Roma 11
11
Ualare ve maeaforoe Israela vei
1Soka arave lalasi o meha, Ualare areve karu la sukavutea mea ei? Kakaeite! Ara ta Israela karu, Abrahama ve meavo, Beniamina toruipi karu farakeka aea.#Fili 3:5 2Ualare are evera soa voa ore leipe lea toruipi karu la sukavuteaia kasirau. Safu Buka ve o Elia ve fari voa e lea la ore kao ei? Are Ualare ve omopa voa o serea ita havara Israela la paraea mō ōpe, 3Papuvita e, ere ave peroveta karu la paea paea, ave alitara la toa foforuka foforuka, arao, ara hariakao laipea, aea ere arave makuri ta la elipea araro paeai vei.#1 King 19:10, 14 4Soka Ualare arero tava o leafeare moipe? Are mō ōpe, Ara karu 7,000 ara elore vei kiva lei mea, ere lea apeva ualare Baali la maso toai sore.#1 King 19:18 5Mea faitora soa ta lōfeare, Ualare ve maeaforoe sa haikaeai maravaita karu hohoi la roroa. 6Are karu la haikaeai maravaita mai ve ipi maeaforoe, ere sa leita lea etau hariaharia vei kasirau. Lōfeare auke oria, areve maeaforoe ta eite kasirau.
7Aita leafeare? Israela karu sa elita lea etau la ere sukaeai kasirau. Ualare sa haikaea maravōpe lea karu fafareso sa sukaeōpe; a—, lea karu ta haria ere ōvafae kere lei roroaiape. 8Usoso Safu Buka voa uka siseita o fefeare. Ualare erero ofae hoeaita ove erero miaraiape, ofae eavai auke leita ofae, aea mapai auke leita ōvauta ta reha itiiti iso sare voa.#Deut 29:4; Isa 29:10 9Davida ve o ta mōfeare,
Ereve safu sosoka la lei fitōva aeata saro ere vei miavaia,
aea ferovi putoita etau aeata kaiae tava etau ta reha.#Sal 69:22–23
10Ereve ofae murumuru leitia, ere etau levi eavai vei,
aea ereve avasa pakokoa ae peava.
11A—, arave lalasi o meha, Iuda karu ere safosafoa putoi kofa leipe ei? Kasirau. Ere safosafoa mai kaiae leipe lea vei, makuri leita siahu toru hariaharia karu voa forerōpe reha, Iuda karu la lei hilisi leiti vei. 12Iuda karu sa leipe mai kaiae voa etau lareva lareva mearovaeka voa lea vei foreri sisea, aea ere merava leipe lea vei toru hariaharia karu etau rauapo maravi la roroa. A—, Iuda karu foromai sa topiaraita, a—, lareva soa foromai rovaea kofa leiti roi.
Toru hariaharia karu la fareōvi makuri lei la roroa
13Soka ara faitora ero toru hariaharia karu la ovoro la moipea. Ara toru hariaharia karu ve aposetolo karu lei meita lea vei, ara arave tivi vei maeamarōva lei vovea. 14Ara arave toruipi karu la lei hilisi leita varo, aea erero hea la lei makuri lōri leiti vei. 15Ipi erero sukavuteōpe lea mea, mearovaeka Ualare ita totoeōpe reha; a—, erero ata ovaita soa, leafeare leiti roi? Makuri soa opai karu voa forerai roi.
16Toare faloa koru la Ualare la omopa posaseaita, a—, faloa maeamakora ta areve loita reha; aea tola ve likilea la safu leitita, tola lakai ta safu loita reha. 17Olive tola lakai hea la saerea mutatapaita, aea eo toru hariaharia karu e, e ta olive merava feare ereve saereaita tao voa mopi, Iuda karu ita fareho olive kofa feare ve opu lareva la larita; 18a—, e maeamarōva lei tola lakai kofa la hiva o levi aria. Mea la haikaeaia, likilea ve makuri e voa kao, a—, eve makuri ve ipi likilea voa.
