ja Pɔɔl ba zo ba dam jei sem to, o ma ta de ba dedɛɛro wom o we, “A jege chwoŋa se a ta taane a bere‑m na?” Dedɛɛro wom na nigi taane dem to, o ma bwei Pɔɔl o we, “N ke tɛ mo n wae n ŋɔɔne Girisi tiina taane dem? 38Ko na ye konto to, nmo dae Ejipti tu wolo déem na pɛ se nɔɔna ve ba teo kom yiga tiina ye o daare o le nɔɔna morro tena (4,000) na ye jar-keira o ja vo kagoa kam yuu ne to.” 39Pɔɔl ma leiri o we, “Aawo. Amo ye Juu tu mo. Ba loge amo Kilikia teo Tasusi ne mo. Amo ye teo kamunu kom konto nɔn-bu mo. A lwoori‑m se n pa-ne chwoŋa se a ŋɔɔne de nɔn-kɔgɔ kom.” 40Dedɛɛro wom ma sɛ. Pɔɔl ma zaŋe o zege nateina yam baŋa ne. O ma zeiŋi o jeŋa kɔgɔ kom baŋa ne. Ba maama ma cheigi sɔɔ. O ma ŋɔɔne de-ba de ba tete Juu tiina taane dem.

Currently Selected:

Kikia 21: KBG

Highlight

Copy

Compare