အင် 31
31
ဂြုဝ်း အာငျာန် ပီ ကာလာင် ခုန်ဒီခမ်
1ဂြုဝ်း နီ မုး ဂြုဝ်း ခုန်ဒီခမ် အာလေမူလ။ န့ ဘော မုး ပီ မာနုဝ် ဒွါ မာ အန် ဒီ အန်။
2မာ အန် ဟဲ့ တဝ်း၊ “အိုယ် ဂွန် အုဝ်၊ မဲ မုး ဂွန် အာရာင် ပီ ရွက့် အုဝ်။ မဲ မုး ဂွန် ပီ ဆာခိုဝ် ပီ မှာန့် အုဝ်။
3ကွဲ့ ပီစှိုမ် ဟဲန့် မဲ ဒီ အီဘိုန့် ကိူန်၊ ကွဲ့ လာယ် ဂေ အီဘိုန့် အီ နပ် ဒီ ပျာတ့် ခုန်ဒီခမ်။
4အိုယ် အာလေမူလ တဲး မဲ ထူမ်။ ခုန်ဒီခမ် အာဝ် ကာအာပ် ဒျီင် အိုမ် မာငုန်။ ဒါ ကာညာ အီ အိုပ် မိူင်၊ အာဝ် ကာအာပ် ဒျီင် ပဝ်း အီ ပြာင် ကာဆဝ်။
5ဂေ ဟီ ဟွတ့် ဒျီင်၊ ယုဝ် ဂေ ပိဝ် ဂြုဝ်း ဒါရာ။ ယုဝ် ဂေ ဆုင်ဖျာတ် အာမူ ဂေ ဒူအီ ဂိန်၊ တူ ဒူပ် ဒါရာ။
6တဲး မဲ ဒွါ အိုမ် ပဝ်း ဒီ ဒူအီ အီ ဟဲ့ ရိန် ဒီ ယမ် ဘော ဒီ ဒူအီ အီ မိုဝ်း နဝ်း လိုဝ် နဝ်း က့လိုဝ်။
7တဲး ဂေ ဒျီင်၊ ကွဲ့ ဟူ တဲး ဂေ လှုဝ်း ဒုက် ဂေ။ တဲး ဂေ ပိဝ် လွင် ဂိန် လွင် ဖ့လာန် ဂေ။
8တဲး မဲ ကွယ် ဘ့လာက် ဒူအီ အီ တူ နပ် ဒီ ကာလာင် လွင် ဒုဝ် ဂေ။ တဲး မဲ စွယ် ဂေ ကာလာင်။ တဲး မဲ စွယ် ဘော ဂေ အီ တူ မိုဝ်း ဒူင် ဒီ ဘိုင်။
9တဲး မဲ စွယ် ဂေ ကာလာင်၊ ဆုင်ဖျာတ် ဆိူဝ် ဆိူဝ် မှာန် မှာန် အာမူ ဂေ၊ ဘ်ု အာရေ ဂေ အီ ဂိန် ဘော ဂေ အီ တူ မိုဝ်း မာဆေ။”
လွင် အီဘိုန့် အီ မွှိုမ်
10ဆေ အေ ဟြေတ့် အီဘိုန့် အီ မွှိုမ်၊ န့ ဘော ညှာပ် ဒီ ကာတုန့်။ အီဘိုန့် ဇိုဝ် တီ၊ အန် ဘော ငဝ်း တာင် လွှိုမ် ဆဲန့် အီ ဟဲ့ ငဝ်း တာင် ကာဆဝ်။
11အီမာယ် အန် ဘော ညှိုမ် နဝ်း အီဘိုန့် တီ။ အန် မိူဝ် တူ စှိုမ် ဒေါ မှဝ်။
12အီဘိုန့် တီ မိူဝ် တူ ပျာတ့် ပီ ဘူင် အီမာယ် အန် အီ ဒီ ဘဲန် အာဂျိုဝ်။ အန် ဘော ဘူင် နာ ဘွတ် နာ မွှိုမ် ဘော စုဝ် အန်။
13အန် ဘော နပ် ဒီ ဟြေတ့် ဟိုက် မာဘူ ဘော ကာတမ် လုယ်။ အန် ဘော ဂျုဝ်ဂျာ ဒီ ဒဝ့်၊ တဲး န့ ဘဲန် ခြိုင် တာ။
14အန် နပ် ဒီ ဒိုဝ်း တး ပီ ဒီ ဟူမ် ဒီ ဂွန် အန်။ အန် ပီ ဒူအီ အီ ကာစိုဝ်း ကာယွင့်၊ အီ ဟဲ့ တး တူင့်။
15အန် ယိတ့် ဆိန့် ဆိန့်ဝး အာတ့် ဘ့လာင် ပြဲ၊ ဘော ရဲန် ပီ ဒီ ဟူမ် အာဒါ န့ဟူမ် အန်။ အန် ဘော စ်ု ဂေ မှာယ် အီဘိုန့်၊ တဲး ဂေ နပ် ပီ ဒီ လုဝ် ဘူင် ဂေ ဒွန် အီ။
16အန် ဘော နပ် ဒီ ယွတ် ဆီချာ ဒူင် နာ။ ဟဲ့ ဟွတ့်၊ အန် မိူဝ် စိုဝ်း။ အန် ဘော ဒိုဝ်း ရွိုန် ပဲ့ ဟဲ့ ပွိုန် အန်၊ ဝီ ဘူင် မာန် မာငုန်။
