Roma 14
14
Eve ekalesia paumarehari la levi seseōvaia
1Soka sukaerereaita haiiri voa tivutivu leita lōfeare karu la lei malasa leitia, a—, areve elore seseōvaita haiiri vei o serea ita levi moia.#Kolo 2:16 2Karu aea larietau foromai la lari vei sukaerereaitore; a—, sukaererea rofo auke leita lea karu asaita larietau la haria larō vovea. 3Sarōva la laloita lea karu, sarōva avoha leita lea karu la kaiae o levi aria, aeata sarōva avoha leita lea karu ta sarōva la laloita karu la kaiae o levi aria, ipi Ualare sa arero maeafukapaita eavia. 4A ita leisa, karu haria ve sarufa karu la seseōvi kaiae o ari vei ei? Areve elore Papuvita sa arero seseōvai roi, are mai lareva leita varo, kasirau varo.
5O aeata meha, karu hea sare farakeka aea ve eite sare hea ve eite ve arori voa o ō vovea, a—, karu hea ta sare foromai ve lareva usoso o ō vovea. Karu foromai lea la elore haiiri voa haura ve soa la seseōvi, haiiri kekese leitia. 6Lea sare farakeka la kiva leiti haikaeaita lea karu Papuvita vei haikaeaitore; aea larietau loloita lea karu Papuvita voa laritore, ipi are larietau vei Ualare la maeatita eavia. Larietau hea la avoha leitita lea karu ta Papuvita voa larietau avoha lei Ualare la maeati vovea. 7Ipi ereita voa karu elore maea sa haria makuri leiti sore, aeata elore maea sa haria opai sore. 8Ereita makuri leitita, a—, ereita makuri Papuvita vei leititore; aeata ereita opaita, a—, ereita Papuvita vei opaitore. Soka ereita makuri leitita, ō ereita opaita, a—, ereita Papuvita ve karu. 9Ipi Keriso mea vei opōpe aea ata makuri leipe, are sa opōpe karu ve, aea makuri leita karu ve Papuvita leiti vei. 10Soka ao, a ave marehari la seseōvi kaiae o arita ipi levea? Aeata meha, a ave marehari la sukavuteaita ipi levea? Ereita foromai Ualare sa seseōvi tava miaraita oti voa soi popōvai roi.#2 Kor 5:10 11Ipi Safu Buka ve o meha,
Papuvita o mō auai, Arave makuri vei, arihau foromai ara voa sukakoka avi, uri foromai Ualare la maeati roi.#Isa 45:23 12Soka ereita foromai elore elore leiape etau vei Ualare la omei vavavai roi.
13Soka ereita ereitave karu aea la ata levi seseōvaia, a—, haiiri mōfeare kekese leitia, ereita safosafoa putoita etau aea feravaita etau ereitave marehari ve omopa voa levi miavai vei. 14Ara ore, aea Papuvita Iesu voa arave haiiri mea etau vei roroka loita meha, larietau areve elore maea sa avoha leiti sore, a—, karu lea larietau avoha leitit’ oria, are larita lareva kao. 15A larita lea larietau vei, a ave marehari la hasiavait’ oria, a haikakare ita meia kasirau. A larita lea larietau sa arero levi lei saroroapaia, Keriso are vei ta opōpe eavia. 16A sa lareva o a’ seseōvaita lea etau la karu haria sa o maealolo ari vei levi leitia. 17Ipi Ualare ve Basileia ve eite etau ma ita la laloita lea kao, a—, areve eite meha, haura mai, tairu aeata hailareva Safu Arahoha voa. 18Keriso la toari lōri leitita lea karu, Ualare la lei hailareva lei, karu ta arero haikaeai roroava roi.
19Soka ereita tairu ve otiharo, aea ereitave karu la lei rofo leita mai ita la elia. 20Ualare ve tivi la larietau avoha leita mai sa levi toa foforukaia. Larietau foromai ovava ia, a—, karu la lei larietau avoha vei safosafoa putoita, lea mai kaiae. 21Mai lareva meha, sarōva aeata uaina ita la avoha leiti vei, aeata ave marehari la lei safosafoa putoita etau aea varo lea ta avoha leitia. 22A seseōvi sukaerereaita haiiri kofa mea etau vei ia ei? Lea haiiri a elore vei Ualare ve soso voa ovaia. Are haikaea ovaita lea etau voa aea elore mai la seseōvi titititi auke leitita, lea karu lareva ia. 23A—, are horahora arita etau la larit’ oria, Ualare arero kaiae o ari roi, ipi are sukaerereaita haiiri ita lea larietau la lari kao. Soka sukaereraita haiiri ita leiti auke leitita lea mai foromai kaiae reha.
Currently Selected:
Roma 14: TQO1983
Highlight
Share
Compare
Copy
Want to have your highlights saved across all your devices? Sign up or sign in
Published by the Bible Society of Papua New Guinea in 1983.
