يَعْقوب 4

الفصل الرابع

1ماين كَيْجيو الحروب والمدابزات بيناتكُم؟ واش ماشي من الشهوات الّي كيتحاربو في الأعْضاء ديالكُم؟ 2كتشهّاو وْما عندكُم شي، كتقتلو وْكتحسدو وْما كتلحقو حتّى شي حاجة. كَتدابزو وْكتحاربو، وَلكن ما عندكُم شي، حيت ما كتطلبوه شي. 3ملّي كتطلبو شي حاجة، ما كتدّيو والو، حيت ما كتطلبو شي بالنيّة الصافية، وَلكن غير باش تخسروها على الشهوات ديالكُم.

4آ الزانيين! واش ما كَتْعرفو شي بلّي الصُّحبة د الدنيا هي عداوة مع اللّٰه؟ إدا بغى شي واحد يكون صاحب الدنيا، غادي يرجع العدو د اللّٰه. 5واش كتظنّو بلّي الكلام د الكتاب باطل ملّي كيقول بلّي الروح الساكن فينا كيغير علينا؟ 6وَلكن كيعطي النعْمة بْسخاء. على ديك الشي الكتاب كيقول: "اللّٰه كيقاوم المتكبّرين، وَلكن كيعطي النعْمة نالمتواضعين."#4‏:6 هَد الاقتباس من الأمْتال 3‏:34. 7إدَن، خضعو ناللّه. قاومو إبْليس وْهُوَ غادي يهرب منكُم. 8قرّبو ناللّه وْهُوَ غادي يقرّب نْعندكُم. نقّيو اليَدّين ديالكُم، آ المُدْنبـين، وْطهّرو قلبكُم، آ المتردّدين. 9حزنو وْنوّحو وْبكيو. تـتبدّل الضحْكة ديالكُم بالبكا والفرْحة بالحزن. 10تواضعو قدّام الرَّبّ وْهُوَ غادي يرفعكُم.

11ما تتكلّمو شي خايب على بعضياتكُم، آ الخوت. الّي كيتكلّم على خاه وْكيحكم عليه، كيتكلّم خايب على الشريعة وْكيحكم عليها. وِادا كُنْتِ كتحكم على الشريعة، يعني أنتينا ما كتعمل شي بِها، وَلكن رجعْتِ حاكم عليها. 12كاين غير واحد الّي عْطى الشريعة وْهُوَ الّي يقدر ينجّي ويهلك، وَلكن شكون أنتينا باش تحكم على قريبك؟

13سمعو دابا، آ أنتُمَ الّي كَتْقولو: "اليوما أَوْلا غدّا غادي نمشيو نْهَد المدينة أَولا نْديك المدينة وْنݣوّزو تمّاك عام، وْنبيعو وْنشريو وْنربحو." 14وَلكن أنتُمَ ما كَتْعرفو شي شنّو غادي يوقع غدّا. شنّي هي الحياة ديالكُم؟ أنتُمَ فحال الضّبابة الّي كَتْظهَر شويّش وْكَتْـتحيّد. 15بالعكس، كان عليكُم تقولو: "إدا بغى الرَّبّ، غادي نعيشو وْنعملو هَد الشي أَوْلا ديك الشي." 16وْدابا كتفْتَخرو بالتكبُّر ديالكُم، وْهَد الحيالة كاملة قبيحة. 17الّي كيعرف يعمل الخير وْما كيعملوْ شي، هُوَ كيدنب.

Currently Selected:

يَعْقوب 4: ary

Highlight

Copy

Compare