2 Piita 2
2
Vwa berena taane
1Faŋa faŋa to nɔɔna déem mo wora Wɛ nɔɔna bam wone ba na bere we ba ye Wɛ sampwori ye ba dae. Abam de wone berena wó taa wora ye ba ba jege chega. Banto wó ŋɔ ba zo abam wone ye ba ke swa ba bere berem delo na dae Wɛ nyem ye de chɔge nɔɔna to. Banto maa yeini ba ve ba Yuu-tu Yezu, ye o ye wolo na ŋwe ba wɛleera jene to mo. Konto ŋwaane ba kikia yam wó pa se Wɛ chɔge-ba lela. 2Nɔɔna dedɛ nam wó sɛ ba na bere kolo to, ye ba daare ba ke ba wo-digiru kikia yam dwoŋi. Ba na ke wonnu telo to wó pa se nɔɔna taa yaale Wɛ berem delo na ye chega to. 3Ni-gane-nyena bam konto na ye nɔn-kwollu to, ba wó kwaane se ba na nyɔɔre abam baŋa ne de ba na jege taane delo na ye tusim yerane to ba bere abam. Faŋa faŋa to, Wɛ maŋe o ti o yiga se o di banto taane, ye waarem wó ba ba baŋa lela.
4Ko nam ná ye malese selo déem na tusi to, Wɛ wo duri se ŋwaŋa. O nam de-se o yage te-seŋa ne mo. O ma pe-se bɔɔna wone mɛ na ye lim yerane to, se se taa wora taa se ko taa vei o borem dɛ dem o na wó chɔge-se to. 5Ko woli da, ko ná ye logo baŋa déem na ye tei faŋa faŋa ye nɔɔna ve Wɛ to, Wɛ déem wo duri banto ŋwaŋa. Ko maa ye Noah yerane mo Wɛ jwoŋi o ŋwea, ko woli de o diga tiina barepɛ bam, de wonto na tɔɔle Wɛ chega kam o bere nɔɔna tei to. Wɛ ma daare o chɔge balo na ve o ni to, ye o pa se doa tiini ka ne ka lim logo kom ye ba maama nyɔ na ba te.#Pulim 6:1–7:24
6Ko daa ta ná ye nɔɔna balo déem na zoore Sodom de Gomora ne to, Wɛ pɛ se mini di ba jei sem de daare tentwarem yerane, se ko bere we ba ba jege bora. O chɔge-ba konto se ko taa ye maana mo ko pae balo maama na boŋe se ba ve o ni to.#Pulim 19:1-26 7O ma daare o vere Lot ba wone o yage. Wonto déem mo sɛ Wɛ chega kam ye o wo tiini ko chɔge de puseŋ-nyena na ke wo-digiru kikia tei to. 8O na ye nɔn-ŋom ye o zoore de-ba to, o ma na ba keim-lwanno tem maama ye o ta kwori o ni ba ni-botare sem. Ko maa tiini ko jege o boboŋa ko daana de ba na toŋe ba chɔge Wɛ nia yam tei to.
9Ko maama bere we, Baŋa Wɛ wae o jwoŋi balo na sɛ‑o to o yage se ba yé na cham delo na maŋe-ba to. Ko nam ná ye balo na ve‑o to, o wae o peene-ba de waarem se ko vo ko yi o borem dɛ dem o na wó chɔge-ba de wone to. 10Ko ta ná ye balo yera na maŋe de wo-zɔɔna kikia, de balo na ba kɔre nɔɔn-nɔɔno dam to, Wɛ wó waare banto ko ja gaale.
