رومية 9

الفصل التاسع

1كنقول الحقّ في المسيح، ما كنكدب شي والضمير ديالي كيشهد لي في الروح القُدُس 2بلّي عندي غبينة كبيرة والحريق في قلبي بْشكل مستَمر 3حيت كُنْتْ كنبغي نكون ملْعون، يعني مفارق على المسيح، بْسباب الخير د الخوت ديالي، الّي هُمَ من لحمي وْدمّي، 4الّي هُمَ شعب إسْرائيل. الله عملوم أُولادو، وْعندوم المجد والعهود والشريعة والعبادة والوعود، 5وْمن عندوم الجدود وْمن عندوم جا المسيح في الجسد البشري، الّي هُوَ الإلَه فوق كُل شي، المبْروك دائمًا، آمين!

6وَلكن ما كنقصد شي بلّي الكلام د اللّٰه فشل، حيت ماشي كاملين بَني إسْرائيل هُمَ من شعب إسْرائيل. 7واخّا هُمَ من ترّيكة إبراهيم، هُمَ ماشي كاملين الأبْناء ديالو. بالعكس، قال الله نإبراهيم: "بإسْحاق غادي تكون عندك الدرّيّة."#9‏:7 هَد الاقتباس من سفر التكوين 21‏:12. 8يعني، الّي هُمَ أُوْلاد طبيعيّين، ماشي هُمَ أُوْلاد اللّٰه، وَلكن أُوْلاد الوعد هُمَ الترّيكة ديال إبراهيم. 9حيت الوعد هُوَ هَدا: "من دابا عام غادي نجي وْفي ديك الوقت سارة غادي تولد ولد."#9‏:9 هَد الاقتباس من سفر التكوين 18‏:10. 10وْماشي هَد الشي وْكان، وَلكن رِفْقة حبلَتْ حتّى هي من رَجل واحد، الّي هُوَ الجدّ ديالنا إسْحاق. 11حيت باقي ما خلقو شي التوام وْما عملو لا خير ولا شرّ، وْباش يتأكّد القصد د الاخْتيار الإلَهي، 12ماشي على الأعْمال، وَلكن على وعد اللّٰه، قالّاْ الله بلّي "الكبير غادي يخدم الصغير،"#9‏:12 هَد الاقتباس من سفر التكوين 25‏:23. 13فحال ما هُوَ مكْتوب: "حبّيتْ يَعْقوب وْكرهْتْ عيسو."#9‏:13 هَد الاقتباس من سفر النَّبي ملاخي 1‏:2‏-3.

14شنّو غادي نقولو؟ واش اللّٰه ماشي عادل؟ حاشا ناللّٰه! 15حيت قال نْموسى: "أنا غادي نرحم الّي بغيتْ نرحم وْغادي نحنّ على الّي بغيتْ نحنّ عليه."#9‏:15 هَد الاقتباس من سفر الخروج 33‏:19. 16إدَن، ما كَيْتعلّق شي بالرغْبة ولا بالمجْهود د الإنسان، وَلكن بْرحْمة اللّٰه. 17حيت كيقول الكتاب نْفِرْعَون: "رفعْتك نْهَد الشي بالضبط، باش نظهّر فيك القوّة ديالي وْباش يتنادى اسمي في الأرض كاملة."#9‏:17 هَد الاقتباس من سفر الخروج 9‏:16. 18إدَن، اللّٰه كيرحم الّي بغى وْكيقصّح القلب د الّي بغى. 19وَلكن أنتينا غادي تقول لي: "وْعلاش باقي كَيتَّهمنا اللّٰه؟ شكون يقدر يضادّ مع الإرادة ديالو؟" 20آ بن آدم! شكون أنتينا باش تطلب الحساب ناللّٰه؟ واش غادي تقول الطنْجرة د الطين نِلّي عدّلاْ: "علاش صنعْتِني هَيداك؟" 21واش ما عندو شي الفخّار الحقّ باش يصنع من نفس الطين بعض القشوع نالكرامة والبعض نالمدلّة؟ 22وْكيفاش إدا اللّٰه بغى يبيّن الغضب والقوّة ديالو وْتحمّل القشوع د السخط بالصبر بزّاف الّي مقْصودين نالهلاك؟ 23وْكيفاش إدا اللّٰه بغى يبيّن الكترة د المجد ديالو نالقشوع د الرحْمة الّي هُوَ وجّدوم مقْصودين نالمجد؟ 24هَدوك كُنّا حنايَ، الّي عَيّط نّا اللّٰه ماشي غير من اليهود وْكان، وَلكن حتّى من غير اليهود. 25كيفْما كيقول عاود في الكتاب د هوشَع: "غادي نسمّي شعبي الناس الّي ما كانو شي شعبي، وْغادي نسمّي عزيزتي هَديك الّي ما كانت شي عزيزتي."#9‏:25 هَد الاقتباس من سفر النَّبي هوشع 2‏:23. 26"وْفي الموطَع بْنفسو فاين تْقال لكُم: «أنتُمَ ماشي شعبي،» تمّاك غادي يسمّيوكُم أُوْلاد اللّٰه الحيّ."#9‏:26 هَد الاقتباس من سفر النَّبي هوشع 1‏:10. 27وإشَعْيا كيعيّط من جهة إسْرائيل: "واخّا يكون العدد د بَني إسْرائيل فحال الرمل د البحَر، غير البقيّة هي الّي غادي تنجا. 28حيت الرَّبّ غادي يكمّل كلامو على الأرض بالتقْوى وْبلا ما يتعطّل."#9‏:28 هَد الاقتباس من سفر النَّبي إشعيا 10‏:22‏-23. 29كيفْما سبق إشَعْيا وْقال: "كَكان رَبّ الجنود ما خلّى نّا شي الدرّيّة، كَكُنّا رجعْنا فحال سَدوم وْتشبّهْنا بْعَمورة."#9‏:29 هَد الاقتباس من سفر النَّبي إشعيا 1‏:9.

30شنّو غادي نقولو دابا؟ كَنْقولو بلّي الأُمَم الّي ما كانو شي كَيْفتّشو على التقْوى لحقوها، يعني التقْوى الّي هي بالإيمان. 31وَلكن إسْرائيل الّي كانو كَيْفتّشو على واحد الشريعة د التقْوى الّي اتّعطات لوم، ما لحقوها شي. 32علاش؟ حيت ما فتّشو شي بالإيمان، وَلكن بالأعْمال، حيت هُمَ عترو بالحجْرة د العترة، 33فحال ما هُوَ مكْتوب: "ها انا كَنْنزّل في صِهْيون واحد الحجْرة الّي كَيْعترو بِها والصخْرة الّي كَتْطيّحوم، وَلكن كُل واحد الّي كَيآمن بِه ما غادي شي يتخيّب."#9‏:33 هَد الاقتباس من سفر النَّبي إشعيا 28‏:16.

Currently Selected:

رومية 9: ary

Highlight

Copy