1 Korinti 1

1Amo Pɔɔl wolo Wɛ na kuri-ne de o tete boboŋa se a taa ye Yezu Krista totoŋa nakwe to mo popone tɔnɔ konto, ye dé nu-bu Sɔsɔdane mo tɔge o woli-ne. 2Dé popone se dé pa abam balo na ye Wɛ kɔgɔ kom wo nɔɔna ye á zoore Korinti ne to mo.#Kikia 18:1-18 Abam maa ye balo Wɛ na kuri se á ta‑á ye wose Yezu Krista ŋwaane to. O ma le abam se á ta‑á ye o nɔɔna, ko woli de balo na wo jei maama ne ye ba zuli Yezu Krista to. Wonto maa ye ba maama Teiru, ye o ye debam de Teiru.

3Dé Kwo Wɛ, de dé Teiru Yezu Krista wó pa abam zaane de yazura.

4Maŋa maama amo yeini a ke Wɛ lei abam ŋwaane, de o na ke zaane abam yuu ne Yezu Krista ŋwaane to. 5Abam na me de Yezu to, Wɛ seene o woli abam de yuu-yeino maama se á ta‑á wae á ŋɔɔne o taane dem, ye á kwori á yei o chega kam maama. 6Konto to, Yezu Krista taane dem dé déem na tage de abam to tiini de ji chega abam tei ne. 7Á nɛ Wɛ pɛɛra yalo maama á na lage to ye á cheigi dé Teiru Yezu Krista se o jwoori o ba se dé na‑o. 8Wonto wó taa nii abam baŋa ne taa, se á wae á ta‑á zege lanyerane se ko taa vei o dɛ-kamunu kom, se tusim daa yé taa wo abam de Wɛ laŋa ne. 9Wɛ zege o chega wone mo, ye wonto mo kuri abam se á me de o bu Yezu Krista na ye debam Teiru wom.

Korinti tiina jege popɔra daane

10A nu-bia bam, a lwoori abam dé Teiru Yezu Krista yere ŋwaane se á ta‑á jege ni-mɔrɔ, se á yé ta‑á pɔɔre daane. Kwaane-na á ke á boboŋa daane se á ke ni dedwe. 11Kokuri, Cheloa ba sɔŋɔ tiina badaara tage de amo we, á mage ni-kantɔgɔ mo daane. 12Ko na ye tei to, abam badaara we, á tɔge Pɔɔl mo. Abam badwonna maa we, á tɔge Apolo. Badwonna maa we, ba tɔge Piita. Badwonna de maa we, ba tɔge Yezu Krista. 13Á na pɔɔre pɔɔre Yezu Krista konto to, ko jege kuri na? Amo Pɔɔl mo tege dagara kam yuu ne naa wɔ mo? Á na jwoŋi sɛɛm to, á jwoŋi se á sɛ Pɔɔl mo na? 14A ke Wɛ lei, kolo ŋwaane amo wo pɛ abam wolowolo sɛɛm, ko ná dae Kirisipu de Gayus yerane.#Kikia 19:29 15Konto to, nɔɔn-nɔɔno bá wane o ta we, á jwoŋi sɛɛm amo ŋwaane. 16A ya swei woŋo fee. A pɛ Stefana sɔŋɔ tiina de sɛɛm. Ko daare konto kwaga ne, wolo ná woli da, a daa ware a guli. 17Yezu Krista toŋe-ne se a taa tɔɔle Wɛ kwor-ywoŋa kam mo a bere nɔɔna, ye ko dae se a taa pae nɔɔna sɛɛm. A na ŋɔɔne Wɛ taane tei to, ko dae logo baŋa swa mo a maa ŋɔɔna. A ya ná ŋɔɔne konto dwoŋi, a ya wó kwoli Yezu yere, pa se o toone dem dagara kam yuu ne ya bá taa jege chega nɔɔna tei ne.

Wɛ swa yam gare nabiina swa

18Ko ye chega mo we, Yezu toone dem dagara kam yuu ne ye jworim taane mo balo yiga na tera de Wɛ to tei ne. Ko nam ná ye debam balo o na jwoŋi o yage to tei ne, ko bere Wɛ tete dam jaja mo. 19Ko nam maŋe ko popone Wɛ tɔnɔ kom ne we:

“Amo Baŋa Wɛ wó chɔge swa tiina bam boboŋa,

ye a daare a pa yi-pore-nyena bam yi-poro kom yaale.”#Izaya 29:14

20Swa tiina swa yam daa jege kuri na? Tɔn-yeena, de nɔɔna balo na yei ŋɔŋa to yi-poro kom jege kuri na? Wɛ nam bere debam we, logo baŋa swa yam maama ye jworim mo. 21Wɛ tete swa ŋwaane mo pae nabiina bá wane ba ma ba tete swa ba lɔre‑o. O nam ke o boboŋa ne se o tɔge taane delo dé na bere nɔɔna ye ba pae de ye jworim to ŋwaane mo o ma jwoŋi balo na sɛ-de to o yage. 22Juu tiina lage se ba na wo-kenkagela yalo na bere Wɛ chega kam to mo. Girisi tiina maa lage se ba cheigi taane delo na wó bere-ba swa to. 23Ko ná ye debam, dé ŋɔɔne Yezu Krista wolo na tege dagara yuu ne to taane mo. Taane dem konto maa ye ta-balɔrɔ mo Juu tiina tei ne. De maa ye jworim mo de pae dwi-gɛ tiina. 24Ko daare debam balo Wɛ na kuri to tei ne, ko ná ye Juu tiina de dwi-gɛ tiina de, taane dem konto mo pae de lɔre we, Yezu Krista ye Wɛ dam tu, de o swa tu.#Kolosia 2:3 25Woŋo kolo nɔɔna na pae ko ye jworim Wɛ tei ne to gare nabiina swa maama, ye kolo na bwomma o tei ne to dana ko dwoi nabiina dam.

26A nu-bia bam, boŋe-na á nii á déem na ye tei ye Wɛ laam ba o kuri abam to. Ko dae á dedɛ yi déem mo poore, nenɛɛne nabiina na lage yi-poro kolo to. Ko dae á dedɛ mo ye dedɛɛra, naa á dedɛ mo nwoŋi naduna sam. 27Wɛ nam paale o kuri wonnu telo nabiina na pae te ye wo-jworru to mo, se o ma pa chaveera di swa tiina. O ma kuri wonnu telo nabiina na pae te ye wo-bwonnu to, se o ma pa chaveera di dedɛɛra. 28O ma daare o kuri wo-yɔɔro de wo-korro telo maama nabiina na gwooni to, se o ma pa wonnu telo nabiina na pae te jege nyɔɔre to ji kafɛ. 29Wɛ kuri wonnu tento dwoŋi mo, se nabiina yé na chwoŋa se ba taa jege fia o yiga ne. 30Wɛ nam mo pɛ se abam me de Yezu Krista. Konto ŋwaane mo swa yalo Yezu na jwoŋi Wɛ tei ne to laam jigi debam swa. Wonto mo pae dé jege chega Wɛ tei ne, ye dé bochara fɔge ya kwɛ fase. O ma daare o kwei o tete ŋwea o ma vere debam wɛleera jeŋa ne o yage. 31Konto to, kolo na popone Wɛ tɔnɔ kom ne to ye chega mo, de ko na we, “Wolo ná boŋe se o taa mage o nyɔɔne, se o pa ko taa ye dé Teiru wom ŋwaane.”#Jeremia 9:24

Currently Selected:

1 Korinti 1: KBG

Highlight

Copy

Compare