Ni-gane-nyena bam na wo á wone to de ye konto mo. Ba ba kɔre chaveera ye ba ta ba nege nɔɔn-nɔɔno. Ba maa yeini ba ŋɔɔne ba yaale dedɛɛra balo na jege paare Wɛ tei ne to. 11Wɛ malese sem tete nam jege dam se dwoi ni-gane-nyena bam, ye se nam ba sɛ se ŋɔɔne se yaale wɛyuu dedɛɛra bam dé Teiru wom yiga ne. 12Ni-gane-nyena bam nam yeini ba ŋɔɔne ba yaale woŋo kolo maama ba na yeiri ko kuri to mo. Ba na ke wo-yɔɔro telo to, ba maa nye de ga-vara mo ye ba ba jege boboŋa. Ba na loge-ba to, ko ye se nɔɔna ja-ba ba go mo. Nɔɔna bam konto wó na chɔgem ne ga-vara bam tei. 13Wɛ wó chɔge-ba se ko maŋe de ba tete na chɔge nɔɔna tei to. Wonnu telo na pae se ba na ywoni to mo ye kachaare kikia yalo ba na paale ba ke jaja to. Ba maa tɔge de abam ba di wodiu kolo á na yeini á la daane se á di to, ye ba gane abam de ba na ke kachaare kikia á wone to. Ba na ye nɔn-digiru to ma pae se ba chɔge abam lam, nenɛɛne sambinnu na dwei wo-napwoŋo tei to. 14Banto yi maa sui ka-laga yerane mo. Ba maa ba jege siu de wo-balwaaro kikia, ye ba soge balo boboŋa na bwona to se ba de tusa. Ba maa ye nɔn-kwollu ye ba me de konto. Wɛ wó sɔɔle lwarem o yage ba yuu ne. 15Banto ma tusi ye ba daare ba ve chwo-laao tɔgem. Ba maa ke kikia yalo dwoŋi Beyora bu Balaam déem na ke to. O yi déem ma su nyɔɔre delo o na wó na o keim-balwaaro tem baŋa ne to. 16O na ve Wɛ ni to, Wɛ ma bwɛ‑o. Wɛ ma pa se varem na ba ŋɔɔne to mo ŋɔɔne de nabiinu kwora. O tete bonaga mo ŋɔɔne ka bwɛ‑o konto, se ko che Wɛ sampwora kam de jworim delo o na boŋe se o ke to.#Jeelim 22:28
17Nɔɔna bam konto maa ba jege nyɔɔre, ne buli-yi delo na na ba buri tei to mo. Ba ta maa nye de kunkwonnu telo vo-fɔrɔ na kale pa te jage to. Wɛ maa jege jei selo na tiini se ye lim yerane to se o ke-ba da. 18Ba maa tiini ba ŋɔɔne wo-kenkagela yalo na ba jege bu to. Ba maa yeini ba soge balo na bobo se ba pɔɔre ba tete de nɔɔna balo na tɔge tusim to. Ba maa mae wo-zɔɔna yalo nabiina yera na lage to mo ba soge-ba se ba ke wo-digiru kikia. 19Ba maa bere we kolokolo tera ko na wó che ba yiga. Balo tete na bere konto to nam nye de kabɛ mo, ba totoŋ-zɔɔna yam na wane-ba to ŋwaane. Kokuri, woŋo kolo maama na tu nɔɔno baŋa ko wane‑o to mo pae o ye kabaa ko tei ne. 20Nɔɔna ná tu ba lɔre Yezu Krista wolo na ye debam Teiru de de Vereno to chega kam, ko wó pa se ba lu logo baŋa wo-zɔɔna yam wone. Ba laam ná pipiri ba sɛ-ya ye ya jwoori ya wane-ba, ko kweelim jei ne ko wó taa ye lɛɛro mo ko pa banto se ko dwoni boboa kam ne. 21Kolo ŋwaane, ba ya ná wo lɔre Wɛ chega tɔgem chwoŋa kam, ko ya wó taa lana ko pa-ba ko dwoi ba ná tu ba lɔre-ka ye ba laam pipiri ba za ba boboŋa de Wɛ ni delo o na pɛ-ba se ba taa tɔge to. 22Ko na ke banto tei to nye de sinseira kadwoŋi ye ka bere chega ka we:
“Kukura jwoori ka di ka tetwanno.”#Memaŋa 26:11
Sinseira kadwoŋi ta we:
“Nmo ná jaane teiri n swɛ de yera,
de nam ta wó jwoori de bibili bworu wone mo.”
Currently Selected:
2 Piita 2: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
