رومية 12

الفصل طناش

1على ديك الشي، آ الخوت، كَنْطلبكُم بْسباب الرحْمة د اللّٰه تقدّمو الأجْساد ديالكُم فحال دبيحة حيّة مقدّسة مقْبولة عند اللّٰه، وْهَدي هي العبادة المعْقولة ديالكُم. 2وْما تشكّلو شي راسكُم حسب هَد الدنيا، وَلكن تبدّلو بْتَجْديد العقول ديالكُم باش تعرفو شنّي هي إرادة اللّٰه المزْيانة المرْضيّة الكاملة. 3حيت أنا كنقول بالنعْمة الّي اتّعطات لِلي نْكُل واحد فيكُم بلّي ما يخمّم شي في نفسو فوق الّي واجب عليه يخمّم، وَلكن يخمّم بالعقل على حسب القياس د الإيمان الّي اللّٰه فرّق على كُل واحد. 4حيت فحال ما عند كُل واحد منّا جسد واحد بْبزّاف د الأعْضاء، وَلكن ما عندوم شي نفس الدَّور، 5بْنفس الطريقة، واخّا حنايَ بزّاف بِنا، حنايَ جسد واحد في المسيح وْكاملين أعْضاء د بَعضيّاتنا. 6وَلكن عندنا مواهب مخْتَلفة على قدّ النعْمة الّي اتّعطات نّا: إدا شي واحد كَيْتنبّأ، يكون على قدّ الإيمان، 7وِادا كيخدم، يبالي بالخدْمة، وِادا كيقرّي، يبالي بالتعْليم، 8وِادا كيشجّع، يبالي بالتشْجيع، وِادا كيعطي، يعطي بالسخاوة، وِادا كيڭوّد، يحكم بالمعْقول، وِادا كيرحم، يرحم فرْحان.

9المحبّة خصّاْ تكون بالصراحة. كرهو الشَّرّ، تبعو الخَير. 10تحابّو مع بعضيّاتكُم بْمحبّة الخوت، مفضّلين بعضيّاتكُم بالكرامة. 11خدمو بالمجْهود وْما تكسلو شي. كونو خدّامين الرَّبّ، حارّين في الروح. 12فرحو بالرجا، صبرو في الضيق، مداومين على الصلاة. 13اشْتَركو مع القدّيسين في الاحْتياج ديالوم، زيدو ضيّفو البرّانيين. 14باركو الّي كَيْمرْمدوكُم، باركو وْما تلعنو شي. 15فرحو مع الّي كَيْفرحو وْبكيو مع الّي كَيْبكيو. 16كونو في نفس واحدة مع بعطكُم. ما تتكبّرو شي وْتواضعو مع المتواضعين. ما تحسبو شي راسكُم حُكَماء. 17ما تردّو نْحتّى شي واحد الشَّرّ بالشَّرّ. حاولو تعملو الخَير قدّام الناس كاملين. 18إدا يمكن، على قد القدر ديالكُم، عيشو في سلام مع الناس كاملين. 19ما تـنْـتَقمو شي بْنَفسكُم، آ الحباب، وَلكن خلّيو العقاب في يَد اللّٰه، حيت مكْتوب: "ديالي الانْتقام، أنا غادي نجازي،"#12‏:19 هَد الاقتباس من سفر التثنية 32‏:35. كيقول الرَّبّ. 20وَلكن "إدا جاع العدو ديالك، وكّلوْ، وِادا عطش، شرّبوْ، حيت إدا عملْتِ هَد الشي كتجمع الجمر د العافية على راسو."#12‏:20 هَد الاقتباس من سفر الأمثال 25‏:21‏-22. 21ما تخلّي شي الشَّرّ يغلبك. بالعكس، غلب على الشَّرّ بالخَير.

Currently Selected:

رومية 12: ary

Highlight

Copy