رومية 10

الفصل العاشر

1آ الخوت، شَوق قلبي وْصلاتي ناللّٰه من جهة اليهود هي باش ينجاو. 2حيت أنا كنشهد لوم بلّي عندوم غيرة على اللّٰه وَلكن ماشي على حسب المَعْرفة، 3حيت ما كانو شي كَيْعرفو التقْوى د اللّٰه وْحاولو يتبّتو التقْوى ديالوم كيفْما بغاو، وْهَيدا ما تسلّمو شي نالتقْوى د اللّٰه. 4حيت المسيح كمّل الشريعة نالتقْوى نْكُل واحد الّي كَيآمن. 5حيت موسى كَيوصف هَيدا التقْوى الّي تابتة بالشريعة: "الإنسان الّي كيعمل بِها غادي يحيا بِها."#10‏:5 هَد الاقتباس من سفر اللاويّين 18‏:5. 6أمّا التقْوى الّي تابتة بالإيمان، كيتكلّم الكتاب عليها هَيدا: "ما تقول شي في قلبك: «شكون غادي يطلع نالسما؟»" يعني باش يهبّط المسيح، 7أَوْلا "شكون غادي يهوّد نالهاوية؟" يعني باش يطلّع المسيح من بين الميّتين. 8وَلكن شنّو كيقول؟ "الكلام قريب منّك، وْهُوَ كاين في دُقمك وْفي قلبك."#10‏:8 هَد الاقتباسات الجزئيّة من سفر التثنية 30‏:11‏-14. هَدا كلام الإيمان الّي كَنْبشّرو بِه: 9إدا اعْتَرفْتِ بْدُقمك بلّي يَسوع هُوَ الرَّبّ، وآمنْتِ بْقلبك بلّي اللّٰه بَعتوْ من بين الميّتين، غادي تنجا. 10حيت كَيآمن الإنسان بالقلب نالتـبْرير، وَلكن كَيعْتَرف بالدقوم نالنجا. 11حيت الكتاب كيقول: "كُل واحد الّي كَيآمن بِه ما غادي شي يتخيّب."#10‏:11 هَد الاقتباس من سفر النَّبي إشعيا 28‏:16. 12حيت ما كاين شي الفرق بين اليهودي واليوناني، حيت الرَّبّ بْنفسو، الّي هُوَ الرَّبّ د الناس كاملين، كيبارك في الناس كاملين الّي كَيسْتَعنو بِه. 13حيت "كُل واحد الّي كيدعي بِاسم الرَّبّ غادي ينجا."#10‏:13 هَد الاقتباس من سفر النَّبي يوئيل 2‏:32. 14وْكيفاش غادي يسْتَعنو بْهَداك الّي ما آمنو شي بِه؟ وْكيفاش غادي يآمنو بْهَداك الّي ما سمعو شي بِه؟ وْكيفاش غادي يسمعو بلا ما يبشّروم حتّى واحد؟ 15وْكيفاش غادي يبشّرو إدا ما تصيفطو شي؟ فحال ما هُوَ مكْتوب: "شحال مزيّونين الرِّجلين د هَدوك الّي كَيْبشّرو بالخبار د الخَير!"#10‏:15 هَد الاقتباس من سفر النَّبي إشعيا 52‏:7. 16وَلكن ماشي اليهود كاملين طاعو الإنجيل، حيت إشَعْيا كيقول: "يا رَبّي، شكون تيّق الخبار ديالنا؟"#10‏:16 هَد الاقتباس من سفر النَّبي إشعيا 53‏:1. 17على ديك الشي الإيمان كيجي بالسمع، والسمع بْكلام المسيح. 18وَلكن أنا كنقول: "واش ما سمعو شي؟" إيّاه، سمعو! "خرج الصوت ديالوم نالأرض كاملة، والكلام ديالوم حتّى نْطراف الدُّنيا."#10‏:18 هَد الاقتباس من المزمور 19‏:4. 19وَلكن أنا كنقول، واش بَني إسْرائيل ما فهمو شي؟ في الُوّل موسى كيقول: "أنا غادي نهيّجكُم باش تغيرو من أُمّة الّي هي ماشي أُمّة. غادي نقهركُم بواحد الأُمّة مكلّخة."#10‏:19 هَد الاقتباس من سفر التثنية 32‏:21. 20من بعد إشَعْيا كيزعَم يقول: "الناس الّي ما فتّشو شي عليَّ جبروني، وْظهرْتْ نِلّي ما سقصاو شي عليَّ." 21أمّا على إسْرائيل كيقول: "النهار كامل مدّيتْ اليَدّين ديالي نواحد الشعب عاصي وْمتمرّد."#10‏:21 هَد الاقتباسات من سفر النَّبي إشعيا 65‏:1‏-2.

Currently Selected:

رومية 10: ary

Highlight

Copy