17အန် မိူဝ် တူ ကြာန် ဒေါ မှဝ်။ အန် ဂျုဝ်ဂျာ ဒီ ဘူင် ဂါန် ခဲ့ ပွိုန် အန် ဘူင်။
18ပီ ဒီ စိုဝ်း ပီ ဒီ ယွင့် အန်၊ အန် နပ် ဒီ ဘူင် တဲး န့ မိုဝ်း အာမျာတ် အန်။ ခဲင် မှိုဝ် အန် ဘော ဘူင် ဂါန်၊ ရာင် ငဝ် အွမ်။
19ဒဲ အန် မိူဝ် တူ မိုဝ်း ဒေါ လူယ်၊ အန် ဘော ဘတ် ဆေန့်၊ တဲး အန် ပွိုန် ဒီ ဒဝ့် ဘဲန် ခြိုင်။
20အန် ဘော မိုဝ်း နဝ်း ဟာင် ဒီ ဂေ အီ အေတ့် အီ ဂိန်။ အန် နပ် ဒီ ဒွါ ဒီ ဂေ အီ တူ မိုဝ်း မာဆေ။
21အိုမ် ဒါတ် ပီ ဘော စုဝ်း၊ အန် မိူဝ် တူ ယုဝ်။ ခုဝ်၊ ဒူအီ ခဲင် န့ဟူမ် အန် ဒွန် အီ ဟဲ့ ဟွတ့် မိုဝ်း ခြိုင် ဆီအုန့်။
22အန် ဘော နပ် ဒီ ဒဝ့် ဟိုပ် အီ ပ့လိုက် ဒေါ အိတ်။ အန် ဘော တာ ခြိုင် အီ စှိတ် ကာဆဝ်။
23အီမာယ် အန် မိူဝ် မိုဝ်း ဆာရေ ဘော တုတ့် ရိုမ် ဒူပ် ဂေ ဒါ တာင် ခဲင် မိူင်။
24အန် ဘော နပ် ဒီ စိန့် ခြိုင်၊ ဘော ဘူင် ဆဲ့၊ ယွင့် ဒီ ဂေ ဒါ ကာညာ ကြုဝ်။
25အန် ဘော မိုဝ်း ပ့လူမ် မိုဝ်း ဟဲန့်၊ ဘော ဘဲန် ပီ ရုဝ်ဆေ အီ ဟဝ်။ ဆေ အန် ဇေန့်ဇာ လွင် နာ အာတ့် န့ ဒီ ပါယ် မှဝ်၊ အန် မိူဝ် တူ မိုဝ်း ဒီ လုဝ် ယုဝ် မာဆေ။
26အန် ဘော နပ် ဒီ ကာလာင် ဂြုဝ်း အီ မိုဝ်း အာငျာန် ဘော မာနုဝ် အီ ဆေဆေ၊ တဲး န့ ငှိုယ် ဒူပ်။
27အန် ဘော နပ် ဒီ ယွတ် မဲန် ဒူအီ ခဲင် န့ဟူမ် အန်။ အန် မိူဝ် တူ ကြာန် ဒေါ မှဝ်။
28ခဲ့ ကွယ် ဂေ ဂွန် အန်၊ ဂေ ဘော နပ် ဆီချာ ပီ ပါယ် ဂုင် ဂေဇူ အာဂျိုဝ် အန်။ အီမာယ် အန် မိူဝ် အိူပ် မျုက် အန် တဝ်း၊
29“အီဘိုန့် အီ ဟဝ် ဟဲ့ ကိူန်၊ ဟဲ့ မုး အီဘိုန့် ဘွတ်၊ အီဘိုန့် မွှိုမ်။ မာလဲ၊ မဲ နီ၊ မဲ ဟဲ့ မွှိုမ် လွှိုမ် ဂေ ဘောကာဂ့လျီတ်။”
30ဆေ မဲ ယွတ် ဒီ အာရိုပ် အီဘိုန့်၊ မဲ မိူဝ် တူ နပ် ယုဝ် နဝ်း အန် ဟဲ့ မွှိုမ် တူ မွှိုမ်။ ဆေ မဲ ယွတ် စှိတ် အန်၊ အာဝ် လှေန့် န့ ဒီ ဟြာယ်။ ဆေ မဲ ယီ မိုဝ်း အီဘိုန့် အီ ရုဝ်ဆေ ဇဝ်ဖြာ၊ ဟဲ့ ကာအာပ် အိူပ် အန်။
31တဲး မဲ ဒွါ ဒီ အန် ခဲ့ ကာဒါန် အာဂျိုဝ် ပီ ဘူင် အန်။ တဲး ဘော အီ ဟဝ် ဒွန် အီ ရုဝ်ဆေ အန်။
Currently Selected:
အင် 31: pce
Highlight
Copy
Compare
Share
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