19Eve o mōfeare varo, Tola lakai saerea mutatapōpe elaro ipaisa lakai feare iri voa mopai vei. 20Okofa reha; a—, erero saerea mutatapōpe ipi ere sukaerereai auke leipe lea vei, a—, eo, eve sukarereaita haiiri sa lei mopi fofoeaitore. E haiiri maeamarōva lea vei levi leitia; a—, tore leitia. 21Ualare lakai kofa, lea ve eite Iuda karu la maeaforoe auke leitita, a—, are ero ta maeaforoe levi leiti roi. 22Ualare ve maeaforoe, aea areve haiiri kere ita la ofae eovi ore leitia. Putoita lea karu voa areve haiiri kere la eavaia; a—, e voa areve maeaforoe la ofae eavaia, e areve maeaforoe voa pepeit’ oria. Lōfeare auke leit’ oria, ero ta saerea mutatapai roi. 23Iuda karu ta reha, ere haiiri kerori sukaerereai vei haiiri kakeva leit’ oria, erero ta iri voa ata mopai roi; ipi Ualare erero ata mopaita ore. 24E toru hariaharia karu, e olive merava feare olive tola kofa voa mopaita, a—, Ualare sa mea saerea faraita lakai kofa, lea ve eite Iuda karu la ereve olive tola kofa voa ata mopai vei heafo levi leiti roi.
Ualare karu foromai la maeaforoe lei vovea
25Paumarehari e, ara haikaeai kao e mea hohore etau la haveva leiti vei, e eve elore haiore vei haiarori leiti ave. Etau meha, Israela karu hea ere ōvafae kere lei roroava roi, lei lei soa toru hariaharia karu ve rauapo usoso Ualare sa kekese leita feare areve basaleia voa oropai ao. 26Israela foromai la fareōvi makuri lōri leiti roi. Usoso Safu Buka voa mō uka siseita o feare,
Fareōvi makuri leita Vita Siona voa koti forerai roi;
aea mai maealolo foromai la Iakobo ve meavumōla voa fareōvi kaleiti vei.#Isa 59:20
27Ara ere ita otoare lōfeare ari roi,
ara ereve iri kaiae la fareōvi mutapaita lea mea.#Iere 31:33–34
28Iuda karu ere Ovoro Lareva la sukavuteaita lea vei ere Ualare ve ote karu, aea e lareva soa lōri ovai; a—, ipi Ualare ereve papa la haikaea maravōpe lea vei are erero haikakare araitore. 29Ipi Ualare areve maeaforoe ve meru aeata are haikaea maravōpe lea karu vei haiiri haria leiti sore. 30E evera soa Ualare la kakeva auke lei roroaiape, a—, faitora Iuda karu ve kaeava vei e Ualare ve maeaforoe la sukaeaita meha; 31lōfeare mai ita, ere faitora ōvafae kere lei roroaita, a—, e Ualare ve maeaforoe ovi roroaita lea vei, ere ta areve maeaforoe la eavai vei. 32Ipi Ualare ereitaro karu foromai la sasaukōpe, ereitave mapai auke mai vei, eite are ereitaro foromai la maeaforoe leiti vei.
33Ualare sa ovi meita etau, haiovoro ita haiore ita ve toru ve karera leafeare ei! Are seseōvi kekese leita haiiri leisa ore? Are sa leita lea mai ve eite ta leisa seseōvaita ore ei?#Isa 55:8 34Usoso Safu Buka ve o fefeare,
Papuvita ve haiiri leisa ore?
Arero kurea ovoro omei lei ore leita karu leisa?#Isa 40:13
35Etau arero miōri ore leita karu leisa
ipi tava are voa ata ovai vei?#Iob 41:11
36Ipi etau foromai areve, are voa foreri aea are sa leiape. Sosorusosoru are voa lei peava! Amene.#1 Kor 8:6
Currently Selected:
Roma 11: TQO1983
Highlight
Share
Compare
Copy
Want to have your highlights saved across all your devices? Sign up or sign in
Published by the Bible Society of Papua New Guinea in 1983.
