Roma 16
16
Paulo ve maeaforoe o ipi karu hariaharia vei
1Ara Foebe, ereitave uaroa lareva, Kenekerea ekalesia ve diakono ua la, ero tai itapi la isai meha. 2E arero Papuvita voa maeafukapaia, Ualare ve karu ve mai lareva lōfeare. Are sa ero loki leita lea etau voa e sa arero toaraia; ipi are ta karu rauapo aea ara ita la toaraita eavia.
3Perisika auka Akuila ita, Keriso Iesu voa ara ita farehoria tivi leiape lea karu oraka arave maeaforoe o omoia.#Apos 18:2 4Ereukaro arave makuri vei lei, soa haekao paea opai vei leipe; ara ereukaro marase auai, aea ara haria kasirau, a—, toru hariaharia ve ekalesia firufiru foromai ta reha. 5Ereukave uvi voa kokorukaita ekalesia karu ta maeaforoe o omoia. Ara haikakare leita Epaineto ta maeaforoe o omoia; are fare toare vita Keriso vei Asia ve soa voa. 6Maria, tivi rauapo e vei leiape lea ua ta maeaforoe o omoia.
7Anederonika auke Iunia ita, arave Iuda opamōla oraka, ara ita farehoria dibura voa fasōpe lea karu oraka la maeaforoe o omoia; ereuka fari koa karu oraka aposetolo karu voa, aea ereuka Keriso ve karu firu voa evera oropōpe, ara aite.
8Ampliasi ta maeaforoe o omoia, Papuvita voa ara haikakare leita lea moraitai. 9Urubano la maeaforoe o omoia, Keriso voa ara ita tivi fareho leita vita, aea ara sa haikakare leita Stakusu ta reha. 10Apelese ta maeaforoe o omoia, Keriso ve tivi vei seseōvi ovi kere ita pavaita lea vita. Aristobulo ve uvi karu ta maeaforoe o omoia. 11Herodiono, arave Iuda opamōla ta maeaforoe o omoia. Narakiso ve uvi karu, papuvita voa pepeita lea karu ta maeaforoe o omoia.
12Trufena auka Trufosa ita, Papuvita voa tivi heafo leita lea karu oraka ta maeaforoe o omoia. Peresisi, haikakare leita lea ua ta maeaforoe o omoia; are Papuvita vei tivi suru ita leita lea ua. 13Rufo, Papuvita vei seseōvi ovōpe lea vita, areve lou, araro atute maea leita lea ua ita ta maeaforoe o omoia.#Mak 15:21 14Asunukrito aea Felegono aea Hereme aea Patrobasi aea Heremasi, ereve maeapavora karu ita ta maeaforoe o omoia. 15Filologo aea Iulia, aea Nereusu areve uaroa ita, aeata Olumupa aea ere ita farehoria pepeita Ualare ve karu ita ta maeaforoe o omoia.
16E maeaforoe elore elore muia evera sisia. Keriso ve ekalesia karu foromai ero maeaforoe o lōri omoi vovea.
Siso Ovoro
17Arave paumarehari e, ara ero loki serea ita la leipea, eve haiiri la faeafaea oita karu, aea ero lei safosafoa putoita lea karu la kiva leitia. Ero satiriōri malasa leita lea o la ere sa sukavutea vovea; erero kiripi mai haria leitia. 18Lōfeare karu ere ereitave Papuvita Keriso ve toaraita karu kao, ere ereve ére vei haria haikakare lei vovea. Ere o mafu, aea o lareva hahau‐hahau ita la maravi mei haiivavu karu la vuteaitore. 19Ipi eve haiiri sa kakeva leita mai ve fari karu foromai sa mapi fafarapaiape. Lea vei ara e vei hailareva lei vovea, aea ara mea la haikaeai, e haiore karu etau lareva voa leiti vei, a—, etau maealolo voa e haiivavu karu leiti vei. 20Tairu miaraita lea Ualare, Satani la eve mora posa sa patei lōfeare utohoa saforai roi.
Ereitave Papuvita Iesu Keriso ve haiforoe leita meru e ita farehoria pepe peava.
21Timoteo, ara ita fareho tivi leita vita, maeaforoe o ero la moi; aea arave paumarehari oroisoria ta meha, Lukiu aea Iasona aea Sosipatera ita.#Apos 16:1
22Arao, Teretio, arave mai sa mea karoro la ukaita vita, maeaforoe o ero Papuvita voa la moi.
23Gaio, araro savua kiva leita vita, ekalesia ta areve uvi voa kokorukaitore, are maeaforoe o ero la moi. Erasto, karikara ve moni kiva vita, maeaforoe o ero la moi, aeata Koato, ekalesia karu aea, are ta reha.#Apos 19:29; 1 Kor 1:14; 2 Tim 4:20
[ 24Ereitave Papuvita Iesu Keriso ve haiforoe leita meru e ita farehoria pepe peava.]
25Ereita Ualare la maeatia. Are ero lei rofo leita ore eve sukaerereaita haiiri voa, usoso ara itoro arita o, Iesu are Keriso lea ovoro feare, aeata usoso evera kofa soa voa omoi auke lei murufakao eaeiape lea hohore o feare. 26A—, faitora lea hohore o a peroveta karu ve karoro voa pisiri mui ita meha, aea peita Ualare sa moita lea vei toru hariaharia karu foromai ta mapi ore loi, karu foromai la lei ere Ualare la sukaererea kakeva leiti vei. 27Are haria haiore foromai leita lea Ualare vei sosorusosoru Iesu Keriso voa lei peava. Amene.
Currently Selected:
Roma 16: TQO1983
Highlight
Share
Compare
Copy
Want to have your highlights saved across all your devices? Sign up or sign in
Published by the Bible Society of Papua New Guinea in 1983.
