عبرانيين 7

الفصل السابع

1حيت مَلْكي صادِق، هَداك الّي كان مَلِك على مدينة ساليم وْقسّيس د اللّٰه العالي، الّي تلاقى إبراهيم ملّي رجَع من بعدما غلب الملوك وْبارك فيه، 2إبراهيم قسم لو العشور د كُل شي. والِاسم ديالو في الُوّل كيعني "مَلِك التقْوى" وْعاود "مَلِك ساليم" يعني "مَلِك السلام." 3هُوَ بلا باباه وْبلا يمّاه وْبلا درّيّة، ما عندو لا بداية وَلا نهاية في حياتو، وْكيشبه نِابن اللّٰه وْكَيْبقا قسّيس على الدوام. 4شوفو شحال هُوَ عظيم بلّي حتّى إبراهيم، وْهُوَ الكبير د الجدود، عْطى لو العشور د الغنايم. 5حتّى أُوْلاد لاوي، الّي كَيْصبحو مسْؤولين في بيت العبادة، عندوم الوَصيّة باش يشبّرو العشور من الشعب الّي هُمَ خوتوم، واخّا هُمَ من درّيّة إبراهيم. 6وَلكن مَلْكي صادِق، الّي هُوَ ماشي من أُوْلاد لاوي، شبّر العشور من إبراهيم، الّي كانت عندو الوعود من اللّٰه، وْبارك فيه. 7وْبلا شكّ، الصغير كَيْتبارك من الكبير. 8واللاويّين كَيْشبّرو العشور وْهُمَ الناس الّي غادي يموتو، وَلكن مَلْكي صادِق شبّر العشور حيت مشْهود لو بلّي هُوَ حيّ. 9وْنقدرو نقولو بلّي لاوي،#7‏:9 اللّٰه اخْتار الحفايد ديال لاوي، الّي هُوَ واحد من الحفايد ديال إبراهيم، باش يكونو المسْؤولين على العبادة لِلو. الّي كيشبّر دابا العشور، عْطى حتّى هُوَ العشور على يَد إبراهيم. 10حيت لاوي، الّي باقي ما تولد شي، كان حاضر في جدّو إبراهيم ملّي تلاقاه مَلْكي صادِق.

11إدَن، كَكان الكمال بالخدْمة د اللاويّين، علاش كان خصّوْ يكون عندوم قسّيس يَخُر حسب رُتبة مَلْكي صادِق وْماشي على حسب رُتْبة هارون؟ حيت في الوقت ديالوم اتّعطات الشريعة نالشعب، 12وِادا تبدّلَت الخدْمة في بيت العبادة، ضروري حتّى الشريعة تـتبدّل. 13وْيَسوع، الّي تقال عليه هَد الشي، هُوَ من قبيلة يَخرى الّي حتّى واحد فيها ما خدم في المَدْبح. 14حيت معروف بلّي رَبّنا تولد في قبيلة يَهودا الّي ما عُمرو موسى ما تكلّم عليها من جهة الخدْمة في بيت العبادة. 15وْديك الشي الّي قُلْنا واضح كتَر، إدا كيرجع قسّيس يَخُر فحال مَلْكي صادِق، 16الّي رجَع قسّيس، ماشي على حسب الشريعة د واحد الوَصيّة جسديّة، وَلكن على حسب قوّة الحياة الّي ما عنداْ شي نهاية، 17حيت الكتاب كيشهد لو: "أنتينا قسّيس على الدوام حسب الرتْبة د مَلْكي صادِق."#7‏:17 هَدي واحد النبوة على يسوع المسيح الّي جات على يَد المَلِك داود 1000 سنة من قبل ما تحقّقت في المجي د المسيح (المزمور 110‏:4).

18على هَد الشي رجعَت الوَصيّة القديمة باطلة، حيت كانت ضعيفة وْما صالحة شي. 19حيت الشريعة ما قدرَتْ شي تردّ حتّى حاجة كاملة، وَلكن دخل واحد الرجا الّي عندو قيمة كتَر، الّي بِه كنقرّبو ناللّٰه. 20وْهَد الشي ما كان شي بلا حلوف، حيت المسْؤولين في بيت العبادة يَخرين رجعو مسْؤولين بلا حلوف، 21وَلكن هَدا رجع قسّيس بالحلوف د هَداك الّي قال لو: "الرَّبّ حلف وْما غادي شي يبدّل الرأي ديالو: «أنتينا قسّيس على الدوام.»" 22على هَد الشي رجَع يَسوع الضمانة د واحد العهد أفضل. 23وْكانو بزّاف د المسْؤولين، حيت كان الموت كَيْمَنعوم يبقاو في الخدْمة ديالوم. 24وَلكن يَسوع كيبقا على الدوام والخدْمة ديالو ما عنداْ شي نهاية. 25وْعلى ديك الشي يَسوع قادر ينجّي على الدوام الّي كَيْتقدّمو بِه نْعند اللّٰه، حيت هُوَ حيّ دائمًا باش يشفع فيهُم. 26حيت كيليق بِنا واحد رئيس المسْؤولين الّي هُوَ قُدّوس، بلا عيب، صافي، حياتو بعيدة من حياة المُدْنبـين وْتعلّى نالسما، 27الّي ما كَيحْتاج شي يقدّم الدبايح كُل نهار، حيت هُوَ عمل هَد الشي مرّة واحدة ملّي عْطى نفسو، ماشي فحال رُؤَساء المسْؤولين الّي في الُوّل كَيْقدّمو الدبايح على الدنوب ديالوم وْمن بعد على الدنوب د الشعب. 28حيت الشريعة كتجعل من الناس الضعافين رُؤَساء مسْؤولين، وَلكن كلمة الحلوف الّي جات من بعد الشريعة كتجعل من الِابن قسّيس، الّي هُوَ كامل على الدوام.

Currently Selected:

عبرانيين 7: ary

Highlight

Copy

Compare